Fas Presidensi Mesej, Febwari 2014
Givim Seves long Lod wetem Lav
Lod, Jisas Kraes i bin tijim: “Man we i wantem sevem laef blong hem, hem bambae i lusum laef blong hem, be man we i lusum laef blong hem from mi, hem bambae i sevem laef blong hem” (Luk 9:24).
“Mi biliv,” Presiden Tomas S. Monson i talem, “Sevya i stap talem long yumi se sapos yumi no putum yumi fulwan blong helpem ol narafalawan, i no gat stamba tingting nating long laef blong yumi. Olgeta we oli laef blong lukluk long olgetawan nomo, bae oli sot long ol samting mo bae oli lusum laef blong olgeta; be olgeta we oli putum olgeta fulwan blong helpem ol narafalawan, oli stap gro mo kam antap fulwan—mo blong talem stret, oli stap sevem laef blong olgeta.”1
Long ol smol toktok ia andanit we i kam long seves blong Presiden Monson, hem i mekem ol Lata-dei Sent oli tingbaot bakegen se oli stap long han blong Lod, mo ol blesing blong taem we i no save finis oli stap wet rere i stap blong olgeta we oli fetful blong helpem ol narafalawan.
Seves Insaed long Tempol
“Yumi stap givim bigfala seves taem yumi stap mekem ol odinens long bihaf blong olgeta we oli go narasaed long vel finis. Long plante kes, yumi no save olgeta ia we yumi stap mekem wok blong olgeta. Yumi no tingting blong wan i talem tangkyu, o yumi no save stret tu se bae oli akseptem o no wanem we yu givim long olgeta. Be, yumi givim seves, mo long wei ia yumi kasem samting we i kam long aksen ia nomo be i no wan nara wok bakegen: yumi kam stret olsem ol sevya long Hil Saeon. Semmak olsem Sevya blong yumi i givim laef blong Hem olsem wan sakrifaes long bihaf blong yumi, long sam smol wei, yumi mekem semmak taem yumi mekem ol wok long tempol long bihaf blong olgeta we oli no gat rod blong muv fored, be nomo, sapos yumi, we yumi stap long ples ia long wol, i mekem hemia long bihaf blong olgeta.2
Yumi Nao Yumi Ol Han blong Lod
“Ol brata mo sista blong mi. Raon long yumi, i gat olgeta we oli nidim blong yumi lukluk long olgeta, blong yumi leftemap tingting blong olgeta, blong yumi sapotem olgeta, yumi givim kamfot long olgeta, yumi soem fasin we i kaen long olgeta—nomata oli ol memba blong famle, ol fren, ol pipol we oli save gud, o ol strenja. Yumi nao, yumi han blong Lod, long ples ia long wol, wetem stret wok ia we Hem i givim yumi blong givim seves mo leftemap ol pikinini blong Hem. Hem i stap dipen long wanwan long yumi. …
“Seves ia we Hem i singaotem yumi evriwan long hem, i seves blong Lod, Jisas Kraes.”3
Blong Wok long Sado blong Sevya
Long Niu Wol, Lod we i bin laef bakegen long ded i bin talem: “Yufala i save ol samting we yufala i mas mekem long jos blong mi; from ol wok we yufala i bin lukim mi mi mekem, samting ia bae yufala i mas mekem tu; from ol samting we yufala i bin lukim mi mi mekem, samting ia bae yufala i mas meke” [3 Nifae 27:21].
“Yumi blesem ol narafala taem yumi stap wok long sado blong ‘Jisas, man Nasaret ya … [we] i stap go olbaot long evri ples, i stap mekem ol gudfala wok’ [Ol Wok 10:38]. God i blesem yumi blong yumi faenem glad taem yumi stap givim seves long Papa we i stap long Heven long wei we yumi stap givim seves long ol pikinini blong Hem long wol.”4
Nid Ia blong Givim Seves
“Yumi nid blong kasem wan janis blong givim seves. Long saed blong olgeta memba ia we oli bin stap aktiv mo oli glis i go, o oli stap holembak olgeta mo no stap komitim olgeta, yumi save prea blong lukaotem sam wei blong kasem olgeta. Blong askem olgeta blong givim seves long sam samting, ating i stret samting ia nao we oli nidim blong oli kambak fulwan long jos. Be samtaem, ol lida we oli save help long saed ia, oli no wantem givim janis ia. Yumi nid blong putum long tingting blong yumi se pipol i save jenis. Oli save livim fogud ol nogud fasin. Oli save sakem sin from ol fasin blong brekem loa. Oli save stap klin inaf blong kasem prishud. Mo oli save wok strong wetem strong tingting blong givim seves long Lod.”5
?I Tru se Yumi Stap Mekem Evri Samting we Yumi Mas Mekem?
“Wol ia, i nidim help blong yumi. ?I tru se yumi stap mekem evri samting we yumi mas mekem? ?Yumi tingbaot ol toktok blong Presiden Jon Teila?: “Sapos yu no stap mekem gud koling blong yu, God bae i mekem yu responsibol long olgeta we yu bin save sevem sapos yu bin mekem diuti blong yu.”4 Teachings of Presidents of the Church: John Taylor (2001), 164. I gat ol leg blong mekem oli kam strong, ol han blong holemtaet, ol maen blong leftemap tingting blong olgeta, ol hat blong givim insperesen long olgeta, mo ol sol blong sevem. Ol blesing blong taem we i no save finis oli stap wet long yu i stap. Janis ia, i spesel janis blong yu. I no blong yu stap sidaon mo lukluk, be blong yu tekpat antap long stej ia blong givim seves.”6
© 2014 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/13. Oli letem translesen: 6/13.Translesen blong First Presidency Message, February 2014. Bislama.10862 852
Yusum Mesej Ia blong Tij
“Sapos yu gat lav olsem hemia blong Kraes, bae yu rere gud moa blong tijim gospel. Bae yu gat insperesen blong helpem ol narafalawan blong oli save Sevya mo oli folem Hem.”7 Tingting blong prea blong gat jareti, long olgeta we yu stap visitim, we bae i gohed blong gro. Taem yu stap developem lav long olgeta olsem hemia blong Kraes, bae yu save stap long wan ples we bae yu save givim seves long ol wei we i gat moa mining; mo bae yu givim seves long Lod, mo tu, olgeta we yu stap tijim.