Mensahe ti Umuna a Panguluen, Marso 2014
Serbisio ken Agnanayon a Biag
Ti Mangisalakan ti pagwadantayo iti saan a managimbubukod a panagserbi. Impaayna ti naan-anay a biagna iti panagserbi iti Nailangitan nga Ama ken iti amin nga annak ti Amana. Ti nagkaykaysa a panggep ti Ama ken ti Anak ket ti mangted kadatayo amin iti sagut ti imortalidad ken ti bendision ti agnanayon a biag (kitaen iti Moises 1:39).
Tapno maikari iti agnanayon a biag, nasken nga agbalbaliwtayo babaen ti Pannubbot ni Jesucristo—nayanak manen ken nadalusan manipud iti basol. Dagiti babassit nga ubbing nga agtawen iti walo, nupay kasta, ket awan basolda ken nasubbotda babaen ti Pannubbot (kitaen iti Mosiah 3:16, 21; Moroni 8:10–12).
Para iti amin kadatayo a nakadanon iti tawen nga addan sungsungbatan, adda napintas a plano a mangpalugod kadatayo a madalusan manipud iti basol ken makapagsagana para iti agnanayon a biag. Dayta a panagsagana ket mangrugi iti panagbuniag babaen ti awtoridad ti priesthood ken ti panangawat iti Espiritu Santo. Kalpasanna nasken a kanayon a laglagipentayo ti Mangisalakan ken tungpalentayo dagiti bilin nga intedna kadatayo.
Imbaga ni Ari Benjamin kadagiti taona iti Libro ni Mormon maipapan iti rag-o a sumangbay manipud iti pannakarikna iti pannakapakawan manipud iti basol babaen ti Pannubbot ni Jesucristo. Kalpasanna sinuruanna ida a mangpatalinaed iti pannakaugas dagiti basbasolda, nasken a suruanda dagiti annakda nga agserbi iti tunggal maysa ken nasken nga agbalinda a managparabur agingga a kabaelanda tapno maited dagiti temporal ken espiritual a kasapulan dagiti adda iti aglawlawda. (Kitaen iti Mosiah 4:11–16.)
Insurona pay, “Ket adtoy, ibagak dagitoy a banag kadakayo tapno masursuroyo ti pagsiriban; tapno maammuanyo a no agserbikayo iti padayo a tao, agserserbikayo laeng iti Dios” (Mosiah 2:17).
Namagpagna ni Jesus a nangisursuro iti ebangheliona ken nagar-aramid iti kinaimbag (kitaen iti Dagiti Aramid 10:38). Inagasanna dagiti masaksakit. Pinagungarna dagiti natay. Babaen ti pannakabalinna pinakanna dagiti umariwekwek a tao idi mabisin ken awan makanda (kitaen iti Mateo 14:14–21; Juan 6:2–13). Kalpasan ti Panagungarna inikkanna iti taraon ti sumagmamano kadagiti Apostolna idi simmalogda iti Taaw ti Galilea (kitaen iti Juan 21:12–13). Kadagiti kontinente ti America, inagasanna dagiti masakit ken saggaysa a binendisionanna dagiti ubbing (kitaen iti 3 Nephi 17:7–9, 21).
Sinuruannatayo ni Santiago nga Apostol no kasano nga agsulbod ti tarigagay nga agserbi kadagiti dadduma manipud iti panagyamantayo iti inaramid ti Apo para kadatayo:
“Ngem ti mangsukimat iti linteg a naan-anay nga isu ti linteg ti wayawaya, ket pagtalinaedenna ket saan a managdengngeg a makalipat, no di ket managaramid iti aramid, daytoy a tao nagasatto kadagiti ar-aramidna. …
“Ti panagdaydayaw a nadalus ken awan tulawna iti imatang ti Diostayo ken Ama, isu daytoy: Sarungkaran dagiti awan ti ammada ken dagiti balo a babbai iti ladingitda, ken agannad nga awan tulaw ti lubong” (Santiago 1:25, 27).
