Lamharon
Sabat sa Iya Pangamuyo
Ang tagsulat nagapuyo sa Gauteng, South Africa.
Isa ka gab-i isa ka abyan sa iban nga relihiyon ang nagbisita sa akon. Sa masami isahanon ako nga nagatuon sang akon balaan nga mga kasulatan, kag ginpagwa ko na ang mga ini agud tun-an sina nga gab-i. Ginpabatyag ako nga agdahon sia nga mag-upod sa akon pagtuon sang balaan nga mga kasulatan, pero ginkulbaan ako kag sa baylo nagsugod sa pagtuon nga isahanon. Nahibaluan ko nga ginbale-wala ko ang pagpabatyag sang Espiritu. Makaligad ang pila ka minutos, mahinalungon ako nga nagpamangkot, “Gusto mo magtuon sang scriptures upod sa akon?” Nga wala sing pagpangalag-ag nagsabat ang akon abyan, “Huo.”
Dayon nagbasa kami gikan sa Libro ni Mormon. Namangkot sia sa akon sang pila ka pamangkot, kag nabatyagan ko ang Espiritu nga nagagiya sa akon samtang nagasabat. Nagpaambit ako sang akon panaksihon parte sa kamatuoran sang Libro ni Mormon. Pagkatapos nga nahimo ko ini, siling niya sa akon, “Nagahibi ako kag nahadlok bilog nga adlaw. Bag-o lang gid ako nagpangamuyo sa Dios para sa bulig sang gin-agda mo ako nga magbasa sang scriptures upod sa imo. Mas maayo na ang pamatyag ko subong. Salamat.”
Ang Ginuo naggamit sa akon bilang instrumento agud masabat ang pangamuyo kag maalagaran ang isa sang Iya kabataan nga nagakinahanglan. Nakahibalo ako nga ang mga pagpabatyag diosnon nga mga panulin gikan sa isa ka maalam, mahimayaon nga Amay. Kon ipahigad naton ang aton mga kahadlok, ginatugotan naton Sia nga ipakita ang Iya gahum paagi sa aton pagkamatinumanon.