Mensahe sang Unang Panguluhan, Enero 2014
Ang Pinakamaayo nga Tion sa Pagtanom sang Kahoy
Sa dumaan nga Roma, si Janus amo ang dios sang mga panugod. Masami sia ginalaragway nga may duha ka guya. Ang pila ka mga lenggwahe naghingalan sang bulan sang Enero (January) sunod sa iya tungod ang panugod sang tuig isa ka tion sang pagpamalandong kag amo man sang pagplano.
Pagligad sang linibo ka tuig, madamo nga mga kultura sa bilog nga kalibutan ang nagapadayon sa paghimo sang mga panaad sa pagbag-o sang kaugalingon sa bag-ong tuig. Siyempre, ang paghimo sang mga panaad mahapos lang— ang pagtuman sang mga ini lain naman nga istorya.
Isa ka tawo nga naghimo sang malawig nga listahan sang mga panaad sa Bag-ong Tuig ang nalipay sa iya pag-uswag. Siling niya sa iya kaugalingon, “Asta subong, nasunod ko ang akon plano sa pagdieta, wala ako nakapangakig, nasunod ko ang akon badyet, kag wala pa gid bisan kis-a nga nagreklamo parte sa ido sang tupad-balay. Pero subong Enero 2 kag ang alarm bag-o lang gid nagbagting kag tion na nga magbangon ako. Magakinahanglan sang milagro agud padayon ko nga lab-uton ang akon mga katuyuan.”
Pagsugod Liwat
May tuman ka daku nga paglaum nga nagaupod sa bag-o nga panugod. Nagapati ako nga nakaagi kita tanan sang tinion sa aton kabuhi nga luyag naton magsugod halin sa puno.
Nanamian ako manag-iya sang isa ka computer nga may matinlo nga hard drive. Sa makadali nagaandar ini sing maayo. Pero sa pagligad sang mga inadlaw kag sinemana kag sa padayon nga pagdamo sang mga programa nga ginasulod diri (ang iban sini hungod, ang iban indi), sa ulihi ang computer magabisyo, kag ang mga butang nga sang una mahimo pa sini sing madasig kag epektibo, magahinay na. Kon kaisa indi na gid gani ini mag-andar. Bisan ang pagpaandar sini mabudlay na kon ang hard drive mapuno sang witi-witi nga mga kay-ag kag electronic nga mga sagbot. May mga tinion nga ang nabilin na gid lang nga solusyon amo ang i-reformat ang computer kag magsugod liwat.
Ang mga tawo mahimo man nga mapuno sang mga kay-ag sang kahadlok, pagpangduhaduha, kag mabug-at nga konsensya. Ang mga kasaypanan nga aton nahimo (alangay hungod kag indi hungod) makapabug-at sa aton tubtob nga mangin daw mabudlay ang paghimo sang mga butang nga nahibal-an naton nga nagakadapat.
Sa kaso sang sala, may manami nga proseso sang pag-reformat nga ginatawag paghinulsol nga nagatugot sa aton nga matinloan ang aton pangsulod nga mga hard drive sang mga kay-ag nga nagapabug-at sa aton mga tagipusuon. Ang ebanghelyo, paagi sa milagroso kag maluluy-on nga Pagpasag-uli ni Jesucristo, nagapakita sa aton sang paagi nga matinloan ang aton mga kalag sang mga mantsa sang sala kag sa liwat mangin bag-o, putli, kag inosente kasubong sang isa ka bata.
Ugaling kon kaisa may iban pa nga mga butang nga nagapahinay kag nagapugong sa aton, nga ginatunaan sang indi maayo nga mga panghuna-huna kag mga buhat nga nagapabudlay sang aton pagsugod liwat.
Pagpatigayon sa Pagpalutaw sang Pinakamaayo sa Aton
Ang pagpahamtang sang mga katuyuan isa ka dalayawon nga buluhaton. Nakahibalo kita nga ang aton Amay nga Langitnon may mga katuyuan tungod nagsiling Sia sa aton nga ang Iya buluhaton kag himaya amo ang “pagpatuman sang imortalidad kag kabuhi nga wala’y katapusan sang tawo” (Moses 1:39).
Ang aton personal nga mga katuyuan makapalutaw sang pinakamaayo sa aton. Ugaling, isa sang mga butang nga naga-upang sang aton mga pagpaninguha nga maghimo kag magtipig sang mga panaad amo ang pagpabuyan-buyan. Kon kaisa ginapaiway naton ang pagsugod, nga nagahulat sang husto nga panahon para mag-umpisa—sa una nga adlaw sang isa ka bag-ong tuig, sa pagsugod sang tig-ilinit, kon matawag na kita bilang bishop ukon pangulo sang Relief society, kon nagaeskwela na ang mga kabataan, sa aton pagretiro.
