2014
Tabu Misin blong Jisas Kraes: Stap Wan Gudfala Man blong Lukaot long Sipsip
Febwari 2014

Visiting Tijing Mesej, Febwari 2014

Tabu Misin blong Jisas Kraes: Stap Wan Gudfala Man blong Lukaot long Sipsip

Wetem prea, stadi long toktok ia mo luklukgud blong save wanem stret blong serem. ?Olsem wanem nao, taem bae yu andastanem laef mo misin blong Sevya, bae i mekem fet blong yu long Hem i kam antap, mo tu, bae i blesem olgeta we yu stap lukaot long olgeta tru long visiting tijing? Blong kasem moa infomesen, go long reliefsociety.lds.org. reliefsociety.lds.org.

Fet• Famle • Help

Jisas Kraes, Gudfala Man blong Lukaot long sipsip i tijim:

“Hu long yufala we i gat handred sipsip blong hem mo wan long olgeta i lus, be hem i no tingbaot? Sipos wan long yufala i lusum sipsip blong hem olsem, bambae hem i mas livim ol naenti naen sipsip blong hem oli stap kakae long open ples, nao hem i mas go lukaot sipsip ya we i lus, gogo i faenem …

“Mo mi mi talem long yufala. Bambae long heven i olsem nomo. Bambae oli glad moa long wan man nomo we i man nogud, be i tanem tingting blong hem from sin blong hem” (Luk 15:4, 7).

Taem yumi kam blong andastanem se Jisas Kraes i Gudfala Man blong Lukaot long Sipsip, bae yumi wantem moa blong folem eksampol blong Hem mo givim seves long olgeta we oli stap long nid. Jisas i talem: “Mi nao, gudfala man ya blong lukaot long sipsip. … Mi mi save ol sipsip blong mi mo ol sipsip blong mi oli save mi. … Mo mi mi glad nomo blong mi ded blong sevem ol sipsip blong mi” (Jon 10:14–15). From Atonmen blong Kraes, i no gat wan long yumi we bae i lus samtaem, we i no save faenem rod blong gobak hom (luk long Luk 15).

Presiden Tomas S. Monson i talem: “Responsabiliti blong yumi i blong lukaotgud long grup blong ol man. … Bae yumi wanwan i mekem fas step blong givim seves.”1

I Kamaot long Ol Skripja

Ol Sam 23; Aesea 40:11; Mosaea 26:21

I Kamaot long Histri blong Yumi

Lesbet An Witni, i bin stap long fas Rilif Sosaeti miting, i bin tokbaot taem hem i jenisim laef long 1830: “Taem mi harem Gospel taem we ol Elda oli stap prijim, mi save se hem i voes blong Gudfala Man blong Lukaot long Sipsip.” 2 Lesbet i bin folem voes blong Gudfala Man blong Lukaot long Sipsip, mo hem i bin kasem baptaes mo konfemesen.

Yumi tu, yumi save harem voes blong Gudfala Man blong Lukaot long Sipsip mo serem ol tijing blong Hem wetem ol narafala. Presiden Monson i talem: “Yumi nao, yumi han blong Lod, long ples ia long wol, wetem stret wok ia we Hem i givim yumi blong givim seves mo leftemap ol pikinini blong Hem.”3

Semmak olsem we wan man blong lukaot long sipsip i lukaotem wan sipsip we i lus, ol papa mo mama oli mas lukaotem wan pikinini we i go lus. Presiden Jemes E. Faost (1920–2007), Seken Kaonsela long Fas Presidensi i talem: “Long olgeta papa mo mama we hat blong olgeta i brok, we oli bin stret mo gud, we oli wok strong wetem strong tingting, mo oli bin prea taem oli stap tijim ol pikinini blong olgeta we oli no stap obei, mifala i talem long yufala, Gudfala Man blong Lukaot long Sipsip i stap lukluk ova long olgeta. God i save mo i andastanem bigfala harem nogud blong yu. I gat hop i stap.”4

© 2014 i kam long Intellectual Reserve, Inc. Oli holem evri raet. Oli printim long YSA.Oli letem long Inglis: 6/13. Oli letem translesen: 6/13Translesen blongVisiting Teaching Message, February 2014. Bislama.10862 852

Ol Not

  1. Thomas S. Monson, “Heavenly Homes, Forever Families,” Liahona, June 2006, 70.

  2. Elizabeth Ann Whitney, in Daughters in My Kingdom: The History and Work of Relief Society (2011), 128.

  3. Thomas S. Monson, “What Have I Done for Someone Today?” Liahona, Nov. 2009, 86.

  4. James E. Faust, “Dear Are the Sheep That Have Wandered,” Liahona, May 2003, 68.

Wanem Mi Save Mekem?

  1. ?Olsem wanem nao, we taem yumi save se Sevya, Hem nao i Gudfala Man blong Lukaot long Sipsip, nao save ia i tekem pis i kam long laef blong yumi?

  2. ?Long wanem wei nao yumi save givim seves long olgeta we oli “lus” long Jos, o oli no blong fet blong yumi?

  3. ?Olsem wanem nao mi save sapotem ol papa mo mama we oli gat ol pikinini we oli stop blong laef folem gospel?