Pweng sin Prestuhnsi Se Met, Jacnweri 2014
Pacl Wo Emet in Yukiac soko Sahk
Ke acn mahtuh Rome, Janus el pa god luhn ma muhtwacwacack uh. El kwacna ahkkahlwemyeyuck ke muhta luo—sie ngwet nuh tok nuh ke ma somlah, ma se sahyac an ngwet nuh met nuh ke ma fahsruh uh. Kuhtuh kahs uh pahngon mahlwem luhn Jacnweri tohkohl ke srihpen muhtwacwacyen yac uh pa sie pacl nuh ke motko ac oacyacpac plwacn.
Tausin ke yac tohkoh, facsin pucspucs fin facluh tahfwelah na sie facsin in orwaclah plwacn in eklac nuh ke yac sasuc uh. Pwacyena, orwaclah plwacn in eklac uh fihsrwacsr—liyacacng pa sie ma siena liki nohfohn.
Sie mukul suc orwaclah sie tahk loeloes ke plwacn in eklac luhn Yac Sasuc puhla wo na pwacye ke kapkapwack lal an. El nuhnkuh sel sifacna, “Ne ingena, nga srwackna mongo fal, nga soenna kasrkuhsrakwack, nga srwackna liyacacng sisi mani luhk, ac soenna oasr sie pacl nga tohrkahskahs ke kosro nuhtin mwet tuhlan uh. Tuhsruhk mihsenge pa Jacnweri 2 ac ao in okahk sac kahskahs ac pacl luhk in tuhkahkwek. Ac enenuh sie ma usrnguck in kalweni in ukwe finsrak luhk nuh kwewa.”
Sifilpac Muhtwacwacack
Oasr sie ma wolacna sesseslah ke finsrak ke sie muhtwacwacack sasuc. Nga muh ke sie pacl kuh siepacna kuht nohfohn luhngse in sifil muhtwacwacack ke wacngihn tahfonglac.
Nga luhngse eis sie computer sasuc ke sie hard drive nwacsnwacs. Ke kihtin pacl ac orekma arlac wo. Tuhsruhk ke lwen uh ac wik uh somlah ac kain in prokracm uh ituckyang nuh kac (kuhtuh ke oasr srihpac ac kuhtuh tiac), te paht na computer sac muhtwacwacack in muhsruhl, ac ma tuh orekmakihnyuck nuh kac an sana ac muhtwacwacack suhmuhilac. Kuhtuh pacl uh ac tiac orekma na pwacye. Finne in oruh in muhtwacwacack kuh in eklac nuh ke sie orekma ke hard drive sacn sesseslah ke ma tiac enenweyuck ac wacngihn srihpac. Oasr kuhtuh pacl ke mwe kahsruh sefanna pa in elah computer an ac sifilpac muhtwacwacack.
Mwet uh kuh pac in eklac sesseslah ke sahngweng, tahfuhluo, ac mwacta ma arlac toasr. Tahfonglac kuht orwaclah uh (kwewana ma orek in oacyac kuh tiac) kuh in toasrlac nuh sesr nuh ke oacna in upac in oruh ma kuht etuh muh kuht enenuh uh.
Ke ohiyac luhn ma koluk uh, oasr sie ohiyac wolacna in sifil elah pahngpahng auliyak ma lwelah kuht in ahkmwesahsyelah insiacn hard drive lasr ke ma sesseslah ma ahktoasrye insiacsr. Wosasuc uh, ke Iwaclah usrnguck ac pahkotwen luhn Jisus Kraist, ahkkahlwemye nuh sesr inkacnek in ahknwacsnwacsye nguhnasr ke tuhnin ma koluk ac in sifilpac eklac sasuc, nwacsnwacs, ac wo mwacta oacna sie tuhlihk.
Tuhsruhk kuhtuh pacl uh ma sahyac uh ahksuhmuhiye kuht ac sruok kuht, orwaclah nuhnak ac mukwikwi tiac wo ma oruh upac nuh sesr in muhtwacwacack.
In Orwaclah Kuhiyacsr Nohfohn
Oakiyac finsrak pa sie ma wo in oruh. (Kuht etuh lah oasr finsrak luhn Pahpah tuhmasr Inkuhsrao ke srihpen El fahk nuh sesr lah orekma ac wolacna Lal pa “in ahkfahsryelah moul kawihl ac ma pahtpaht luhn mwet uh” Moses 1:39).
Finsrak lasr sifacna uh kuh in orwaclah kuhiyac wo emet kacsr. Ne ohinge, sie sin ma ma tulohkihn kuhiyacsr in orwaclah ac liyacacng plwacn in eklac pa in kotwaclah. Kuhtuh pacl uh kuht uh kohtwaclah muhtwacwacack uh, sano nuh ke pacl fal in muhtwacwacack —lwen se emet ke sie yac sasuc, muhtwacwacackiyen suhmuhr, ke kuht pahngonyuck in oruh pisap kuh prestuhn luhn Rilif Sosaiti, tukun tuhlihk uh sroacng ke lutlut ah, tukun kuht ritaerlac.
