iTukutuku ni Mataveiliutaki Taumada, Janueri 2014
Na Gauna Vinaka Duadua ni Tei Kau
Mai Roma makawa, e kilai o Janus ni kalou ni ivakatekivu. E dau vakaraitaki o koya me rua tiko na matana—e dua me raicalesu na veika sa yaco oti, kena ikarua me rai kiliu ki na veika se bera ni yaco mai. E so na vanua era vakatokayacataka na vula o Janueri vei koya, baleta ni itekivu ni yabaki e gauna ni navunavuci kei na vakavakarau.
Ena vica na udolu na yabaki e muri, era sa qai cakava e so na vanua me ra tekivutaka e dua na itovo me sa gauna ni navunavuci ni yabaki vou. Dina sara ni ka rawarawa na navunavuci—ia na kena laki cakacakataki sa duatani tale na italanoa.
Dua na tamata ka sa vola e dua na lisi balavu ni navunavuci ni Yabaki Vou sa vakila na vinaka ni nona sa toso. Sa qai vakasamataka, “Au sa dei toka ena noqu ivakarau ni kana, au sa sega vakadua ni bau cudru, au sa maninitaka na noqu ituvatuva ni ilavo, ka sa bera vakadua niu vosacataka na nona koli na wekaqu. Ia, nikua na ika 2 ni Janueri, ka se qai taqiri ga oqo na alamu, ka sa kena gauna meu sa duri mai na noqu idavodavo. Sa na vaka na caka mana me na toso tikoga na ka au sa tekivutaka.”
Tekivu Vou Tale
E tiko e dua na ka e rawa ni vakanuinuitaki kevaka me dua tale na tekivu vou. Au nanuma ni na rairai dua na gauna ena ganita meda na tekivutaka vou tale e dua na itosotoso.
Au taleitaka ni dua na noqu komupiuta vou ka vou kece na kena gacagaca. Ni sa toso na kena vakayagataki e cakacaka vakavinaka sara. Ni sa toso na macawa kei na vula ni kena vakayagataki tiko ka sa levu cake na parokaramu e biu e loma ni komupiuta (eso e nakiti ka so e sega), sa tekivu me sa tatao na kena cakacaka, kei na veika e dau totolo na kena qaravi sa tekivu me berabera sara. Ena so na gauna sa sega sara ga ni cakacaka. Na kena sagai me yavalati sa tadre sara ga ni sa sinai tu ena kena taqe na veimataqali itukutuku kecega e sa vakasokumuni tu kina. Ena so na gauna, sa kena iwali duadua ga me sogo ka qai dolavi vou tale me cakacaka kina.
Na tamata sara ma da ga ena rawa ni vakasinaiti tu vaka o ya ena rere, lomalomarua, kei na lomaleqataki ni cakacala. Na cala eda sa cakava oti (nakiti se sega ni nakiti) ena rawa ni vakalomaleqataki keda me yacova ni sa na dredre me caka na ka eda kila ni rawa meda cakava.
Ena vuku ni ivalavala ca, e tiko e dua na ituvatuva maqosa sara ka vakatokai na veivutuni, ni na vakadonuya meda vagalalataka na noda taqe ena kena sa sinai tu ena icolacola bibi ni yaloda. Ena mana kei na loloma cecere ni Veisorovaki i Jisu Karisito, sa vakatavuvulitaka na kosipeli na kena rawa ni vakasavasavataki mai yaloda na duka ni ivalavala ca ka vakavoui, vakasavasavataki sara, ka bula galala me vaka e dua na gonelailai.
Ia, ena so na gauna dau yaco e so na ka dau vakaberai keda ka dreti keda ki muri, me vakavuna na vakasama sega ni vinaka kei na ivalavala dau vakavuna na dredre ni noda tekivu.
Meda Sasaga Meda Tamata Yaco
E ka yaga sara na navunavuci Eda kila na Tamada Vakalomalagi e tu na nona navunavuci baleta ni o Koya sa tukuna oti vei keda ni Nona cakacaka kei na Nona lagilagi “me ra tucake tale mai na mate na tamata kecega ka rawata na bula tawamudu” (Mosese 1:39).
Na noda navunavuci ena vakavuna meda na sasagataka meda na vinaka sara. Ia, e dua na ka ena kauti keda sobu, mai na noda via cakava na veika eda sa navuca sa ikoya na lokuyara. Ena so na gauna eda na tarova na tekivu ni da waraka na gauna donu ni tekivu—na imatai ni siga ni dua na yabaki vou, na itekivu ni vula ikatakata, na gauna eda tekivu kacivi kina vaka- bisopi se peresitedi ni iSoqosoqo ni Veivukei ni ra sa laki vuli kece na gone, se na gauna eda sa vakacegu kina mai na cakacaka.
