iTukutuku ni Mataveiliutaki Taumada, Maji 2014
Veiqaravi kei na Bula Tawamudu
Sa noda ivakaraitaki na iVakabula ena veiqaravi e sega kina na yalokocokoco. Na taucoko ni Nona bula a vagolea ki na veiqaravi vei Tamada Vakalomalagi kei ira kece sara na Luvena na Tamana. Sa nodrau inaki vata na Tamada kei na Luvena oya na taukeni ni isolisoli ni tawamate rawa kivei keda kece sara kei na veivakalougatataki ni bula tawamudu (raica na Mosese 1:39).
Me rawati na bula tawamudu, sa dodonu meda na veisautaki mai na Veisorovaki i Jisu Karisito—sucu tale ka savai mai na ivalavala ca. O ira na gonelalai ena ruku ni yabaki walu, era sa sega sara ni valavala ca ka ra sa vueti mai na Veisorovaki (raica na Mosaia 3:16, 21; Moronai 8:10–12).
Vei keda kece ka sa yacova na yabaki ni vakilai yalona, e sa tiko e dua na ituvatuva totoka e vakatarai keda meda savai mai na ivalavala ca ka vakarautaki ki na bula tawamudu. Na vakavakarau oya e yavutaki ena papitaiso mai na dodonu ni matabete kei na ciqomi ni Yalo Tabu. Ka meda na qai dau nanuma tiko na iVakabula ka muria na ivakaro sa solia kivei keda o Koya.
A tukuna o Tui Penijamini kivei ira na nona tamata ena iVola i Momani me baleta na reki e yaco mai na vakilai ni veivosoti ni ivalavala ca mai na Veisorovaki i Jisu Karisito. A qai vakatavulici ira o Koya ena kena rawati tikoga na bokoci ni nodra ivalavala ca, sa dodonu mera vakatavulici ira na luvedra mera dau veiqaravi vakaiira ka mera na dau lomasoli tikoga me sotavi kina na veigagadre vakayago ka vakayalo ni tamata ka wavoliti ira. Raica na Mosaia 4:16.
A vakatavulica talega o koya, “Ia au sa tukuna vei kemuni na veika oqo mo ni yalomatua kina; mo ni kila ko ni sa qaravi koya tiko na nomuni Kalou, ena nomuni qaravi ira tiko na wekamuni” (Mosaia 2:17).
A lako voli o Jisu ka vakatavuvulitaka na Nona kosipeli ka caka vinaka (raica na Cakacaka 10:38). A vakabulai ira na tauvimate. A vakaturi ira cake na mate. Ena Nona kaukauwa a vakania kina o Koya e vica vata na udolu ni ra sa viakana ka sega na kakana (raica na Maciu 14:14–21; Joni 6:2–13). Ni sa oti na Nona Tucaketale a solia o Koya na kakana kivei ira eso na Nona iApositolo ni ra cabe mai baravi ena Wai o Kalili (raica na Joni 21:12–13). Ena vanua vaka Amerika, a vakabulai ira na tauvimate o Koya ka vakalougatataki ira vakayadua na gonelalai (raica na 3 Nifai 17:7–9, 21).
E vakatavulica vei keda o Jemesa na iApositolo na iwalewale ni kena vakavurei mai na noda vakavinavinaka na gagadre ni qaravi ira na tani mai na veika sa cakava na Turaga me baleti keda.
“Ia ko koya sa vakaraica matua na vunau vinaka sara, na vunau ni veisereki, ka tudei kina, sa sega ni daurogoca ka guilecava, ia sa kitaka talega na cakacaka, ena kalougata kina ko koya oqo ena nona cakacaka. …
“Na lotu savasava ka sega ni cala e mata ni Kalou kei na Tamada sa vakaoqo: Me sa dau raici ira na luveniyali kei ira na yada ni ra sa rarawa, me sa qarauni koya talega me kakua ni tauvi koya na duka ni ka vakavuravura.”Jemesa 1:25, 27.
