iVaqa ni Veisiko, Janueri 2014

Na iTavi Vakalou i Jisu Karisito: iVakaraitaki

Vulica ena masumasu na itukutuku oqo ka vaqara mo kila na ka mo na wasea. Ena vakalevutaka vakacava na nomu vakabauti Koya ka vakalougatataki ira o sikovi ira tiko ena nomu veisiko na nomu kila na ituvaki kei na inaki ni bula ni iVakabula? Me ikuri ni itukutuku, lako ki na reliefsociety.lds.org.

Vakabauta, Matavuvale, Veivukei

Oqo e dua na tiki ni iVaqa ni Veisiko veitaravi ka na vakaliuci tiko kina na itavi ni iVakabula.

Ni da sa kila ni o Jisu Karisito na noda ivakaraitaki ena ka kecega, sa na rawa ni vakalevutaki kina na noda gagadre meda na muri Koya. E sinai tu ena ivolanikalou na veivakayarayarataki meda rawa kina ni muria na mawe ni yava i Karisito. Tukuna o Karisito vei ira na Nifai, “Na ka kecega dou sa raica niu sa kitaka mo dou kitaka talega” (3 Nifai 27:21). E kaya vei Tomasi ko Jisu, “Oi au na sala, kei na vu-ni-dina, kei na vu-ni-bula, sa sega ni torovi Tamaqu walega e dua na tamata, ena vukuqu ga” (Joni 14:6).

Nikua era sa vakananumi keda tiko na noda iliuliu meda taura na iVakabula me noda ivakaraitaki. O Linda K. Burton, na peresitedi raraba ni iSoqosoqo ni Veivukei e kaya, “Ni sa ceuti tu e lomada na ivunau ni Veisorovaki sa na qai rawa me da yaco me vaka na tamata e vinakata na Turaga me da veiucui kaya.”¹

O Peresitedi Thomas S. Monson e kaya, “Na noda Turaga ka iVakabula o Jisu Karisito, sa noda iVakaraitaki ka ivurevure ni kaukauwa.”²

Meda sa digitaka meda toso voleka vei Jisu Karisito, meda muria na Nona ivakaro ka sasaga meda lesu tale vua na Tamada Vakalomalagi.

Mai na iVolanikalou

2 Nifai 31:16; Alama 17:11; 3 Nifai 27:27; Moronai 7:48

Mai na Keda iTukutuku Makawa

“E toqa na kena sala ka liutaka na ilakolako,” e a vola o Eliza R. Snow, na ikarua ni peresitedi raraba ni iSoqosoqo ni Veivukei, me baleta na veivakalotutaki i Jisu Karisito.³ E a qaravi ira yadudua—oti e dua qai dua tale. E vakavulica meda biuta tu na ciwasagavulu kaciwa ka laki vakabula mai na dua ka sa lakosese (raica na Luke 15:3–7). E veivakabulai ka veivakavulici yadudua, ena nona taura sara ga na gauna me baleta na tamata yadua vei ira na lewe 2,500 (raica na 3 Nifai 11:13–15; 17:25).

E tukuna o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada, baleti ira na marama Yalododonu Edaidai: “O kemuni na marama vakasakiti o ni dau solia na veiqaravi ena yalololoma sega na ka me uasivia vei ira na tani. Ena ka oqo ko ni sa vakamuria sara tikoga kina na iVakabula. … Na Nona vakasama sa tiko voli ga ena nodra vukei na tani.”⁴

© 2014 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/13. Vakadonui me vakadewa: 6/13. Vakadewa ni Visiting Teaching Message, January 2014. Fijian. 10861 858

iDusidusi

1. Linda K. Burton, “E Volai Tu Beka e Yaloda na Vakabauta ni Veisorovaki i Jisu Karisito?” Ensign se Liaona, Nove. 2012, 114.

2. Thomas S. Monson, “Meeting Life’s Challenges,” Ensign, Nove. 1993, 71.

3. “Dokai na Vuku kei na Loloma,” Serenilotu, naba 101.

4. Dieter F. Uchtdorf, “Na Marau, Na Nomu iVotavota,” Ensign se na Liaona, Nove. 2008, 120.

Na Cava e Rawa Niu Cakava?

1. Cava na vuna ka na caka vakacava me na noqu ivakaraitaki kina o Jisu Karisito?

2. Ena vukei au vakacava meu muria na iVakabula na noqu dau qaravi ira tiko na marama au sikovi ira?