Mensahe sang Unang Panguluhan, Marso 2014
Pag-alagad kag Wala’y Katapusan nga Kabuhi
Ang Manluluwas amo ang aton halimbawa sang di-maiyaiyahon nga pag-alagad. Ang iya perpekto nga kabuhi nasentro sa pag-alagad sa Amay nga Langitnon kag sa tanan nga kabataan sang Iya Amay. Ang gintingob nga katuyuan sang Amay kag sang Anak amo nga hatagan kita tanan sang dulot sang pagkaimortal kag sang bugay sang wala’y katapusan nga kabuhi (tan-awa sa Moses 1:39).
Agud makaangkon sang wala’y katapusan nga kabuhi, kinahanglan gid kita nga mabag-o paagi sa Pagpasag-uli ni Jesucristo—mabun-ag liwat kag matinluan gikan sa sala. Apang, ang magagmay nga kabataan nga manubo sangsa walo ka tuig, wala sang sala kag natubos na paagi sa Pagpasag-uli ukon Atonement (tan-awa sa Mosias 3:16, 21; Moroni 8:10–12).
Para sa aton nga nakalab-ot na sa idad sang pagkamay-salabton, may isa ka manami nga plano nga nagatugot sa aton nga matinluan gikan sa sala kag maghanda para sa wala’y katapusan nga kabuhi. Ang ina nga paghanda nagasugod sa bunyag paagi sa pagbulut-an sang priesthood kag sa pagbaton sang Balaan nga Espiritu. Dayon kinahanglan naton nga panumdumon pirme ang Manluluwas kag sundon ang mga kasuguan nga Iya ginhatag sa aton.
Si Haring Benjamin nagsugid sa iya katawhan sa Libro ni Mormon parte sa kalipay nga naggikan sa pagbatyag sang kapatawaran gikan sa mga sala paagi sa Pagpasag-uli ni Jesucristo. Dayon nagtudlo sia sa ila nga agud dalayon nga maangkon ang kapatawaran sang ila mga sala, kinahanglan nila tudloan ang ila kabataan nga mag-alagad sa isa kag isa kag kinahanglan nila nga mangin subong kaalwan agud masabat ang temporal kag espirituhanon nga panginahanglan sadtong yara sa ila palibot. (Tan-awa sa Mosias 4:11–16.)
Gintudlo man niya, “Kag yari karon, ginasugid ko sa inyo ining mga butang agud nga makatuon kamo sang kaalam; agud nga inyo matun-an nga kon yara kamo sa pag-alagad sang inyo mga isigkatinuga yara lamang kamo sa pag-alagad sang inyo Dios” (Mosias 2:17).
Si Jesus naglibot nga nagatudlo sang Iya ebanghelyo kag nagahimo sing kaayuhan (tan-awa sa Mga Binuhatan 10:38). Ginpang-ayo Niya ang nagamasakit. Ginbanhaw Niya ang minatay. Paagi sa Iya gahum ginpakaon Niya ang linibo sang sila gingutom kag wala sing makaon (tan-awa sa Mateo 14:14–21; Juan 6:2–13). Pagkatapos sang Iya Pagkabanhaw ginhatagan Niya sang pagkaon ang pila Niya ka Apostoles sang nagdungka sila sa baybay sang Dagat sang Galilee (tan-awa sa Juan 21:12–13). Sa Amerika, ginpang-ayo Niya ang nagamasakit kag isa-isa nga ginbendisyunan ang mga kabataan (tan-awa sa 3 Nefi 17:7–9, 21).
Si Santiago nga Apostoles nagtudlo sa aton kon paano ang kaluyag nga mag-alagad sa iban naghalin sa aton kapasalamatan para sa ginbuhat sang Ginuo para sa aton:
“Apang ang nagatulok sa himpit nga kasuguan sang kahilwayan, kag nagapadayon, nga indi malimuton nga manugpamati kundi manugtuman nga nagabuhat, ining tawo mangin bulahan sa iya binuhatan. …
“Ang putli nga pagtuluohan kag wala’y dagta sa atubang sang Dios kag Amay amo ini: ang pagduaw sa mga ilo kag balo nga mga babayi sa ila kapipit-an, kag sa pagtipig sang iya kaugalingon nga wala’y dagta sa sining kalibutan” (Santiago 1:25, 27).
