Mensahe sa Visiting Teaching, Marso 2014
Ang Diosnon nga Misyon ni Jesucristo: Kasanag sang Kalibutan
Tun-i sing mainampuon ining materyales kag hibaloa kon ano ang inyo ipaambit. Paano bala ang paghangop sang kabuhi kag misyon sang Manluluwas makadugang sang inyo pagtuo sa Iya kag makabugay sinang inyo ginaalagaran paagi sa visiting teaching? Para sa dugang nga impormasyon, mag-log on sa reliefsociety.lds.org.
Pagtuo, Pamilya, Bulig
Sa aton paghibalo nga si Jesucristo amo ang Kasanag sang Kalibutan, mapatubo naton ang aton pagtuo sa Iya kag mangin kasanag sa iban. Si Cristo nagpamatuod sang Iya papel bilang “ang matuod nga kasanag nga nagaiwag sa tagsa ka lalaki [kag babayi] nga nagakari sa kalibutan” (D&C 93:2) kag nagpangabay nga aton “ipataas ang [Iya] suga agud mag-iwag ini sa kalibutan (3 Nefi 18:24).
Ang aton mga propeta nagpamatuod man parte sa Kasanag ni Cristo. Si Pangulong Henry B. Eyring, Unang Manuglaygay sa Unang Panguluhan, nagsiling: “Sa tagsa ka tion nga pilion ninyo nga magtinguha nga mangabuhi pareho sa Manluluwas, mapabakod ninyo ang inyo panaksihon. Magaabot ang tion nga inyo mahibaluan para sa inyo kaugalingon nga Sia amo ang Kasanag sang Kalibutan. … Igasilak ninyo sa iban ang Kasanag ni Cristo sa inyo kabuhi.”1
Si Elder Quentin L. Si Cook sang Korum sang Napulo’g Duha ka mga Apostoles naghambal parte sa aton pagka-kasanag sa kalibutan: “Kinahanglan naton protektahan ang aton mga pamilya kag mangin yara sa atubang kaupod ang tanan nga tawo nga may maayo nga kabubut-on sa paghimo sang tanan nga masarangan agud mapadayon ang kasanag, paglaum, kag moralidad sa aton mga komunidad.”2
Gikan sa Balaan nga mga Kasulatan
Gikan sa Aton Kasaysayan
Ang mga babayi nga Santos sa Ulihing mga Adlaw sa karon nga panahon padayon nga nagapataas sang ila mga kasanag.
Sa ika-80 nga panalgan sang isa ka mataas kaayo nga bilding sa Hong Kong, China, isa ka solo-lawas nga sister nga may pisikal nga mga kasablagan—ang amo lamang nga Santos sa Ulihing mga Adlaw sa iya pamilya—nagtuga sang puluy-an nga palasilungan kon sa diin sia kag ang mga bisita sarang makabatyag sang impluwensya sang Espiritu. Ginabutang niya ang iya balaan nga mga kasulatan, mga manwal sa Relief Society, kag hymnbook sa malapit lang. Nagabiyahe sia sa templo agud maghikot sang mga ordinansa para sa iya mga katigulangan.3
Sa Brazil isa ka matarong nga iloy ang nagpadako sang iya kabataan sa kasanag sang ebanghelyo. Ang mga ambahanon sang Primary ang mabatian sa sulod sang iya balay, kag ang mga larawan gikan sa Liahona sang mga templo, mga propeta sang Dios, kag sang Manluluwas napaskil sa mga dingding. Sia kag ang iya bana nagsakripisyo agud mahugpong sa templo agud ang ila kabataan sarang mabun-ag sa sulod sang pangako. Ang iya padayon nga pangamuyo amo nga buligan sia sang Ginuo nga padakuon ang iya kabataan sa kasanag, kamatuoran, kag kabaskog sang ebanghelyo.4
© 2014 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Paglubad sang Visiting Teaching Message, March 2014. Hiligaynon. 10863 861