Parau poro‘i a te Peresideniraa Matamua, Mati 2014
Te taviniraa e te ora mure ore
O te Faaora to tatou hi‘oraa no te taviniraa pipiri ore. Ua pûpûhia To’na oraraa maitai roa i roto i te taviniraa i te Metua i te Ao ra e te mau tamarii atoa a To’na Metua. Te fa hoê a te Metua e a te Tamaiti, o te horo‘araa ïa ia tatou paatoa i te horo‘a no te tahuti ore e te haamaitairaa no te ora mure ore (hi‘o Mose 1:39).
No te faaineine maitai no te ora mure ore, e ti‘a ia tatou ia tauihia na roto i te Taraehara a Iesu Mesia—ia fanau-faahou-hia e ia tamâhia tatou i te hara. No te mau tamarii râ i raro a‘e i te vaʻu matahiti, aita ta ratou e hara e ua faaorahia ratou na roto i te Taraehara (hi‘o Mosia 3:16, 21; Moroni 8:10–12).
No tatou paatoa râ tei tae te matahiti no te amoraa i te hopoi‘a, e faanahoraa faahiahia e vai ra no te faati‘a ia tatou ia tamâhia i te hara e ia faaineinehia no te ora mure ore. E haamata teie faaineineraa na roto i te bapetizoraa na roto i te haamanaraa autahuʻaraa e te fariiraa i te Varua Maitai. Ei reira, e e haamanaʻo tamau noa tatou i te Faaora e ia haapa‘o i te mau faaueraa Ta’na i horo‘a mai ia tatou.
Ua parau te arii Beniamina i to’na mau taata i roto i te Buka a Moromona no te poupou e tae mai na roto i te fariiraa i te faaoreraa hara na roto i te Taraehara a Iesu Mesia. Ei reira, ua haapii oia ia ratou e, no te tape‘a noa i te faaoreraa o ta ratou mau hara, e ti‘a ia ratou ia haapii i ta ratou mau tamarii ia tavini te tahi i te tahi e e ti‘a atoa ia ratou ia horo‘a hua noa ia au i te mea e noaa ia ratou no te pahono i te mau hinaaro pae tino e te pae morare o te feia na piha‘i iho ia ratou. (Hi‘o Mosia 4:11–16.)
Ua haapii atoa oia e, « E inaha, e faaite atu vau ia outou na i taua mau mea nei, ia ite outou i te paari; ia ite ho‘i outou e, a tavini ai outou i te taata nei te tavini ïa outou i to outou Atua ra » (Mosia 2:17).
Ua haere atoa Iesu ma te haapii i Ta’na evanelia e ma te rave i te maitai (hi‘o Te Ohipa 10:38). Ua faaora Oia i te taata maʻi. Ua faati‘a mai Oia i te taata pohe. Na roto i To’na mana, ua faaamu Oia e tauasini e tauasini feia tei poʻia e tei ere i te maa (hi‘o Mataio 14:14–21; Ioane 6:2–13). I muri iho i To’na Ti‘a-faahou-raa, ua horo‘a Oia i te maa i e rave rahi o Ta’na mau aposetolo a haere ai ratou na te mau pae tahatai no Galilea (hi‘o Ioane 21:12–13). I Amerika, ua faaora Oia i te taata maʻi e ua haamaitai atoa i te mau tamarii, hoê e hoê (hi‘o 3 Nephi 17:7–9, 21).
Ua haapii mai te aposetolo Iakobo nahea te hiaai ia tavini ia vetahi ê e faatupu ai i to tatou mana‘o mauruuru no te mea ta te Fatu i rave no tatou :
« O te hi‘o râ i roto i te ture ti‘a roa o te ti‘amâ ra, ma te ta mau maite, no te mea e ere oia i te taata e moina noa te parau ia faaroo ra, e taata rave râ oia i taua ohipa ra, e haamaitaihia ïa oia i ta’na ra raveraa …
« O te paieti mau e te ino ore i mua i te aro o te Atua, o ta tatou Metua ra, o teie ïa, O te hamani maitai i te otare e te mau vahine ivi i to ratou ati, e te tia‘i maitai ia’na iho, eiaha ia viivii i teie nei ao ». (Iakobo 1:25, 27).
