iTabagone
Veiqaravi ni Vulaikatakata
E vakaitikotiko na dauvolaivola mai Virginia, Amerika.
Ena dua na vulaikatakata au a cakacaka voli ena dua na vanua tani vata kei ira na gonelalai ka vakaleqai tu na kedra ituvaki. Au a nuiqawaqawa saraga ena imatai ni gauna au sotavi ira kina na gonelalai. Au sega ni vosataka na nodra vosa, ia au a vakanuinui ni na tuberi au na Yalotabu ena noqu veitaratara kei ira. Ni’u sa mai kilai ira yadua na gone, au vakila ni vosa e sega ni itatarovi ni loloma. Au a qito, dredre, ka cakava eso na cakacaka ni liga vata kei ira na gonelalai ka’u sega ni tarova rawa noqu vakila na taucoko ni noqu lomani ira. Au raica na Nona lomani ira tu na Luvena na Tamada Vakalomalagi, e vakasinaiti na yaloqu ena reki e sega niu vakamacalataka rawa.
Ena gauna au qarava ira kina eso tale, au vakila niu sega ni lomani ira walega au qaravi ira ia sa vaka talega kina na Tamada Vakalomalagi. Au sa mai kila vakaidina ni “ko ni sa qaravi Koya tiko na nomuni Kalou, ena nomuni qaravi ira tiko na wekamuni” (Mosaia 2:17). Na inaki ni noqu veiqaravi, se ena dua na cakacaka levu se mai ena itavi ni veiqaravi lalai ni loloma, sa ikoya na vakalagilagi ni Kalou (raica na Maciu 5:16). Au nuitaka ena noqu qaravi ira tale eso, era na vakila na tamata na noqu lomana na Tamada Vakalomalagi kei na Rarama i Karisito ka caudre tiko e lomaqu.