2014
Ti Nadiosan a Mision ni Jesucristo: Silaw ti Lubong
March 2014

Mensahe iti Visiting Teaching, Marso 2014

Ti Nadiosan a Mision ni Jesucristo: Silaw ti Lubong

Nainkararagan nga adalenyo daytoy a material ken kalikagumanyo nga ammuen no ania ti ibinglay. Kasano a ti pannakaawatyo iti biag ken mision ti Mangisalakan ket mangpapigsa iti pammatiyo Kenkuana ken magparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org..

Pammati • Pamilia • Tulong

Bayat ti pannakaawattayo a ni Jesucristo ti Silaw ti Lubong, mapapigsatayonto ti pammatitayo Kenkuana ket agbalintayo a silaw kadagiti dadduma. Pinaneknenkan ni Cristo ti akemna a “ti pudno a silaw a manglawag iti tunggal tao nga umay iti lubong”(DkK 93:2) ket indawatna nga “itag-aytayo ti silaw[na] tapno agraniag iti lubong” (3 Nephi 18:24).

Impaneknek pay dagiti propetatayo maipapan iti Silaw ni Cristo. Kinuna ni Presidente Henry B. Eyring, Umuna a Mammagbaga iti Umuna a Panguluen: “Tunggal kanito a pilienyo ti mangikarigatan nga agbiag iti ad-adda pay a kas ti Mangisalakan, mapapigsayonto ti pammaneknekyo. Iti kamaudianan maammuanyonto mismo nga Isu ti Silaw ti Lubong. … Mayanninawyonto kadagiti dadduma ti Silaw ni Cristo iti biagyo.”1

Kinuna ni Elder Quentin L. Cook ti Korum dagiti Sangapulo-ket-dua nga Apostol maipapan iti panagbalin a silaw iti lubong: Nasken a saluadantayo dagiti pamiliatayo ket mangyunatayo a kaduatayo ti amin a tao iti kinaimbag iti pananagaramidtayo iti amin a kabaelantayo a mangtaginayon iti silaw, namnama, ken moralidad kadagiti komunidadtayo.”2

Manipud kadagiti Nasantuan a Kasuratan

Juan 8:12; Doktrina ken Katulagan 50:24; 115:5

Manipud iti Pakasaritaantayo

Itultuloy dagiti Santa iti ud-udina nga aldaw ti mangitag-ay iti silawda.

Iti maika-80 a kadsaaran ti nangato a pasdek iti Hong Kong, China, maysa a balasang nga addaan iti sagabaen iti bagi—ti kakaisuna a Santa iti Ud-udina nga Aldaw iti pamiliana—ket nangparnuay iti maysa a pagtaengan a kasla langit a pakariknaanna ken dagiti sangailina iti impluensia ti Espiritu. Iti asideg nakadulin dagiti nasantuan a kasuratanna, dagiti pagbasaanna iti Relief Society, ken ti hymbookna. Nagbiahe a napan iti templo tapno aramidenna dagiti ordinansa para kadagiti kapuonanna.3

Idiay Brazil pinatanor ti maysa a nalinteg nga ina dagiti annakna iti silaw ti ebanghelio. Napno iti kankanta ti Primary ti tangatang iti nalabaga a ladrilio a pagtaenganna, ken dagiti ladawan a naggapu iti Liahona dagiti templo, dagiti propeta ti Dios, ken ti Mangisalakan ti nakapaskil kadagiti diding. Nagsakripisioda nga agassawa tapno mailantipda iti templo tapno mayanak dagiti annakda iti katulagan. Kanayon nga ikarkararagna a tulongan koma ti Apo isuna a mangpatan-ay kadagiti annakna iti silaw, kinapudno, ken pigsa ti ebanghelio.4

© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/13. Pannakaanamongna a maipatarus: 6/13. Pannakaipatarus ti Visiting Teaching Message, March 2014. Ilokano. 10863 864

Dagiti Nagadawan

  1. Henry B. Eyring, “A Living Testimony,” Ensign wenno Liahona, Mayo 2011, 128.

  2. Quentin L. Cook, “Let There Be Light!” Ensign wenno Liahona, Nob. 2010, 30.

  3. Kitaen iti Daughters in My Kingdom: The History and Work of Relief Society (2011), 163–64.

  4. Kitaen iti Daughters in My Kingdom, 164.

Ania ti Maaramidko?

  1. Ilawlawag no ania ti kayat a sawen ti agbalin a silaw ti lubong ita.

  2. Utoben maipapan no kasano a makatulong kadakayo nga agibtur kadagiti pannubok ti silaw ni Cristo.