Maysa kadagiti pammatalged a mapatpatarnawkayo ket ti napadakkel a tarigagay nga agserbi iti dadduma para iti Mangisalakan. Ti home teaching ken visiting teaching ket agbalin nga ad-adda a rag-o ken babassit nga aramid. Matakuatam ti bagim a masansan nga agbolboluntario iti maysa a pagadalan iti lugaryo wenno tumultulong a mangtaripato kadagiti napanglaw iti purokyo. Nupay mabalin a bassit ti kuartam tapno mangtedka kadagiti awanan, tarigagayam nga addaanka koma iti nawadwadwad tapno makaitedka iti ad-adu pay (kitaen iti Mosiah 4:24). Makitam ti bagim nga aggagar nga agserbi kadagiti annakmo ken ipakitam kadakuada no kasano ti agserbi kadagiti dadduma.
Bayat ti panagbalbaliw iti galadmo, mariknamto ti tarigagay a mangted iti dakdakkel a serbisio nga awan ti pammigbig. Ammok a dagiti disipulo ti Mangisalakan a nangted kadagiti naindaklan a sagut ti kuarta ken serbisio nga addaan iti determinasion nga awan ti asino man no saan a ti Dios ken dagiti annakna ti makaammo maipapan iti daytoy. Binigbig ti Dios ti serbisioda babaen ti panangparaburna kadakuada itoy a biag, ken paraburannanto ida iti agnanayon a biag nga umay (kitaen iti Mateo 6:1–4; 3 Nephi 13:1–4).
Bayat ti panagtungpalyo kadagiti bilin nga agserbi kadagiti dadduma (kitaen iti Mateo 22:39), mariknayo ti panagbalbaliw iti riknayo iti kinatangig. Inatur ti Mangisalakan dagiti Apostolna idi nagpipinnatangda no asino ti kaindaklanan kadakuada. Kinunana:
“Ket dikay met koma managan ti manangidaldalan, ta maymaysa ti Manangidalanyo, nga isu ni Cristo.
“Ngem ti kadakkelan kadakayo, isunto ti agserserbi kadakayo” (Mateo 23:10–11).
Suruannatayo ti Mangisalakan no kasano a makasursurotayo nga agserbi kadagiti dadduma. Nagserbi isuna a naan-anay, ket nasken a masursurotayo ti agserbi kas iti panagsursurona—nga ibinsabinsa (kitaen iti DkK 93:12–13). Babaen ti serbisio nga itedtayo, makapagbalintayo nga ad-adda pay a kas Kenkuana. Agkararagtayo iti amin a pigsa ti puspusotayo nga ayaten dagiti kabusortayo kas iti panagayatna kadakuada (kitaen iti Mateo 5:43–44; Moroni 7:48). Kalpasanna mabalin iti kamaudiananna a maikaritayo iti agnanayon a biag a kadenna Isuna ken ti Nailangitan nga Amatayo.
Ikarik a makapagserbitayo nga ad-adda pay a naan-anay no surotentayo dagiti pannursuro ken pagwadan ti Mangisalakan.
© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/13. Pannakaanamongna a maipatarus: 6/13. Pannaakaipatarus ti First Presidency Message, March 2014. Ilokano. 10863 864
Panangisuro manipud iti Daytoy a Mensahe
Inallukoynatayo ni Elder M. Russell Ballard ti Korum dagiti Sangapulo-ket-dua nga Apostol nga agkararag para kadagiti gundaway nga agserbi: “Iti kararagyo iti bigat iti tunggal baro nga aldaw, dawatenyo iti Nailangitan nga Ama a tarabayennakayo a mangbigbig iti gundaway a makapagserbi iti maysa kadagiti napapateg nga annakna. Kalpasanna mapankayo iti agmalem … agsapsapul iti maysa a tao a tulonganyo” (“Be Anxiously Engaged,” Ensign wenno Liahona, Nob. 2012, 31). Ibilangyo ti panangawis kadagiti sursuruanyo a mangituding iti panggep a tun-oyen nga agkararag iti tunggal bigat para kadagiti gundaway a makapagserbi ket kalpasanna sapulen ida iti agmalem.