Mensahe sa Visiting Teaching, Enero 2014

Ang Langitnon nga Misyon ni Jesucristo: Ehemplo

Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sa kabuhi kag misyon sang Manluluwas makapadugang sang inyo pagtuo sa Iya kag makabugay sang inyo mga ginaalagaran paagi sa visiting teaching? Para sa dugang nga impormasyon, mag-log on sa reliefsociety.lds.org.

Pagtuo, Pamilya, Bulig

Ini amo ang una sang sunod-sunod nga mga Mensahe sa Visiting Teaching nga nagapakita sang mga aspeto sang misyon sang Manluluwas.

Sa aton paghangop nga si Jesucristo amo ang aton ehemplo sa tanan nga mga butang, madugangan naton ang aton kaluyag nga sundon Sia. Ang balaan nga mga kasulatan puno sang mga pagpaisog sa aton agud sundon ang mga tikang ni Cristo. Sa mga Nefinhon, si Cristo nagsiling, “Kay ang mga buluhaton nga inyo nakita nga ginahimo ko, ina amo man ang inyo himuon” (3 Nefi 27:21). Sa kay Tomas, si Jesus nagsiling, “Ako amo ang dalan, kag ang kamatuoran, kag ang kabuhi: wala’y nagaabot sa Amay, kundi paagi sa akon.” (Juan 14:6).

Sa karon ang aton mga lideres nagapahanumdum sa aton nga ipahamtang ang Manluluwas bilang aton ehemplo. Si Linda K. Burton, pangkabilogan nga pangulo sang Relief Society, nagsiling, “Kon ang doktrina sang Pagpasag-uli nagatudok sing madalom sa tagsa naton ka mga tagipusuon, magasugod kita nga mangin ang sahi sang mga tawo nga luyag sang Ginuo nga kita mangin.”¹

Si President Thomas Monson nagsiling, “Ang aton Ginuo kag Manluluwas, si Jesucristo, amo ang aton Halimbawa kag aton kabakod.”²

Mangin malig-on kita sa aton desisyon nga magpalapit kay Jesucristo, magtuman sang Iya mga kasuguan, kag magtinguha sa pagbalik sa aton Amay nga Langitnon.

Gikan sa Balaan nga mga Kasulatan

2 Nefi 31:16; Alma 17:11; 3 Nefi 27:27; Moroni 7:48

Gikan sa Aton Kasaysayan

“Ginpakita Niya ang alagyan kag ginpangunahan” sulat ni Eliza R. Snow, ika-duhang pangkabilogan nga pangulo sang Relief Society, parte sa dutan-on nga pag-alagad ni Jesucristo.³ Nag-alagad Sia sa mga tawo—sing tinag-isa isa. Nagpanudlo Sia nga dapat naton bayaan ang kasiaman kag siyam agud maluwas ang isa nga nagtalang (tan-awa sa Lucas 15:3–7). Nagpang-ayo Sia kag nagpanudlo sa mga tawo, bisan pa naghinguyang sang tion para sa kada isa sa kadam-an sang 2,500 ka tawo. (tan-awa sa 3 Nefi 11:13 15; 17:25)

Parte sa mga babayi sa Ulihing-mga Adlaw, si Uchtdorf Ika-duhang Manuglaygay sa Unang Panguluhan, nagsiling: “Kamo nga dalayawon nga mga sisters nagahatag sang maluluy-on nga pag-alagad para sa iban sa mga rason nga labaw pa sangsa mga handum para sa personal nga mga kaayuhan. Sa sini ginasunod ninyo ang Manluluwas. … Ang Iya panghunahuna pirme gid natuon sa pagbulig sa iban.”⁴

© 2014 by Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Linubad sang Visiting Teaching Message, January 2014. Hiligaynon. 10861 861

Mga Tanda

1. Linda K.Burton, “Is Faith in the Atonement of Jesus Christ Written in Our Hearts?” Ensign ukon Liahona,Nob. 2012, 114.

2. Thomas Monson, “Meeting Life’s Challenges,” Ensign,Nob. 1993, 71.

3. “How Great the Wisdom and the Love,” Hymns, no. 195.

4. Dieter F. Uchtdorf “Happiness, Your Heritage,” Ensign ukon Liahona,Nob. 2008, 120.

Ano ang Sarang Ko Mahimo?

1. Ngaa kag paano si Jesucristo mangin akon ehemplo?

2. Paano ang pag-alagad sa mga sisters nga akon ginabisitahan makabulig sa akon nga sundon ang Manluluwas?