Kom tiac enenuh sie solsol met liki kom muhtwacwacack mukwi nuh ke inkacnek luhn finsrak suwohswohs lom an. Kom tiac enenuh in sano nuh ke lwelah in eklac mwet se ma kom luhmweyuck nuh kac uh. Kom tiac enenuh in sano in suliyuck in kuhlwacnsap ke Alu uh.
Kuhtuh pacl uh kuht kuh in tohllah wel yac puhs ke moul lasr uh tuhpan in suleyucklac (liye D&C 121:34–36). Tuhsruhk nuhnak stuhuh se pa ingacn. Kom suleyucklac tari!
Ke kuhtuh pacl ke moul luhk uh nga tiac mutullac ke lainyacn ma elyah, toasr, kuh ahsor la sifacna. Tuhsruhk finne upac lohsriyen fong uh, nga kwacna ahkkweyeyuck ke nuhnak se inge: ke lututacng faht ah fah takwack.
Ke lwen sasuc nuh kwewa, sie kuhsruhn lwen sasuc tuhkuh—tiac nuh ke facluh muhkwena tuhsruhk nuh sesr pac. Ac ke sie lwen sasuc tuhkuh sie muhtwacwacack sasuc—sie pacl wowo in sifil muhtwacwacack.
Tuhsruhk Meac Kuht Fin Tiac Orwaclah?
Kuhtuh pacl uh ma ma tulokihn kuht uh pa sahngweng. Kuht kuh in sahngweng lah kuht fah tiac orwaclah wo, lah kuht fah orwaclah wo, lah kuht mwekihn, lah orwaclah wo kuh in ikihlkuhtlac, kuh lah ma ingacn kuh in ekuhllah mwet kuht luhngse uh.
Na kuht tuhpan. Kuh fuhlweack.
Siepac ma kuht enenuh in esam ke pacl in oakiyac finsrak uh pa ma inge: Kuht ac apkuhran na in fah tiac orwaclah wo—sahp ke kihtin pacl. Tuhsruhk sahyacn suhpwacrlac, kuht kuh in ahkfokokoyeyuck ke srihpen mwe etwacack inge eslah elyah ke in suwohs ingena uh. Akihlenyuck ma ingacn e ke muhtwacwacackiyac ah lah ke sie pacl kuh siepacna, kuht kuh in fototolac. In etuh ma inge met eslah yohkiyacn mwe lut ac puhla koluk ke tiac orwaclah wo.
Ke kuht sun finsrak lasr uh ke inkacnek se inge, orwaclah suhfahl uh tiac enenuh in sruok kuht. Esam, finne kuht koflah sun acn sahflah yohk srihpac, kenakihnyuck lasr ingena, ac fah oasr kapkapwack lasr ke inkacnek ma ac fah kol nuh kac uh.
Ac ma ingacn yohk srihpac—yohk kalmeyac na pwacye.
Finne kuht fototolac ke lain in kesso lasr uh, kalweni na fuhfahsryucsr uh fah ahkwoye kuht likina met ah.
Pacl Wowo Se Met in Muhtwacwacack Pa Ingena
Sie soakas mahtuh fahk, “Pacl wo se emet in yukiac soko sahk pa yac 20 somlah ah. Pacl wo se ahkluo emet an pa ingena.”
Oasr sie ma wolacna ac sesselah ke finsrak ke kahs se ingena. Oasr sie mwe ahkfokoko ke ma pwacye lah kuht fin sulaclah in nuhnkwaclah ingena, kuht kuh in fahsr nuh met ke pacl se na inge.
Ingena pa pacl wo se emet in muhtwacwacack eklac nuh ke mwet ma kuht kena in oruh uh—tiac nuh ke yac 20 muhkwena tuhsruhk nuh ke ma pahtpaht nuh kwewa pac.
© 2014 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/13. Ahkkweyeyucklac ke lweng: 6/13. Lwenglah luhn First Presidency Message, January 2014. Kosraean. 10861 868
Luti ke Pweng Se Inge
Prestuhn Uchtdorf el ahkuhtweyac lah ke kuht koflah in sun finsrak lasr uh, “kuht kuh in ahkfokokoyeyuck. … Finne kuht fototolac ke lain in kesso lasr uh, kalweni na fuhfahsryucsr uh fah ahkwoye kuht likina met ah.” Siyuck sin mwet ke sucu an in akacsruhi ke puhlakihnyuck ma elos lotwelah yohk ke ohiyac sacn likina elos lotwelah liki ke ma sikyak an, ma oacna srolah liki lutlut kuh eisyacn sie opi.