Mesaj Premye Prezidans lan, Mas 2014
Sèvis ak lavi etènèl
Sovè a se egzanp nou nan sèvis dezenterese. Li te pase lavi pafè li ap sèvi Papa nou ki nan syèl la ak tout pitit Papa li ki nan syèl la. Objektif Papa a ak Pitit Gason an genyen ansanm se bay tout moun don imòtalite a ak benediksyon lavi etènèl la (gade Moyiz 1:39).
Pou nou kalifye pou lavi etènèl la, nou dwe chanje atravè Ekspyasyon Jezikri a—nou dwe nedenouvo epi pwòpte anba peche. Sepandan, timoun piti ki gen mwens pase ywitan yo, yo san peche epi yo rachte pa mwayen Ekspyasyon an (gade Mozya 3:16, 21; Mowoni 8:10–12).
Pou nou tout ki rive nan laj rezon, gen yon bèl plan ki rann posib pou nou pwòpte anba peche ak prepare pou lavi etènèl. Preparasyon sa a kòmanse avèk batèm nan men yon moun ki gen otorite prètriz la ak nan resevwa Sentespri a. Apre sa, nou dwe toujou sonje Sovè a epi kenbe kòmandman li te ba nou yo.
Wa Benjamen te pale avèk pèp li a nan Liv Mòmon an osijè lajwa ki genyen lè moun santi yo padone anba peche atravè Ekspyasyon Jezikri a. Apre sa, li te anseye yo ke, pou yo kontinye kenbe remisyon peche yo, yo dwe anseye pitit yo pou youn sèvi lòt epi yo dwe gen otan jenewozite yo kapab pou yo ka satisfè bezwen tanporèl ak espirityèl moun ki bo kote yo. (Gade Mozya 4:11–16.)
Li te anseye: “Gade, m di nou bagay sa yo pou nou kapab aprann lasajès; pou nou kapab aprann lè n ap sèvi pwochen nou yo, se sèlman nan sèvis Bondye nou ye” (Mozya 2:17).
Jezi t al preche levanjil Li a epi l tal fè byen (gade Travay 10:38). Li te geri moun malad. Li te resisite moun mouri. Avèk pouvwa Li, Li te nouri dè milye moun lè yo te grangou e yo pa t gen manje (gade Matye 14:14–21; Jan 6:2–13). Apre rezireksyon li, Li te bay plizyè nan Apot Li yo manje lè yo te vin sou rivaj Lanmè Galile a (gade Jan 21:12–13). An Amerik, Li te geri malad yo e li te beni timoun yo youn pa youn (gade 3 Nefi 17:7–9, 21).
Apot Jak te anseye nou kouman santiman ki fè nou sèvi lòt moun nan sòti nan gratitid nou genyen pou sa Senyè fè pou nou:
“Men, moun ki fikse je l sou lwa libète ki pafè a, epi ki pèsevere ladan l, ki pa koute pou l bliye, men ki fè travay la, moun sa a ap beni nan aktivite li. …
“Relijyon ki pi epi san tache devan Bondye Papa a se sa a: vizite moun ki ofelen yo ak moun ki vèv yo nan afliksyon yo, epi ki kenbe tèt li san tach devan mond la” (Jak 1:25, 27).
Yonn nan bagay ki banou asirans ke nou pirifye se yon pi gwo dezi nou vin genyen pou nou sèvi lòt moun pou Sovè a. Ansèyman ak vizit nan fwaye vin plis tounen yon jwa pase yon obligasyon. Nou vin twouve nou ap ofri sèvis nou pi souvan nan yon lekòl nan zòn nan oubyen ede pran swen moun ki pòv nan kominote nou an. Menmsi nou gen dwa pa gen anpil lajan pou nou bay moun ki gen mwens yo, nou swete nou ta gen plis pou nou ta kapab bay plis (gade Mozya 4:24). Nou twouve nou byen dispoze pou sèvi pitit nou ak pou montre yo kijan pou yo sèvi lòt moun.
Amezi nati nou ap chanje, nou vin gen dezi pou nou rann pi plis sèvis san fè moun remake sa nap fè. Mwen konnen kèk disip Sovè a ki bay gwo don lajan ak sèvis avèk yon detèminasyon pou okenn moun pa konnen, eksepte Bondye ak pitit Bondye ki benefisye sa yo. Bondye rekonèt sèvis moun sa yo epi li beni yo nan lavi sa a, e l ap beni yo nan lavi etènèl ki gen pou vini an (gade Matye 6:1–4; 3 Nefi 13:1–4).
Lè nou respekte kòmandman pou nou sèvi lòt moun nan (gade Matye 22:39), nou santi yon chanjman nan santiman ògèy nou yo. Sovè a te korije Apot Li yo lè yo tap diskite pou yo konnen kiyès ki t ap pi gran nan pami yo. Li te di:
“Pa kite yo rele nou chèf; paske nou gen yon sèl chèf, se Kris la.
Men, moun ki pi gran nèg nan mitan nou an se moun k ap sèvi nou an” (Matye 23:10–11).
Sovè a anseye nou kijan nou kapab aprann sèvi lòt moun. Li te sèvi avèk pèfeksyon, e nou dwe aprann sèvi jan l te aprann—liy apre liy (gade D&A 93:12–13). Atravè sèvis nou rann, nou kapab vinn plis tankou Li. N ap priye avèk tout enèji kè nou pou nou renmen ennmi nou yo jan li renmen yo a (gade Matye 5:43–44; Mowoni 7:48). Apre sa nou kapab finalman vin anmezi pou nou gen lavi etènèl avèk li menm ak Papa nou ki nan Syèl la.
Mwen pwomèt ke nou kapab vin sèvi pi pafètman si nou suiv ansèyman ak egzanp Sovè a.
© 2014 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/13. Apwobasyon tradiksyon: 6/13. Tradiksyon First Presidency Message, March 2014. Haitian. 10863 036
Ansèyman nan mesaj sa a
Èldè M. Russell Ballard nan Kolèj Douz Apot yo ankouraje nou pou nou priye pou opòtinite pou nou sèvi: “Nan priyè maten nou chak jou, mande Papa nou ki nan syèl la pou l ba nou direksyon pou nou ka rekonèt yon opòtinite pou sèvi youn nan pitit presye l yo. Apresa pase jounen an… ap chèche yon moun pou nou ede” (“Be Anxiously Engaged,” Ensign oswa Liahona, Nov. 2012, 31). Panse pou nou envite moun n ap anseye yo pou yo fikse bi pou yo priye chak maten pou yo jwenn opòtinite pou rann sèvis epi apre sa pou yo chèche opòtinite sa yo pandan tout jounen an.