2014
Misyon divin Jezikri: Bon Bèje
fevriye 2014

Mesaj vizit nan fwaye, Fevriye 2014

Misyon divin Jezikri: Bon Bèje

Etidye materyèl sa a nan lapriyè epi chèche konnen kisa pou w pataje. Nan ki fason konprann lavi ak misyon Sovè a ogmante lafwa nou nan Li e beni moun n ap veye sou yo atravè vizit nan fwaye yo? Pou plis enfòmasyon, ale nan reliefsociety.lds.org.

Lafwa, Fanmi, Sekou

Jezikri, Bon Bèje a, te anseye:

“Sipoze youn nan nou gen san mouton. Si l pèdi youn ladan yo, èske li pap kite katrevendiznèf lòt mouton yo nan dezè a, pou l al dèyè sa k pèdi a, jiskaske l jwenn ni? 

“Konsa tou, m ap di nou … va gen plis kontantman nan syèl la pou yon sèl moun ki repanti” (Lik 15:4, 7).

Lè nou vin konprann ke Jezikri se Bon Bèje a, dezi nou pou suiv egzanp li ak sèvi moun ki nan bezwen yo ogmante. Jezi te di: “Mwen se bon bèje a, e m konnen mouton m yo, e yo menm tou yo konnen mwen. … Epi mwen bay lavi m pou mouton m yo” (Jan 10:14–15). Gras ak Sakrifis Ekspyatwa Kris la, okenn nan nou pap janm sitèlman pèdi pou nou pa kapab jwenn wout nou pou n retounen (gade Lik 15).

Prezidan Thomas S. Monson te di: “Nou gen responsablite pou nou pran swen twoupo a. … Se pou nou chak chèche okazyon pou nou sèvi.”1

Nan ekriti yo

Som 23; Ezayi 40:11; Mozya 26:21

Nan Istwa Nou

Elizabeth Ann Whitney, ki te patisipe nan premye reyinyon Sosyete Sekou a, te pale sou konvèsyon li an 1830: “Osito ke m te tande levanjil la jan èldè yo te preche l la, mwen te konnen ke sete vwa Bon Bèje a.”2 Elizabeth te suiv vwa Bon Bèje a epi li te batize ak konfime.

Nou menm tou nou ka tande vwa Bon Bèje a ak pataje ansèylman l yo avèk lòt moun. Prezidan Monson te di: “Nou nan men Senyè a isit sou tè a, avèk responsablite pou nou sèvi li ak edifye pitit li yo.”3

Menmjan yon bèje al chèche yon mouton ki pèdi a, se menmjan tou paran yo kapab al chèche yon timoun ki ale kite wout la. Prezidan James E. Faust (1920–2007), Dezyèm Konseye nan Premye Prezidans lan, te di: “Pou paran dezespere ki toujou rete dwat, dilijan, ak devwe nan anseye pitit ki dezobeyisan yo, n ap di, Bon Bèje a ap veye sou yo. Bondye konnen e l konprann pwofon doulè nou. Gen espwa.”4

© 2014 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/13. Apwobasyon tradiksyon: 6/13. Tradiksyon Visiting Teaching Message, February 2014. Haitian. 10862 036

Nòt

  1. Thomas S. Monson, “Heavenly Homes, Forever Families,” Liahona, Jen 2006, 70.

  2. Elizabeth Ann Whitney, nan Filles dans mon royaume: L’histoire et l’oeuvre de la Société de Secours (2011), 128.

  3. Thomas S. Monson, “What Have I Done for Someone Today?” Liahona, Nov. 2009, 86.

  4. James E. Faust, “Dear Are the Sheep That Have Wandered,” Liahona, Me 2003, 68.

Kisa M Ka Fè?

  1. Nan ki fason konnen Sovè a se Bon Bèje a ap pote lapè nan lavi nou?

  2. Nan ki fason nou ka sèvi moun ki “pèdi” yo ki pa aktif nan legliz la ankò oubyen moun ki pa menm relijyon avèk nou yo?

  3. Nan ki fason m ka pote sipò bay paran sa yo ki gen timoun ki pa rete nan levanjil la ankò yo?