Mesaj Premye Prezidans lan, Janvye 2014
Pi bon moman pou Plante yon pyebwa
Nan ansyen Rome nan, Janus sete bondye kòmansman yo. Yo te konn souvan dekri li avèk de figi—youn k ap gade dèyè nan lepase, lòt la ap gade devan nan lefiti. Gen kèk lang kote yo bay mwa Janvye a non li paske kòmansman ane a sete yon tan refleksyon osibyen ke yon tan planifikasyon.
Dè milye ane apre, anpil kilti atravè mond lan gen yon tradisyon ki se pran rezolisyon pou nouvèl ane a. Natirèlman, pran rezolisyon se bagay ki fasil—kenbe yo se yon bagay trè diferan.
Yon mesye ki te fè yon lis rezolisyon byen long pou Nouvèl Ane a te santi l satisfè de pwogrè li. Nan tèt li, li te di: “Jiskamentnan, mwen kenbe rejim mwen an, mwen pa fè kòlè, mwen viv selon bidjè mwen, e pa yon fwa m pa plenyen poutèt chyen vwazen an. Men jodia se 2 Janvye e revèy la fèk sonnen e li lè pou m leve nan kabann mwen. Sa pral mande yon mirak pou m kontinye suiv tout bi m yo.
Rekòmanse
Gen yon bagay ki bay espwa anpil nan pran yon nouvo depa. Mwen sipoze yon lè oswa yon lòt, nou tout te anvi pran yon nouvo depa avèk eta pwòp.
Mwen renmen gen yon nouvo konpitè ki gen yon andedan tou nèf. Pandan yon tan, li mache pafètman byen. Men amezi jou ak semèn ap pase e n ap enstale plis an plis pwogram sou li (kèk entansyonèlman, kèk pa si entansyonèl), konpitè a finalman kòmanse ralanti epi bagay li te konn fè byen vit yo ak efiksaman yo vin ralanti tou. Pafwa li sispann mache. Menm fè l derape kapab vin yon bagay difisil lè andedan li ankonbre avèk pil bagay ak debri elektwonik. Pafwa sèl resous nou genyen se refòmate konpitè a epi rekòmanse ankò.
Menmjan an tou, kretyen vivan kapab vin ankonbre avèk laperèz, dout, ak gwo kilpabilite byen lou. Erè nou fè yo, (ni entansyonèl ni san entansyon), kapab peze lou sou nou jiskaske li parèt difisil pou nou fè sa nou konnen nou ta dwe fè yo.
Nan ka peche, gen yon bèl pwosesis pou refòmate ki rele repantans, ki pèmèt nou netwaye andedan nou pou retire debri ki chaje kè nou yo. Levanjil la, atravè Ekspyasyon mirakile ak plen konpasyon Jezikri a, montre nou fason pou nou netwaye nanm nou soti anba tach peche epi vin retounen pi, nouvo ankò, osi inosan ke yon timoun piti.
Men pafwa, gen lòt bagay ki ralanti nou e ki kenbe nou dèyè, ki lakoz panse ak aksyon pa pwodiktif ki rann ni difisil pou nou pran yon nouvo depa.
Fè resòti sa ki pi bon nan nou an
Fikse bi se yon bagay ki diy. Nou konnen Papa nou ki nan Syèl la gen bi paske li di nou ke travay li ak laglwa li se “reyalize imòtalite ak lavi etènèl lòm” (Moyiz 1:39).
Bi pèsonèl nou kapab fè resòti sa ki pi bon nan nou an. Sepandan, youn nan bagay ki detounen efò nou nan pran ak kenbe rezolisyon se ranvwaye bagay yo pou demen. Nou pafwa ranvwaye rekòmanse a, kote n ap tann bon moman an pou nou kòmanse—premye jou nouvèl ane a, kòmansman ete, lè yo aple nou kòm evèk oswa kòm prezidant Sosyete Sekou, lè timoun yo kòmanse al lekòl, lè nou pran retrèt nou.
Nou pa bezwen yon envitasyon pou nou kòmanse derape al nan direksyon bi ki jis. Nou pa bezwen tann pèmisyon pou nou vin moun nou te deziyen pou n ye a. Nou pa bezwen tann yo envite nou pou n sèvi nan Legliz la.
Pafwa nou ka pèdi dèzane nan lavi nou ap tann pou yo chwazi nou (gade D&A 121:34–36). Men sa se yon fo pretèks. Nou deja chwazi!
Pafwa nan lavi m, mwen konn pase plizyè nuit san somèy, ap panse ak kesyon, pwoblèm, oswa regrè pèsonèl. Men kèlkeswa nwa lannuit la nwa, mwen toujou jwenn ankourajman nan panse sa a: nan maten, solèy la ap leve.
Avèk chak nouvo jou, gen yon nouvo douvanjou ki vini—non sèlman pou tè a men pou nou tou. Epi avèk chak nou vo jou gen yon nouvo depa ki vini—yon chans pou nou rekòmanse.
Men e si nou echwe?
Pafwa sa ki kenbe nou dèyè a se laperèz. Nou gen dwa pè pou nou pa reyisi, pè ke n ap reyisi, ke nou kapab anbarase, ke siksè a kapab chanje nou, oubyen li kapab chanje moun bò kote nou.
Epi konsa, nou tann. Oubyen nou lage sa.
Yon lòt bagay nou bezwen sonje nan zafè fikse bi sèke l prèske sèten ke n ap echwe—omwen pou yon ti bout tan. Men, olye nou dekouraje, nou kapab vin pi fò paske konpreyansyon sa a retire presyon ki sou nou pou n vin pafè kounyeya. Depi nan kòmansman, yo te rekonèt ke yon moman oswa yon lòt, nou riske pou nou echwe. Lefèt ke nou konnen bagay sa a depi n ap kòmanse a, sa ap retire anpil nan sipriz ak dekourajman echèk la.
Lè nou fikse bi nou yo nan fason sa a, echèk pa dwe limite nou. Sonje, menmsi nou echwe nan atenn destinasyon final nou vle a toutsuit, n ap fè pwogrè toutolon wout ki mennen ladan l lan.
E sa konte—sa konte anpil.
Menmsi nou kapab depase liy rive a, jis kontinye vwayaj la ap fè nou vin pi gran pase nou te ye anvan.
Pi bon tan pou kòmanse a se kounyeya
Gen yon pwovèb ki di: “Pi bon tan pou plante yon pyebwa se 20 ane desa. Dezyèm pi bon tan an se kounyeya.”
Gen yon bagay mèveye ak plen espwa nan mo kounyeya. Gen yon bagay puisan nan lefèt ke si nou chwazi pou n deside kounyeya, nou ka ale annavan nan moman sa a menm.
Kounyeya se pi bon moman pou nou kòmanse vin moun nou finalman vle ye a—non sèlman 20 ane apati jodia men pou tout letènite tou.
© 2014 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/13. Apwobasyon tradiksyon: 6/13. Tradiksyon First Presidency Message, January 2014. Haitian. 10861 036
Ansèyman nan Mesaj Sa a
Prezidan Uchtdorf te eksplike ke lè nou echwe nan atenn bi nou yo, “nou ka jwenn pouvwa. Menmsi nou kapab depase liy rive a, jis kontinye vwayaj la ap fè nou vin pi gran pase nou te ye anvan. Mande manm fanmi w ap vizite a pou yo pataje eksperyans kote yo te aprann plis nan pwosesis sa a pase yo te aprann nan rezilta a, tankou diplome nan lekòl oswa resevwa yon rekonpans.