Parau poro‘i na te mau tuahine hahaere, Mati 2014
Te misioni hanahana a Iesu Mesia : Maramarama o te ao
A tuatapapa na roto i te pure i teie materia ma te imi ia ite eaha te faaite atu. Nahea te maramaramaraa i te oraraa o te Faaora e i Ta’na misioni e faarahi ai i to outou faaroo Ia’na e e haamaitai ai i te feia ta outou e haapa‘o nei na roto i te mau tere hahaereraa ? No te mau haamaramaramaraa hau atu, a haere i ni‘a i te reliefsociety.lds.org.
Te Faaroo, Te Utuafare, Te Totauturu
Ia taa ana‘e ia tatou e, e Maramarama Iesu Mesia no te ao, e faarahi tatou i to tatou faaroo Ia’na e ia riro atoa mai ei maramarama no vetahi ê. Ua haapapû mai te Mesia i To’na ti‘araa ei « maramarama mau o te haamaramarama mai i te mau tane atoa [e te vahine] te tae mai i roto i te ao nei » (PH&PF 93:2) e ua ani Oia ia « faateitei i [To’na] maramarama, ia anaana’tu i to te ao nei » (3 Nephi 18:24).
Ua faa‘ite papû atoa to tatou mau peropheta i te maramarama o te Mesia. Ua parau mai te peresideni Henry B. Eyring, Tauturu Matamua i roto i te Peresideniraa Matamua e : « I te mau taime atoa e ma‘iti outou i te tamata i te ora mai te Faaora, e haapuaihia ïa to outou iteraa papû. E tae mai ïa te taime e ite ai outou, no outou iho e, o Oia te maramarama o te ao nei … E faaite ïa outou ia vetahi ê i te maramarama o te Mesia i roto i to outou oraraa ».1
Ua parau Elder Quentin L. Cook no te Pŭpŭ no te Tino Ahuru Ma Piti Aposetolo no to tatou riroraa ei maramarama no te ao : « E ti‘a ia tatou ia paruru i to tatou mau utuafare e te feia atoa e mana‘o maitai i te raveraa i te mau mea atoa e nehenehe ia tatou no te paruru i te maramarama, te ti‘aturiraa, e te oraraa morare i roto i to tatou mau vahi nohoraa ».2
No roto mai i te mau papaʻiraa moʻa
Ioane 8:12; Te Parau Haapiiraa e te Mau Parau Fafau 50:24; 115:5
No roto mai i to tatou aamu
I teie mahana, te faateitei nei te mau vahine Feia Mo‘a i te Mau Mahana Hopea Nei i to ratou maramarama.
I ni‘a i te 80raa o te tahua no te hoê fare teitei i Hong Kong, China, te ora ra te hoê tuahine hapepa tei ore i faaipoipo—o ona ana‘e te Feia Mo‘a i te Mau Mahana Hopea Nei i roto i te utuafare—ua faanaho oia i te hoê fare tei riro ei vahi haapûraa i reira oia e te feia ratere e nehenehe ai e ite i te faaûruraa a te Varua. Aita ta’na mau papa‘iraa mo‘a, ta’na mau buka haapiiraa no te Sotaiete Tauturu e ta’na buka himene i vai atea noa ia’na. Ua haere oia i te hiero no te rave i te mau oro‘a no to’na hui tupuna.3
I Beresiria, ua atuatu te hoê metua vahine parau ti‘a i ta’na mau tamarii i roto i te maramarama o te evanelia. Ua faaroo-noa-hia te mau himene a te Paraimere i to’na fare ofaʻi araea uteute, e ua poʻi roa te mau papa‘i o te fare i te mau hoho‘a no roto mai i te Liahona, e mau hoho‘a no te mau hiero, no te mau peropheta a te Atua e no te Faaora. Ua faatusia oia e ta’na tane faaipoipo ia taatihia raua i roto i te hiero ia nehenehe ta raua mau tamarii ia fanauhia i roto i te fafauraa. Ta’na pure tamau, oia hoʻi, ia tauturu mai te Fatu ia’na ia haapii i ta’na mau tamarii i roto i te maramarama, te parau mau e te puai o te evanelia.4
© 2014 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/13. Parau faati‘a no te iritiraa : 6/13. Iritiraa no Visiting Teaching Message, March 2014. Tahitian. 10863 895