Indi na ninyo kinahanglan sang pagpangagda antes kamo magsugod sa pagsulong sa direksyon sang inyo matarong nga mga katuyuan. Indi na ninyo kinahanglan nga maghulat sang pahanugot agud mangin ang tawo nga dapat kamo mangin. Indi na ninyo kinahanglan maghulat nga agdahon agud mag-alagad sa Simbahan.
Kon kaisa mahimo naton usikan ang tinuig sa aton mga kabuhi sa paghulat agud pilion(tan-awa sa D&C 121:34–36). Pero isa ina ka sayop nga pagpati. Ginpili na kamo!
May mga tinion sa akon kabuhi nga indi ako makatulog sa pagkabalaka sa mga problema, mga libog, ukon personal nga mga kalisod. Pero bisan ano pa kadulom sang gab-i, ginapaisog ako sang sini nga pamensaron: pagkaaga ang adlaw magabutlak.
Sa tagsa ka bag-o nga adlaw, isa ka bag-o nga kasanag ang nagaabo—indi lang sa duta kundi pati man sa aton. Kag sa tagsa ka bag-o nga adlaw nagaabot ang isa ka bag-o nga panugod —isa ka kahigayunan nga mag-umpisa liwat.
Pero Paano Kon Mapaslawan Kita?
Kon kaisa ang nagapugong sa aton amo ang kahadlok. Mahimo nga hadlokan kita nga mapaslawan kita, nga magmadinalag-on kita, nga mahuy-an kita, nga bag-uhon kita sang kadalag-an, ukon nga basi bag-uhon sini ang mga tawo nga aton ginapalangga.
Kag gani nagahulat kita. Ukon nagaampo.
Ang isa pa gid nga kinahanglan naton dumdumon parte sa pagpahamtang sang mga katuyuan amo ini: Halos segurado nga mapaslawan kita—bisan sa makadali lang. Pero imbis nga talawan kita, sarang kita mapaisog bangud ini nga paghangop nagahukas sang kabug-at nga mangin perpekto sa gilayon. Ginakilala sini halin sa umpisa nga may panahon sa aton mga kabuhi, nga mahimo kita mapaslawan. Ang paghibalo sini sing temprano pa nagahukas sang daku nga bahin sang kakibot kag kasubo sang pagkapaslaw.
Kon amo sini ang aton pagkabig sang aton mga katuyuan, ang kapaslawan indi dapat magpugong sa aton. Dumduma, nga bisan pa indi naton malab-ot ang aton pinakamataas, ginahangad nga handum sa gilayon, makaamat-amat na kita usad sa alagyan nga nagapadulong diri.
Kag importante ina—importante gid.
Bisan pa nga indi gid naton malab-ot ang aton finish line, ang pagpadayon lang mismo magahimo sa aton nga mas maayo sangsa primero.
Subong ang Pinakamaayo nga Panahon sa Pagsugod
Ang dumaan nga hulubaton nagasiling, “Ang pinakamaayo nga tion sa pagtanom sang isa ka kahoy amo ang 20 ka tuig na ang naligad. Subong ang madason-nga-pinakamaayo nga tion”.
May ara sang tanhaga kag paglaum sa tinaga nga subong. May pagpaisog sa kamatuoran nga kon pilion naton nga magpamat-od subong, sarang kita makasulong subong gid dayon.
Subong na ang pinakamaayo nga tion sa pagsugod nga mangin ang tawo nga luyag naton mangin—indi lamang 20 ka tuig gikan karon kundi pati man sa katubtuban.
© 2014 by Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Linubad sang First Presidency Message, January 2014. Hiligaynon. 10861 861
Pagtudlo gikan sa Sining Mensahe
Si Pangulong Uchtdorf nagpaathag nga kon mapaslawan kita sa paglab-ot sang aton mga katuyuan, “sarang kita mapaisog. … Bisan pa nga indi naton malab-ot ang finish line, ang pagpadayon lang mismo sa pagpanglakaton magahimo sa aton nga mas maayo sangsa sang primero.” Pangabaya ang mga miyembro sang pamilya nga magpaambit sang mga eksperiyensya sa diin mas daku ang ila natun-an gikan sa pamaagi sangsa resulta, pareho sang pagtapos sang pag-eskwela ukon pagbaton sang award.