iTukutuku ni Mataveiliutaki Taumada, Feperueri 2014
Qarava na Turaga ena Loloma.
A vakatavulica na Turaga o Jisu Karisito, “Ia ko koya yadua sa via maroroya na nona bula ena vakayalia: ia ko koya ena vakayalia na nona bula ena vukuqu, ena maroroya” (Luke 9:24).
“Au vakabauta,” e kaya o Peresitedi Thomas S. Monson, “e tukuna tiko vei keda na iVakabula ni na sega soti sara ni vakainaki vakalevu na noda bula kevaka eda sega ni dau vakayagataka vakalevu ena noda qaravi ira na tani. O ira era bula ga me baleti ira vakai ira era na raqosa yani ka yaco mera vakayalia na nodra bula, ia o ira era vakayali ira ena veiqaravi vei ira na tani era na tubu ka kadre—ka yaco vakaidina mera vakabulai ira sara ga.”1
Mai vei ira na itukutuku oqo ni veiqaravi nei Peresitedi Monson, e vakananumi ira na Yalododonu Edaidai okoya ni ra sa liga ni Turaga, ka vakakina ni sa waraki ira tu na dauveiqaravi yalodina kivei ira na tani, na veivakalougatataki tawamudu.
Veiqaravi ena Valetabu
“Na veiqaravi levu e caka ni da vakayacora na cakacaka vakalotu ni veisosomitaki me baleti ira na sa lako yani ena yasa kadua ni ilati. Ena vuqa na gauna eda sega ni kilai ira ka da qarava tiko na nodra cakacaka. Eda sega ni namaka na vakavinavinaka, se meda na vakadeitaka rawa ni ra na vakadonuya na veika eda sa cakava. Ia, eda veiqaravi, ka da rawata ena igu oya na ka e sega ni lako mai ena duatani tale na sasaga: eda sa yaco vakaidina meda ivakabula ena ulunivanua ko Saioni. Ni a solia na iVakabula na Nona bula me isoro ni veisosomitaki baleti keda, o ikeda vakatalega kina, ena so na ivakatagedegede lalai, na cakava vakakina ni da vakayacora na cakacaka vakaisosomi ena valetabu me baleti ira ka ra sega ni rawa ni toso ki liu vakavo ke sa caka e dua na ka ena vukudra mai vei keda eke e vuravura.”2
O Keda na Liga ni Turaga
“Kemuni na taciqu kei na ganequ, eda sa wavoliti tu mai vei ira era gadreva na noda veiqaravi, noda veivakayaloqaqataki, noda veitokoni, noda tiko vinaka, noda yalololoma—se ra lewe ni matavuvale, itokani, veikilai, se vulagi. Eda sa liga ni Turaga e vuravura, ka da sa vakaroti meda qaravi ira ka vukei ira na Luvena. Sa nuitaki keda yadua o Koya. …
“Na veiqaravi eda sa kacivi taucoko kina oya na veiqaravi ni Turaga o Jisu Karisito.”3
Veiqaravi Me vakataka saraga na Turaga
Ena Vuravura Vou, a vakaraitaka na Turaga sa vakaturicaketale, “Ia dou sa kila na ka sa dodonu mo dou kitaka ena noqu lotu; ia na ka kecega dou sa raica ni’u sa kitaka, mo dou kitaka tale ga; io mo dou kitaka na ka kece ga dou sa raica ni’u sa kitaka.” [3 Nifai 27:21].
“Eda vakalougatataki ira eso ena noda veiqaravi ena kena iyaloyalo o ‘Jisu na kai Nasareci … ko koya ka lako voli ka daucaka vinaka.’ [Cakacaka 10:38]. Me vakalougatataki keda na Kalou meda kunea na reki ena noda qarava tiko na Tamada Vakalomalagi ena noda qaravi ira na Luvena e vuravura.”4
Na Gagadre ni Veiqaravi
“Eda gadreva me soli vei keda na galala me da veiqaravi. Ena vukudra na lewenilotu era sa lutu laivi mai na itaviqaravi se o ira era sa tu vakasuka ka sega ni via vakaitavi, e rawa ni da vaqara ena yalomasumasu eso na sala me da yacovi ira kina. Na nodra kerei me ra veiqaravi ena so na itutu sa na rawa saraga ni vakayarayarataki ira mera lesu tale mai. Ia o ira na iliuliu e rawa ni ra veivuke ena gauna vaqo era dau vakataratutu ena so na gauna. E dodonu me da nanuma tiko ni tamata e rawa ni veisau. E rawa ni ra vakanadakuya na itovo ca. E rawa ni ra veivutuni mai na ivalavala ca. E rawa ni ra matabete bula kilikili. Ka rawa ni ra qarava vagumatua na Turaga.”5
Eda sa Cakava tiko beka na Veika Kece e Dodonu Meda Cakava?
“Sa gadreva o vuravura na noda veivuke. Eda sa cakava tiko beka na veika kece e dodonu meda cakava? Eda nanuma tiko li na vosa nei Peresitedi John Taylor: ‘Kevaka o sega ni gumatuataka na nomu ilesilesi, ena tarogi iko na Kalou me baleti ira mo a vakabula kevaka ko a vakayacora na nomu itavi.’? Nodra iVakavuvuli na Peresitedi ni Lotu: John Taylor (2001), 164. Sa ra tu na yava me vaqaqacotaki, liga me tuberi, vakasama me vakayaloqaqataki, yalo me vakauqeti, kei na tamata me vakabulai. Sa waraki iko tu na veivakalougatataki tawamudu. Sa nomu na madigi mo kakua ni sarasara tu ga, ia mo vakaitavi ena buturara ni …veiqaravi.”6
© 2014 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/13. Vakadonui me vakadewa: 6/13. Vakadewa ni First Presidency Message, February 2014. Fijian. 10862 858
Veivakavulici mai na iTukutuku Oqo
“Kevaka e tiko vei iko na loloma va-Karisito, ko na vakavakarau vakavinaka cake ni vakatavulica na kosipeli. Ko na vakauqeti mo vukei ira tale eso mera kila na iVakabula ka muri Koya.”7 Navuca na masulaki ni loloma cecere vakaikuritaki vei ira o sikova. Ni ko taracake vei iko na loloma va-Karisito me baleti ira, ko na rawa ni qarava vakavinaka cake na Turaga kei ira o vakatavulica ena veisala vakaibalebale.