President a Odzi Kan Amandzɛɛbɔ, Sanda 2014
Ber Pa no a Wɔdze Dua Edua
Tsetse Rome man mu no, nna Janus nye ahyɛase enyame no. Nna wɔtaa yɛ no mfonyin dɛ ɔwɔ enyim ebien— kor hwɛ ekyir wɔ dza ɔabɛsen kɔ, na kor no hwɛ kan hwɛ ndaamba. Kasa horow binom dze Sanda bosoom no ato no osiandɛ afe ahyɛase nye ber a wɔdze dwendwen na wɔdze yɛ nhyehyɛɛ so.
Mfe mpem mpem ekyir no, wiadze yi mu amambra dodow wɔ kusum dɛ wɔyɛ ndzeyɛɛ a wɔhyɛ dɛ wɔbɛyɛ no afe fofor mu no. Nokwar, ereyɛ ndzeyɛɛ ahyɛ dɛ ebɛyɛ biribi ne yɛ yɛ mberɛw—ne ndzi do no yɛ adze fofor koraa.
Banyin bi a ɔyɛɛ Afe Forfor mu ndzeyɛɛ a ɔhyɛ dɛ ɔbɛyɛ tsentsen bi nyaa no mpontu ho enyigye yie. Ɔnoara dween noho dɛ, “Besi ndɛ, medzi m’edziban a ɔsɛ, mo bo mmfuui, medzi me sikasɛm nhyehyɛɛ do, na mennkãa me fipamfo no bɔdɔm ho hwee. Mbom ndɛ yɛ Sanda 2 na ɔkyerɛ-mber adɔmba no abɔ seisei na mber aso dɛ mifi mpa mu. Ɔbɛgye anwanwadze dɛ mobɔkɔ do asɔw mo mpontu no do.”
Erehyɛ Ase Bio
Erehyɛ ase fofor dze enyidado soronko bi ba. Mususu dɛ ber bi mu no hɛn nyinara apɛ dɛ yɛbɛhyɛ ase bio a nkekãa biara nnyi hɔ.
Modɔ dɛ menya kɔmputa fofor a ɔwɔ hard drive a no do tsew. Mber kakra mu no, ɔyɛ edwuma pɛpɛɛpɛr. Mbom nda na adapɛn rutwa mu no nna program horow robogu do (binom egye no enyim, binom so nngye enyim), nkyii kɔmputa no gyinagyina, na ndzɛmba a nnkyɛ eyɛ no ntsɛm na yie mu no bɛyɛ nyaa. Ɔtɔfabi a ɔnnyɛ edwuma koraa. Erehyɛ ase asɔ no mpo botum abɛyɛ edwuma dzen osian electronic nkukunkakar na nwura a wɔabɔ apetse wɔ hard drive no mu no. Ɔtɔfabi a dza ibotum ayɛ ara nye ebɛpepa biribiara efi kɔmputa no do na ahyɛ ase bio.
Suro, ekyingye na afɔdzi ho adzesoa so botum abɔ apetse wɔ nyimpa dasanyi so mu dɛmara. Mfom do a yɛayɛ (dza yɛgyee enyim nye dza yɛanngye enyim) no botum ahyɛ hɛn do ara ma wɔayɛ dɛ ma yennhu dza yɛbɛyɛ.
Bɔn afã no, mpepae kwan nwanwa bi wɔ hɔ a wɔfrɛ no nnuho a ɔma hɛn kwan ma yɛpepa hɛn mu hard drive no fi dza wɔabɔ apetse a ɔyɛ adzesoa ma hɛn akoma no. Ɔnam Jesus Christ No nwanwa na mbɔbɔrhu Werdambɔ no do, asɛmpa no kyerɛ hɛn kwan a yɛmfa do ntsew hɛn akra mfi bɔn nkekaa ho na yɛmbɛyɛ fofor bio a, hɛnho ntsew na yɛnyɛ dɛ mbofra a yennyim hwee.
Mbom ɔtɔfabi a ndzɛmba binom twe hɛn ekyir ma yɛyɛ nyaa a, ɔma adwendwen nye ndzeyɛɛ a mfaso nnyi ho a ɔma ɔyɛ dzen ma hɛn dɛ yɛbɛma hɛn mu do.
Yɛrefa Hɛn Tam Pa Efura
Yɛreyɛ botae yɛ dwumadzi a ɔyɛ mfaso. Yenyim dɛ hɛn Ɔsor Egya wɔ botae osiandɛ Ɔakã akyerɛ hɛn dɛ No ndwuma na N’enyimnyam nye “dɛ [Ɔ]dze nyimpa ne bɛkyebo na onnyiewiei nkwa bɔbɔ adze” (Moses 1:39).
