2014
Misin Muhtahl luhn Jisus Kraist: Mwet Srihkasrak
January 2014

Pweng ke Forfor Luti, Jacnweri 2014

Misin Muhtahl luhn Jisus Kraist: Mwet in Srihkasrak

Pruhe in lutlutkihn ip se inge ac suk in etuh ma in akacsruhi kac. Kahlwemkihn moul ac misin luhn Mwet Lahngo uh ahkyohkye fuhkah luhlahlfongi lasr Kacl ac ahkinsewowoye mwet kom karihngihn uh ke forfor luti uh? Nuh ke kuhtuh pac ma in etuh, som nuh ke reliefsociety.lds.org.

Luhlahlfongi, Sucu, Kahsruh

Ke kuht kahlwemkihn lah Jisus Kraist pa mwe srihkasrak lasr ke ma nuh kwewa uh, kuht kuh in ahkyohkye kena lasr in Ukwacl. Ma suhmuhslah uh sesseslah ke mwe ahkkweye nuh sesr in ukwe falken Kraist. Nuh sin mwet lal Nephi, Kraist El fahk lah orekma ma elos liye El oruh pa elos enenuh in oruh uh, (liye3 Nephi 27:21). Nuh sel Thomas, Jisus El fahk, “Nga pa inkacnek, ac pwacye, ac moul; wacngihn mwet som nuh yurin Pahpah fin tiac ke Nga” (John 14:6).

Mihsenge mwet kol lasr uh ahkacsmakihnye kuht in oruh Mwet Lahngo oacna mwe srihkasrak lasr. Linda K. Burton, prestuhn luhlahp luhn Rilif Sosaiti, el fahk, “Ke kais sie sesr oasr mwe luti luhn Iwaclah sihmlac loal insiacsr uh, na kuht fah muhtwacwacack in orwaclah kain mwet ma Leum El kena kuht in oacna uh.”1

Prestuhn Thomas S. Monson el fahk, “Leum ac Mwet Lahngo, Jisus Kraist lasr, pa Mwet in Srihkasrak lasr ac kuhiyacsr.”2

Lwelah kuht in sulaclah in fototoyang nuh sin Jisus Kraist, in ahkos masap Lal uh, ac in kampare in fohlohk nuh yurin Pahpah tuhmwacsr Inkuhsrao.

Ke Ma Suhmuhslah uh

2 Nephi 31:16; Alma 17:11; 3 Nephi 27:27; Moroni 7:48

Ke Ma Mahtuh Lasr

“El mahkiyac acn in fahsr uh ac kol inkacnek uh,” Eliza R. Snow el suhmuhslah, prestuhn luhlahp ahkluo ke Rilif Sosaiti, ke luti luhn Jisus Kraist ke El moul ah.3 El luti nuh sin kais sie mwet— sie sin sie. El luti lah kuht enenuh in som liki ma yucngucul ac yuc ah in molwelah ma tuhlac soko ah (liye Luk 15:3–7). El ahkkweyelah ac luti kais sie, finne eis pacl nuh sin kais sie mwet ke un mwet luhlahp 2,500 sac (liye 3 Nephi 11:13–15; 17:25).

Ke muhtwacn ke Mwet Luhlahlfongi ke Lwen-sahflah uh, Prestuhn Dieter F. Uchtdorf, Mwet in Kahsruh Se Ahkluo ke Prestuhnsi Se Met, fahk: “Kowos tahmtahel wolacna uh sang kuhlwacnsap kuhlwacng nuh sin mwet sahyac uh nuh ke srihpac ma ahluhkwelah kena nuh ke ma wowo lowos sifacna uh. Ke ma inge kom ukwe Mwet Lahngo. … Nuhnak lal uh kwacna nuhnkuh in kahsruh mwet sahyac uh.”4

© 2014 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/13. Ahkkweyeyucklac ke lweng: 6/13. Lwenglah luhn Visiting Teaching Message, January 2014. Kosraean. 10861 868

Mwe kahsruh

  1. Linda K. Burton, “Is Faith in the Atonement of Jesus Christ Written in Our Hearts?” Ensign kuh Liahona, Nohfohmpuh 2012, 114.

  2. Thomas S. Monson, “Meeting Life’s Challenges,” Ensign, Nohfohmpuh 1993, 71.

  3. “How Great the Wisdom and the Love,” Hymns, no. 195.

  4. Dieter F. Uchtdorf, “Happiness, Your Heritage,” Ensign kuh Liahona, Nohfohmpuh 2008, 120.

Meac Nga Kuh In Oruh Uh?

  1. Fuhkah ac efuh tuh Jisus Kraist El mwet in srihkasrak se luhk?

  2. Lutiyen tahmtahel nga muhtwacta yohroh uh kahsrweyuc fuhkah in ukwe Mwet Lahngo?

Print