2014
Misyon divin Jezikri: Limyè mond la
mas 2014

Mesaj vizit nan fwaye, Mas 2014

Misyon Divin Jezikri: Limyè mond la

Etidye materyèl sa a nan lapriyè epi chèche konn kisa pou nou pataje. Nan ki fason konprann lavi ak misyon Sovè a ogmante lafwa nou nan li epi beni moun n ap veye sou yo atravè vizit nan fwaye a? Pou plis enfòmasyon, ale nan reliefsociety.lds.org.

Lafwa, Fanmi, Sekou

Lè nou vin konprann ke Jezikri se Limyè mond la, sa ap ogmante lafwa nou nan Li e n ap vin yon limyè pou lòt moun. Kris la te temwaye konsènan wòl li kòm “vrè limyè a ki klere chak moun ki vini nan mond lan” (D&A 93:2) epi li mande pou nou “leve limye [Li] anlè pou l kapab klere mond lan” (3 Nefi 18:24).

Pwofèt nou yo temwaye konsènan Limyè Kris la tou. Prezidan Henry B. Eyring, Premye Konseye nan Premye Prezidans lan te di: “Chak fwa nou eseye viv plis tankou Sovè a, temwayaj nou ap ranfòse. Nan yon tan, nap vin konnen pou tèt pa nou ke Li se Limyè Mond lan. … Nou va reflete Limyè Kris la ki nan lavi nou an bay lòt moun.”1

Èldè Quentin L. Cook nan Kolèj Douz Apot yo te di konsènan nou menm kòm limyè mond lan: “Nou dwe pwoteje fanmi nou epi pou nou vin kanpe devan ansanm avèk tout moun ki gen bòn volonte pou fè tout sa nou kapab pou prezève limyè, esperans, ak moralite nan kominote nou yo.”2

Nan ekriti yo

Jan 8:12; Doktrin ak Alyans 50:24; 115:5

Nan istwa nou

Fi Sen Dènye Jou yo toujou kontinye ap leve limyè yo anlè.

Nan 80 tyèm etaj yon bilding ki nan Hong Kong, an Chin, gen yon sè selibatè ki andikape—sèl Sen Dènye Jou nan fanmi li—ki te kreye yon fwaye ki sete yon paradi kote limenm ak moun ki vizite li te kapab santi enfliyans Sentespri a. Li te konn kenbe liv ekriti yo, manyèl Sosyete Sekou yo, ak liv kantik la toujou tou pre. Li te konn vwayaje al nan tanp pou l fè òdonans pou zansèt li yo.3

Nan Brezil, yon manman fidèl te elve pitit li yo nan limyè levanjil la. Chan primè yo te ranpli atmosfè nan kay brik wouj li a, epi foto ki soti nan Liahona sou tanp, pwofèt Bondye yo, ak Sovè a te kouvri mi lakay li. Limenm avèk mari li te fè sakrifis pou yo te sele nan tanp pou pitit yo te kapab fèt nan alyans la. Li te priye tout tan pou Senyè a te ede l elve pitit li yo nan limyè, laverite, ak fos levanjil la.4

© 2014 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/13. Apwobasyon tradiksyon: 6/13. Tradiksyon Visiting Teaching Message, March 2014. Haitian. 10863 036

Nòt

  1. Henry B. Eyring, “A Living Testimony,” Ensign oswa Liahona, Me 2011, 128.

  2. Quentin L. Cook, “Let There Be Light!” Ensign oswa Liahona, Nov. 2010, 30.

  3. See Filles dans mon royaume: L’histoire et l’oeuvre de la Société de Secours (2011), 163–64.

  4. Gade Filles dans mon royaume, 164.

Kisa M Ka Fè?

  1. Diskite sou kisa sa vle di pou yon moun se limyè mond lan jodia.

  2. Medite sou fason suiv limyè Kris la ede nou andire eprèv.