Agtutubo
Maysa a Sungbat iti Kararagna
Agnanaed ti nagsurat iti Gauteng, South Africa.
Maysa a sardam binisitanak ti maysa a gayyem a sabali ti relihionna. Gagangay nga ad-adalek a sisiak dagiti nasantuan a kasuratak, ket inruarko dagitoy tapno adalek iti dayta a sardam. Natignayak a mangawis kenkuana tapno kaduaennak iti panagadalko iti nasantuan a kasuratan, ngem nagamakak ket rinugiak ketdi ti nagadal a sisiak. Ammok a diak inkaskaso ti parikna ti Espiritu. Kalpasan ti sumagmamano a minuto siaannad a dinamagko, “Kayatmo kadi ti makipagadal kaniak kadagiti nasantuan a kasuratan?” Saan a nagkedked nga insungbat ti gayyemko, “Wen.”
Nagbasakami ngarud iti Libro ni Mormon. Nagdamag kaniak iti sumagmamano a saludsod, ken mariknak a tartarabayennak ti Espiritu bayat ti isusungbatko. Imburayko ti pammaneknekko maipanggep iti kinapudno ti Libro ni Mormon. Kalpasan nga inaramidko daytoy, kinunana kaniak, “Agmalmalem nga agsangsangitak ken mabutbutengak. Lepleppasko ti nagkararag iti Dios tapno agpatulong idi kiddawem kaniak a duata a mangbasa kadagiti nasantuan a kasuratan. Nasaysayaat ti riknak itan. Agyamanak.”
Inusarnak ti Apo kas maysa a ramit tapno masungbatan ti maysa a kararag ken mapagserbian ti maysa kadagiti annakna nga agkasapulan. Ammok a nadiosan a pangiturong dagiti parikna a naggapu iti masirib, nagloriaan nga Ama. No lipatentayo dagiti panagbutengtayo, palugodantayo Isuna a mangiparangarang iti bilegna babaen ti panagtungpaltayo.