Etop eke Visiting Teaching, Akpa Ofiong ke isua 2014.

Ata Iso Utom eke Jesus Christ: Ndidi Uwutnkpo.

Bong akam kot nkpo emi ndien yom usung ndidiongo nte ekpebuanade. Didie ke ndifiok uwem ye utom eke Andinyanga edi nnam mbuotidem mbufo ke Enye okori onyung odiong mbio owo emi mbufo esede enyin eto ke visiting teaching? Ke oyomde ndifiok awak, ka ke reliefsociety.lds.org

Nte nnyin ifiokde ete ke Jesus Christ edi uwutnkpo ono nnyin ke kpukpru nkpo, nnyin imekeme ndinam udong nnyin okori ke nditiene Enye. Nwed Abasi oyoho ye iko ndongesit ono nnyin nditiene mkpatisang Christ. Christ eting ono mme Nephites, ete, “Koro utom emi mbufo ekekutde nte ami nnamde ke mbufo edinam nko” (3 Nephi 27:21). Jesus eting ono Thomas, ete, “Ami ndi usung ye akpaniko ye uwem: owo baba kiet itieneke Ete, ibohoke ebe ke ami (John 14:6).

Mfin emi mbio eke edade nnyin usung eti nnyin ete ida Andinyanga nte uwutnkpo nnyin. Linda K. Burton, general president eke Relief Society, eketing ete, “Ini emi nnyin kiet kiet inyenede doctrine eke Uwa Usio Isop ke ntotungo esit nnyin, do nnyin iyetongo ndikabare ndi uto owo eke Jehovah oyomde nnyin ete idi.”¹

President Thomas S. Monson eketing ete ke, “Obong ye Andinyanga nnyin, Jesus Christ, edi Uwutnkpo ye odudu nnyin.”²

Yak nnyin ibiere ndisanga mkpere Jesus Christ, ndikop item Esie ndien inwana ndifiak nnyong mbine Ete nnyin ke Enyong.

Emi oto ke mme Nwed Abasi

2 Nephi 31:16; Alma 17:11; 3 Nephi 27:27; Moroni 7:48

Emi oto Mbuk Eset Nnyin

Eliza R. Snow, udiana general president eke Relief Society ekewet ete, ke “Enye akasiak mkpafaha usung onyung ebe iso” ke utom ukworo iko eke Jesus Christ ke isong.³Enye okokworo iko Abasi ono mme owo ke idem mmo — kiet kiet. Enye ekekpeb nnyin ete yak nnyin ikpong erong anang ye efurenang man ikenyanga erong kiet oro osopde (kese Luke 15:3–7). Enye ama okok mme owo udongo onyung ekpeb mme owo nkpo, ada ini ekpeb owo kiet kiet ke otu ibat owo nte tosin iba ye ubak (kese 3 Nephi 11:13–15; 17:25).

President Dieter F. Uchtdorf, Udiana Ono-item ke First Presidency, eketing ono iban Latter-day Saints, ete: mbufo nti ndito eka iban enwam mbio efen ye esit mbom ke ntak emi okponde akan udong ndinyene udori nno idem mbufo. Koro ke emi ke mbufo ekpebe ebiet Andinyanga. …Kpukpru ini ekikere Esie akabanga ndinwam mbio efen.”⁴

© 2014 eketode Intellectual Reserve, Inc. Emenim kpukpru unen. Ekeming ke USA. Enyimme eming ke Iko Mbakara: 6/13. Enyimme Ndikabare: 6/13. Ndikabare eke Visiting Teaching Message, January 2014. Efik. 10861 553.

Nso Ke Ami Mkpenam?

Didie ndien ye ke ewe usung ke Jesus Christ edi uwutnkpo ono mi?
Didie ke ndinam nkpo nno mme ndito eka iban eke Ami nkesede edinwam mi nditiene Andinyanga?