Dua na ivakadei ni nomu sa vakasavasavataki tiko oya na gagadre vakaikuri ni nodra qaravi tale eso me baleta na iVakabula. Sa yaco me dua na ka rekitaki na veituberi ki na vuvale kei na siko vuvale ka lailai me vaka e dua na itavi. Sa wasoma na nomu solia wale tu na nomu gauna mo veivuke ena dua na koronivuli se vukei ira tiko na dravudravua ena vanua o vakaitikotiko kina. Dina ga ena rairai lailai vei iko na ilavo mo solia kivei ira ka sega tu na nodra, o na diva me na levu tu vei iko me rawa ni o solia talega vakalevu (raica na Mosaia 4:24). O raici iko vakadoudou mo qaravi ira na luvemu ka vakaraitaka vei ira na iwalewale mera qaravi kina eso tale.
Ni sa veisau na kemu ituvaiki, o na vakila na gagadre mo na vakaitavitaki iko vakalevu cake ka sega tu ni kilai. Au kilai ira na tisaipeli ni iVakabula ka ra soli ka ni loloma vakailavo kei na veiqaravi ena vakanuinui ni na sega tale ni dua vei ira na luvedra ena kila na veika oya, ia na Kalou duadua ga. Sa raica rawa na Kalou na nodra veiqaravi ena nodra vakalougatataki ena bula oqo, ka na vakalougatataki ira o Koya ena bula tawamudu sa bera mai (raica na Maciu 6:1–4; 3 Nifai 13:1–4).
Ni ko sa muria na ivakaro mo qaravi ira tale eso (raica na Maciu 22:39), o sa na vakila e dua na veisau ena nomu nanuma me baleta na dokadoka. A vakadodonutaki ira na Nona iApositolo na iVakabula ni ra veileti voli vakaiira se o cei e levu duadua vei ira. A kaya o koya:
“Dou kakua talega ni vakatokai me turaga: ni sa dua bauga na nomudou Turaga, ko koya na Karisito.
“Ia ko koya sa uasivi cake vei kemudou me nomudou tamata ko koya” (Maciu 23:10–11).
E vakatavulici keda na iVakabula ena iwalewale eda rawa ni vulica kina me qaravi ira tale eso. A veiqaravi vakavinaka sara o Koya, ka sa dodonu meda vulica na veiqaravi me vaka a vulica o Koya—ena loloma e vakaikuritaki (raica na V&V 93:12–13). Eda na yaco me vakataki Koya cake mai na veiqaravi eda solia. Eda na masu ena igu taucoko ni lomada meda lomani ira na noda meca me vaka e lomani ira o Koya (raica na Maciu 5:43–44; Moronai 7:48). E muri sa na qai rawa na bula tawamudu vata kei Koya na Tamada Vakalomalagi.
Au yalataka ni na rawa ni da veiqaravi vakavinaka cake ena noda muria na ivakavuvuli kei na ivakaraitaki ni iVakabula.
© 2014 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/13. Vakadonui me vakadewa: 6/13. Vakadewa ni First Presidency Message, March 2014. Fijian. 10863 858
Veivakavulici mai na iTukutuku Oqo
E sa vakayaloqaqataki keda o Elder M. Russell Ballard ena Kuoramu ni iApositolo Le Tinikarua meda na masulaka na madigi eso ni veiqaravi: “Ena nomu masu ena veimataka vou ni siga yadua, kerea vua na Tamamu Vakalomalagi me tuberi iko mo sotava na madigi mo veiqaravi vua e dua na Luvena talei. Qai lako curuma na veisiga … ena nomu vakaraica e dua na tamata mo vukea” (“Meda Gumatuataka na Noda iTavi,” Ensign se Liaona, Nove. 2012, 29). Navuca mo sureti ira o vakatavulica mera tuva e dua na inaki ni masu ena veimataka me baleta na madigi eso mera qarava ka qai vakasaqarai ira ena loma ni siga yadua.