Hɛn ankorankor botae botum ama yɛaafa hɛn tam pa efura. Mbom, mbɔtohɔ yɛ adze kor a ɔbɛsɛɛ hɛn mbɔdzembɔ a yɛyɛ na yesie ndzeyɛɛ a yɛahyɛ dɛ yɛbɛyɛ. Ɔtɔfabi a yɛtweɔn ana yɛama hɛn mu do, yɛtweɔn ber pa a yɛdze bɛhyɛ ase —afe fofor ne da a odzi kan no, ɔhewber ahyɛse no, sɛ wɔafrɛ hɛn dɛ bishop anaa Relief Society president, mbofra akɔ skuul, yɛapon edwuamayɛ ekyir no ana.
Nnhia ɔfrɛɛ ana ama wo mu do dze etsiw wo tsenenee botae. Nnhia dɛ etweɔn ma wɔma wo kwan ana abɛyɛ nyimpa a wɔahyehyɛ dɛ ebɛyɛ no. Nnhia dɛ etweɔn ma wɔto nsa frɛ wo dɛ bɔsom wɔ Asɔr no mu.
Ɔtɔfabi a yebotum ahwer hɛn abrabɔ mu mfe pii a yɛrotweɔn ma wɔasan mu eyi hɛn (hwɛ D&C 121:34–36). Eso ɔno yɛ ator ngyinado. Wɔasan mu eyi wo dada!
M’abrabɔ mber bi mu no mahwer anafua a munntum nnda dze adwendwen nsɛmsɛm ho, ɔhaw anaa mankasa m’awerɛhow ho. Mbom sɛ anafua no sum fua dɛnara a, dɛm adwen yi ma me nkuranhyɛ daa dɛ: anapawi no bopue.
Da forfor biara, adzekyee fofor no —mmba mma asaase no nko mbom ɔba ma hɛn so. Na da fofor dze ahyɛse fofor ba —kwan a yebotum dze ahyɛ ase bio.
Na Sɛ Yedzi Nkõgu ɛ?
Ɔtɔfabi a ndzɛmba a osuo hɛn ekyir nye suro. Bia yebosuro dɛ yennkedzi konyim, dɛ yebedzi konyim, dɛ yɛbɛfɛr, dɛ konyimdzi botum asesã hɛn, anaa ɔbesesã nkorɔfo a yɛdɔ hɔn no.
Na ntsi yɛtweɔn. Anaa yɛpa da.
Adze kor so a ohia dɛ yɛkaa ber a yɛreyɛ botae nye iyi: Mbrɛ ɔbɛdan biara no yebedzi nkõgu —annyɛ yie koraa no enyimenyim yi. Mbom nkyɛ yebenya abagura no, ntseasee yi dɛ onnhia ketsee dɛ yebedzi mu seisie no botum ahyɛ hɛn dzen. Iyi gye to mu ahyɛse noara dɛ ber bi mu no, yebotum atɔ sin. Yehu iyi ntsɛm no yi nkõgu no mpofirmuyɛ na abagura ne kɛse fi hɔ.
Sɛ yɛfa kwan yi do yɛ hɛn botae a, nkõgu nnsiw hɛn kwan. Hom nkaa, sɛ yenntum mpo ennkodu hɛn botae a ɔkrɔn no ntsɛmara mpo a, nna yɛakɔ kan ara yie wɔ kwan a ogya kɔ hɔ no.
Na ɔno hia a— ɔma ntseasee yie.
Sɛ yennkodu hɛn akwantu n’ewiei mpo a, yɛawɔw akwantu no do noara bɛma yetu mpon akyɛn mbrɛ nna yɛtse no.
Seisie Nye Ber Pa a Edze Bɛhyɛ Ase
Tsetse abɛbu bi se, “Ber pa a wɔdze dua edua nye mfe 20 a ɔabɛsen no. Ber pa a-otsĩa ebien nye seisei.
Nsɛmfua seisei wɔ adze nwanwa bi na ɔma enyidado. Sɛ yɛsan mu dɛ yɛbɔbɔ adwenpɔw seisei a, ɔdze tum bi hyɛ hɛn a, yebotum akɔ kan ber yi ara mu.
Seisei nye ber pa a edze bɛhyɛ ase abɛyɛ nyimpa a ewiei no ebɛpɛ dɛ iyɛ —nnyɛ mfe 20 fi seisie mbom afebɔɔ nyinara so.
© 2014 Intellectual Reserve, Inc. Wɔakora do tumdzi nyina USA na wotsintsimii. Ngyirisi kasa ho mpendo: 6/13. Nkyereasee ho mpendo: 6/13. First Presidency Message, January 2014. Fante.10861 502 ne nkyerɛasee
Erekyerɛkyerɛ efi Amandzɛɛbɔ Yi Mu
President Uchtdorf akyerɛkyerɛ mu dɛ sɛ yenntum ekodu hɛn botae ho a, “tum botum ahyɛ hɛn. … sɛ yennkodu hɛn akwantu n’ewiei mpo a, yɛawɔw akwantu no do noara bɛma yetu mpon akyɛn mbrɛ nna yɛtse no.“ Bisa ebusua mu mba no ma wɔnkyɛ sũahu a woenya a woesũa efi nhyehyɛɛ kwan no akyɛn woesũa efi dza okowiei no mu, tse dɛ erewie skuul anaa irinya abawdobɔ.