Ko na sega ni gadreva e dua na veisureti mo qai tekivu toso yani ki na navunavuci ko sa na vakarau cakava. Ko na sega ni via waraka e dua na veivakadonui mo na qai vakataka na tamata ko a buli mai mo veiucui kaya. Ko na sega ni via waraka mo sureti mo veiqaravi ena Lotu.
E dau rawa ni da vakaotia wale tu ga e vica na yabaki ni noda bula ni da waraka tiko na veidigitaki (raica na V&V 121:34–36). Ia, o ya e dau veivakacalai. Ko sa digitaki oti tu!
Ena so na gauna au dau moce vakaca niu dau vakasamataka e so na ka, na lomaleqa se yalorarawa. Ia, ena sega soti ni dua na ka kevaka me buto sara na bogi, au dau vakauqeti tu ga ena vakasama oqo, ni ena mataka ena cabe dina ga mai na siga.
Ena veisiga vou ena basika kina e dua na malawa ni mataka—sega walega me baleta na vuravura, ia e sa baleti keda sara ga. Ni sa dua na siga vou sa na lako vata mai na itekivu vou—dua na madigi ni tekivu vou tale.
Ia, Vakacava Kevaka Meda na Sega ni Rawata?
Ena so na gauna e dau tarovi keda na yalotaqaya. Eda rerevaka beka ni da na sega ni rawata, ni da na rawata, ni da na vakamaduataki, ni rawa-ka ena veisautaki keda, se ena veisautaki ira na tamata eda dau lomani ira.
Eda sa qai mai waraka tu yani. Se eda sa qai vakanadakuya.
Dua tale na ka meda nanuma ni da sa navunavuci: Ni da na rawa ni sega ni rawata—ena dua gauna lekaleka. Ia, meda kakua ni vakayalolailaitaki, sa na rawa ni da na vaqaqacotaki baleta ni veika eda kila ena vakaseyavutaka na vakanananu ni vinaka sara ena gauna oqo. Ena vakadeitaka mai na itekivu ni na yaco ena dua na gauna meda na sega ni rawata na veika e navuci. Ni sa dau kilai rawa tu na veika vakaoqo e dau rawarawa kina na kena sotavi na veika e dau yaco vakasauri ka na vakavuna na sega ni rawa-ka.
Ni vakaoqo na noda qarava na noda navunavuci ena sega ni vakayalolailaitaki keda na sega ni rawa-ka. Nanuma ga ni sa sega ni rawati na veika e namaki me na rawati, meda nanuma ni sa yaco e so na ka me vakarautaki keda meda na laki yacova na kena iyacoyaco.
O ya na ka bibi—ena vakaibalebale sara vakalevu.
Dina ni na sega beka ni yacovi yani na itinitini ni ilakolako, na nomu saga mo vakaotia na nomu ilakolako ena vakataucokotaki keda sara vakalevu.
Na Gauna Vinaka Duadua ni Tekivu Oqo
Dua na ivosavosa e dau vakaoqo, “Na gauna vinaka duadua me tei e dua na vunikau ena 20 na yabaki sa oti. Na kena ikarua ni gauna, oqo.”
E dua na ka e talei ka vakanuinuitaki kina na vosa oqo. E dua na ka e veivaqaqacotaki ena kena vakayagataki na vosa e dai ni kevaka meda sa tekivu sara ga oqo eda sa na toso ki liu ena gauna sara ga oqo.
Oqo na gauna vinaka duadua me tekivu kina na noda saga meda vaka na tamata eda vinakata meda veiucui—sega ni loma ni 20 na yabaki mai oqo ia me yacova na tawamudu.
© 2014 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/13. Vakadonui me vakadewa: 6/13. Vakadewa ni First Presidency Message, January 2014. Fijian. 10861 858
Veivakavulici mai na iTukutuku Oqo
Vakamacalataka o Peresitedi Uchtdorf ni sa sega ni rawati na ka e navuci, “eda na rawa ni vaqaqacotaki. … Dina ni na sega beka ni yacovi yani na itinitini ni ilakolako, na nomu saga mo vakaotia na nomu ilakolako ena vakataucokotaki keda sara vakalevu.” Kerei ira na lewe ni matavuvale mera wasea na veika era sotava ka ra vuli vakalevu cake kina mai na ka e vakayacori mai na nodra vuli ena vuana me vaka na kena rawa e dua na sitivikiti mai koronivuli se na rawati ni dua na icovi.