Hoê o te mau haapapûraa no te tamâraahia oe, o te tupu-rahi-raa ïa te hinaaro ia tavini ia vetahi ê no te Faaora. Ua riro atura ïa te haapiiraa utuafare e te hahaereraa utuafare a te mau tuahine ei hoê ohipa oaoa eiaha atura ei hoê ohipa teimaha. E hinaaro pinepine faahou atu oe ia tauturu, i te fare haapiiraa anei i to oe vahi, e aore râ e tauturu atu oe ia aupuru i te feia veve o te oire. E noa’tu e ua iti ta oe moni no te horo‘a atu i te feia ere, e mana‘o oe e, ahani pai ua rahi atu â ta oe, e horo‘a hua atu ïa oe (hi‘o Mosia 4:24). E ite oe i te hiaai ia tavini i ta oe mau tamarii e ia faa‘ite ia ratou nahea i te tavini ia vetahi ê.
A taui noa ai to outou natura, e hiti mai te mana‘o ia tavini rahi faahou atu ma te ore e tia‘i i te arueraa. Ua mâtau vau i te tahi mau pipi na te Faaora tei horo‘a i te mau tao‘a moni rahi e te taviniraa ma te hinaaro papû e, o te Atua ana‘e e ta ratou iho mau tamarii te ite mai i te reira. Ua mauruuru te Atua i ta ratou taviniraa na roto i te haamaitairaa ia ratou i roto i teie oraraa, e e riro atoa Oia i te haamaitai ia ratou i roto i te ora mure ore e haere mai nei (hi‘o Mataio 6:1–4; 3 Nephi 13:1–4).
No to outou haapa‘oraa i te faaueraa ia tavini ia vetahi ê (hi‘o Mataio 22:39), ua ite outou i te tauiraa i ni‘a i to outou iho mau mana‘o teʻoteʻo. Ua faatîtîaifaro te Faaora i Ta’na mau aposetolo a maniania ai ratou no ni‘a i te taata rahi a‘e i rotopu ia ratou. Ua parau Oia:
« Eiaha’toa e titau ia parauhia outou, o te arata‘i ; hoê roa hoʻi o outou arata‘i, o te Mesia.
« E tei rahi ra i roto ia outou na, ei tavini ïa no outou » (Mataio 23:10–11).
Te haapii nei te Faaora ia tatou nahea e noaa ai ia tatou ia haapii i te taviniraa ia vetahi ê. Ua tavini Oia ma te maitai roa e e ti‘a ia tatou ia haapii ia tavini mai Ta’na i haapii mai—te aʻo na ni‘a i te aʻo (hi‘o PH&PF 93:12–13). Na roto i te taviniraa ta tatou e horo‘a e ti‘a ai ia tatou ia riro mai mai Ia’na ra te huru. E riro tatou ma te itoito atoa o to tatou aau, ia here tatou i to tatou mau enemi mai Ta’na i here ia ratou (hi‘o Mataio 5:43–44; Moroni 7:48). I te hopea ra, ei reira e au ai ia tatou te ora mure ore i piha‘i iho Ia’na e i to tatou Metua i te Ao ra.
Te fafau atu nei au ia outou e, e nehenehe ta tatou e tavini maitai roa’tu na roto i te peeraa i te mau haapiiraa a te Faaora e To’na atoa hi‘oraa.
© 2014 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/13. Parau faati‘a no te iritiraa : 6/13. Iritiraa no First Presidency Message, March 2014. Tahitian. 10863 895
Haapiiraa no roto mai i teie parau poroʻi
Ua faaitoito Elder M. Russell Ballard no te Pŭpŭ no te Tino Ahuru Ma Piti Aposetolo ia tatou ia pure no te tahi rave‘a taviniraa : « I roto i to outou pure i te po‘ipo‘i i te mau mahana atoa, a ani i te Metua i te Ao ra ia arata‘i mai ia outou ia itehia ia outou te hoê rave‘a no te tavini i te hoê o Ta’na mau tamarii faufaa rahi. E i roto i te roaraa o te mahana, a haere… ma te imi i te hoê taata ta outou e nehenehe e tauturu » (« Ia anaanatae i te rave », Ensign e aore râ Liahona, Novema 2012, 31). A feruri ia ani manihini i te feia ta outou e haapii nei ia faataa i te hoê fa, ia pure ratou i te poʻipoʻi atoa no te hoê rave‘a taviniraa, ei reira, ia imi ratou i te reira i te roaraa o te mahana.