iVaqa ni Veisiko, Feperueri 2014

Na iLesilesi Tabu i Jisu Karisito: iVakatawa Vinaka

Vulica ena masumasu na itukutuku oqo ka vaqara mo kila na ka mo na wasea. Ena vakalevutaka vakacava na nomu vakabauta na nomu kila na bula kei na ilesilesi ni iVakabula, ka yaco me vakalougatataki ira talega o vakaraica voli ena veisiko? Me ikuri ni itukutuku, lako ki na reliefsociety.lds.org.

Vakabauta, Matavuvale, Veivukei

Oqo e dua na tiki ni ituvatuva ni iVaqa ni Veisiko ka matataki kina na iwalewale ni ilesilesi ni iVakabula.

O Jisu Karisito, na iVakatawa Vinaka, a vakatavulica:

“Ko cei vei kemudou na tamata, sa dua na drau na nona sipi, kevaka sa vakayalia e dua vei ira, ena sega ni biuta laivi tu na ciwasagavulu ka ciwa ena veico, ka laki vakasaqarai koya sa yali, me kunea mada?

“Au sa kaya vei kemudou, ni … na reki mai lomalagi ena vuku ni tamata ivalavala ca e le dua bauga sa qai veivutuni” (Luke 15:4, 7).

Ni da mai kila deivaki ni sa iVakatawa Vinaka o Jisu Karisito, e toroicake na noda gagadre ni muria na Nona ivakaraitaki ka qaravi ira era leqa tu. E kaya o Jisu: “Oi au na ivakatawa vinaka, ia ka’u sa kilai ira sa noqu, ia ko ira sa noqu era sa kilai au. … Ka’u sa solia talega na noqu bula ena vukudra na sipi” (Joni 10:14–15). Me baleta na veisorovaki i Karisito, ena sega ni dua vei keda e yali rawa meda sega ni kunea kina na noda sala i vale (raica na Luke 15).

E kaya o Peresitedi Thomas S. Monson, “Sa noda na itavi meda qarauni ira na qelenisipi. … Meda sa gumatua sara ena veiqaravi.”¹

Mai na iVolanikalou

Same 23; Aisea 40:11; Mosaia 26:21

Mai na Keda iTukutuku Makawa

O Elizabeth Ann Whitney, ka a tiko ena imatai ni soqoni ni iSoqosoqo ni Veivukei, a kaya vaqo me baleta na nona saumaki ena 1830: “Ena gauna ga au a rogoca kina na Kosipeli rau a vunautaka na iTalatala, au a kila saraga ni sa domo ni iVakatawa Vinaka.”² A muria o Elizabeth na domo ni iVakatawa Vinaka ka qai papitaiso ka vakadeitaki.

Sa rawa talega ni da rogoca na domo ni iVakatawa Vinaka ka wasea na Nona ivakavuvuli vei ira tale eso. E kaya o Peresitedi Monson, “Eda sa ligana na Turaga e vuravura, ka sa vakaroti meda qarava ka laveti ira na Luvena.³

Me vaka ga na nona vakasaqara na ivakatawa na sipi e yali, era na rawa ni vakasaqara na itubutubu na gone e sa lako sese. A tukuna o Peresitedi James E. Faust (1920–2007), iKarua ni Daunivakasala ena Mataveiliutaki Taumada: “Ki vei ira na itubutubu yaloraramusumusu ka sa yalododonu voli, ka gugumatua, ka dau masumasu ena vakatavulici ni luvedra talaidredre, keitou kaya vei kemuni, sa wanonovi ira tiko na iVakatawa Vinaka. Sa nanuma ka kila deivaki na Kalou na bibi ni nomu rarawa. E tiko na inuinui.”⁴

© 2014 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/13. Vakadonui me vakadewa: 6/13. Vakadewa ni Visiting Teaching Message, February 2014. Fijian. 10862 858

iDusidusi

1. Thomas S. Monson, “Heavenly Homes, Forever Families,” Liahona, June 2006, 70.

2. Elizabeth Ann Whitney, ena Luvequ Yalewa ena Noqu Matanitu: Na iTukutuku kei na Cakacaka ni iSoqosoqo ni Veivukei (2011), 146.

3. Thomas S. Monson, “Na Cava Au Sa Bau Cakava Vua E Dua Nikua?” Liaona, Nove. 2009, 86.

4. James E. Faust, “Dear Are the Sheep That Have Wandered,” Liaona, Me 2003, 68.

Na Cava e Rawa Niu Cakava?

1. Ena kauta vakacava mai na vakacegu ki na nomu bula na kilai ni iVakabula ni sa iVakatawa Vinaka?

2. Ena sala cava eda rawa ni veiqaravi kina kivei ira na sa “yali” se o ira ka sega ni lewenilotu ena itaviqaravi ena Lotu?

3. Au na rawa ni tokoni ira vakacava na itubutubu ka sa lako sese na luvedra mai na bulataki ni kosipeli?