Ang isa sa mga garantiya nga ginatinluan ikaw amo ang nagatubo nga kaluyag nga mag-alagad sa iban para sa Manluluwas. Ang home teaching kag visiting teaching mangin mas makalilipay kag indi isa ka mabug-at nga obligasyon. Matalupangdan ninyo ang inyo kaugalingon nga masami nagaboluntaryo sa lokal nga eskwelahan ukon nagabulig atipan sang mga pigado sa inyo komunidad. Bisan pa nga diutay lang ang inyo kwarta nga ibulig sadtong may mas diutay, nagahandum kamo nga kuntani may mas madamo kamo agud mas makahatag pa gid (tan-awa sa Mosias 4:24). Mangin mas ganado kamo nga mag-alagad sa inyo kabataan kag magpakita sa ila kon paano mag-alagad sa iban.
Samtang nagabaylo ang inyo kinaugali, mabatyagan ninyo ang kaluyag nga maghatag sang mas dako nga serbisyo nga wala sang pagdayaw. May nakilala ako nga mga sumulunod sang Manluluwas nga naghatag sang dalagko nga balor sang kwarta kag pag-alagad nga wala gid sing bisan sin-o nga nakahibalo magluwas sa Dios kag sang ila mga kabataan. Ang Dios nagkilala sang ila pag-alagad paagi sa pagbugay sa ila sa sining kinabuhi, kag pagabugayan Niya sila sa palaabuton nga wala’y katapusan nga kabuhi (tan-awa sa Mateo 6:1–4; 3 Nefi 13:1–4).
Samtang ginatuman ninyo ang kasuguan nga mag-alagad sa iban (tan-awa sa Mateo 22:39), nagabatyag kamo sang pagbag-o sa inyo bugal. Ang Manluluwas nagsaway sa Iya mga Apostoles sang nagbinaisay sila kon sin-o gid dapat ang mangin mas dako sa ila tanan. Siling niya:
“Dili kamo magpatawag nga mga agalon, kay isa lamang ang inyo Agalon, ang Cristo.
“Ang labing dako sa inyo mangin-alagad ninyo” (Mateo 23:10–11).
Ang Manluluwas nagatudlo sa aton kon paano naton matun-an nga alagaran ang iban. Nag-alagad Sia sing himpit, kag kinahanglan gid naton magtuon sa pag-alagad pareho sang Iya pagtuon—sing amat amat (tan-awa sa D&C 93:12–13). Paagi sa pag-alagad nga aton ginahatag, sarang kita mangin mas pareho pa gid sa Iya. Magapangamuyo kita upod ang bug-os nga kusog sang aton mga tagipusuon agud palanggaon ang aton mga kaaway pareho sang Iya pagpalangga sa ila (tan-awa sa Mateo 5:43–44; Moroni 7:48). Dayon sa katapusan mahimo kita mangin takos para sa wala’y katapusan nga kabuhi upon sa Iya kag sa aton Amay nga Langitnon.
Ginasaad ko nga sarang kita mag-alagad sing mas perpekto samtang ginasunod naton ang mga ginpanudlo kag halimbawa sang Manluluwas.
© 2014 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Paglubad sang First Presidency Message, March 2014. Hiligaynon. 10863 861
Pagtudlo gikan sa Sining Mensahe
Si Elder M. Russell Ballard sang Korum sang Napulo’g Duha ka mga Apostoles nagpaisog sa aton nga magpangamuyo para sa mga oportunidad nga mag-alagad: “Sa inyo pangamuyo sa aga sa tagsa ka bag-o nga adlaw, pangabaya ang Amay nga Langitnon nga giyahan kamo agud makilala ang isa ka oportunidad nga makaalagad sa isa sang Iya bilidhon nga kabataan. Dayon maglakat sa bilog nga adlaw … nga nagapangita sang mabuligan” (“Be Anxiously Engaged,” Ensign ukon Liahona, Nob. 2012, 31). Binag-binaga ang pag-agda sadtong inyo ginatudloan nga magplastar sang lalab-uton nga magpangamuyo tagsa ka aga para sa mga oportunidad nga mag-alagad kag dayon pangitaon ini sa bug-os nga adlaw.