Isa ka Bilidhon nga Palanublion sang Paglaum
Sa pagpili ninyo kon maghimo ukon magtipig sang kasugtanan upod sa Dios, nagapili kamo kon bala magabilin kamo sang palanublion sang paglaum sa ila nga mahimo magsunod sang inyo halimbawa.
Pinalangga kong mga kauturan, ang pila sa inyo gin-agda sa sini nga miting sang mga misyonero sang Ang Simbahan ni Jesucristo sang mga Santos sa Ulihing mga Adlaw. Inang mga misyonero mahimo nga nag-agda na sa inyo nga maghimo sang desisyon nga makigsugot sa Dios paagi sa pagpabunyag.
Ang iban sa inyo nagapamati tungod ginbaton ninyo ang imbitasyon sang isa ka ginikanan, asawa, ukon ayhan sang bata, nga gintanyag sa inyo sa paglaum nga pilion ninyo nga ibalik sa sentro sang inyo mga kabuhi ang mga kasugtanan nga ginhimo ninyo upod sa Dios. Ang iban sa inyo nga nagapamati nakadesisyon na nga magbalik sa pagsunod sa Manluluwas kag nagabatyag subong sang kalipay sang Iya pag-abiabi.
Kon sin-o man kamo kag bisan sa diin man kamo, ginakaptan ninyo sa inyo mga kamot ang kalipayan sang mas madamo pa nga mga tawo sangsa inyo mahunahuna. Kada adlaw kag kada oras sarang kamo magpili nga maghimo ukon magtipig sang isa ka kasugtanan upod sa Dios.
Kon sa diin man kamo nga punto sa alagyan sa pagpanubli sang dulot sang wala’y katapusan nga kabuhi, may oportunidad kamo nga ipakita sa madamo nga tawo ang dalan padulong sa mas dako nga kalipayan. Sa pagpili ninyo kon maghimo ukon magtipig sang kasugtanan upod sa Dios, nagapili kamo kon bala magabilin kamo sang palanublion sang paglaum sa ila nga mahimo magsunod sang inyo halimbawa.
Kamo kag ako ginbugayan sang pangako sang amo nga palanublion. Utang ko ang akon kalipay sa kabuhi sa isa ka tawo nga wala ko gid makilala sa sining kinabuhi. Isa sia ka ilo nga nangin isa sa akon mga lolo sa tuhod. Ginbilinan niya ako sang isa ka bilidhon nga palanublion sang paglaum. Sugiran ko kamo sang papel nga iya gintungdan sa pagtuga sinang palanublion para sa akon.
Ang iya ngalan amo si Heinrich Eyring. Nabun-ag sia sa manggaranon nga pamilya. Ang iya amay, nga si Edward, may dako nga propyedad sa Coburg, nga yara sa ginatawag subong nga Germany. Ang iya iloy amo ang sadto Viscountess Charlotte Von Blomberg. Ang iya amay amo ang manugdumala sang mga kadutaan sang hari sang Prussia.
Si Heinrich amo ang subang nga bata nanday Charlotte kag Edward. Si Charlotte napatay sa idad nga 31, matapos ibun-ag ang iya ikatatlo nga bata. Wala madugayi napatay man si Edward, nga nawad-an sang tanan niya nga propyedad kag manggad sa isa ka nalugaw-an nga negosyo. Nagaidad pa lamang sia sang 40 ka tuig. Ginbilin niya nga ilo ang tatlo ka kabataan.
Si Heinrich, ang akon lolo sa tuhod, nawad-an sang iya mga ginikanan kag sang dako kaayo nga dutan-on nga manggad. Wala gid sia sang kwarta. Ginsulat niya sa iya journal nga pamatyag niya ang iya maayong kapalaran magaabot kon magkadto sia sa Amerika. Bisan pa nga wala sia sang pamilya ukon mga abyan didto, nakabatyag sia sang paglaum kon magkadto sia sa Amerika. Sang primero nagkadto sia sa siyudad sang New York. Sang ulihi nagsaylo sia sa St. Louis, Missouri.
Sa St. Louis isa sang iya kaupod sa trabaho isa ka Santos sa Ulihing mga Adlaw. Ginhatagan sia sini sang isa ka kopya sang balasahon [pamphlet] nga ginsulat ni Elder Parley P. Pratt. Ginbasa niya ini kag dayon gintun-an ang tagsa ka balasahon nga iya makita parte sa mga Santos sa Ulihing mga Adlaw. Nagpangamuyo sia agud mahibal-an kon matuod nga may mga anghel nga nagpakita sa mga tawo, kon may buhi nga propeta, kag kon nasalapuan na niya ang matuod kag ginpahayag (sang Dios) nga relihiyon.
Pagkatapos sang duha ka bulan sang matutom nga pagtuon kag pagpangamuyo, si Heinrich nagdamgo kon sa diin ginhambalan sia nga magpabunyag. Ang tawo nga ang iya ngalan kag priesthood akon gid ginatahod, nga si Elder William Brown, amo ang magahikot sang ordinansa. Si Heinrich ginbunyagan sa isa ka punong sang tubig-ulan sang Marso 11,1855, sang 7:30 sa aga.
Nagapati ako nga si Heinrich Eyring nakahibalo sadto nga ang akon ginatudlo sa inyo karon matuod. Nakahibalo sia nga ang kalipay sang wala’y katapusan nga kabuhi nagaabot paagi sa mga kaangtanan sang pamilya nga nagapadayon sa katubtuban. Bisan pa nga bag-o niya pa lang masalapuan ang plano sang kalipayan sang Ginuo, nahibal-an niya nga ang iya paglaum para sa wala’y katapusan nga kalipay nasandig sa hilway nga mga pagpili sang iban nga sundon ang iya halimbawa. Ang iya paglaum sa wala’y katapusan nga kalipayan nasandig sa mga tawo nga wala pa mabun-ag.
Bilang bahin sang palanublion sang paglaum sang amon pamilya, nagbilin sia sang journal para sa iya mga kaanakan.
Sa sina nga journal nabatyagan ko ang iya pagpalangga sa amon nga magasunod sa iya. Sa iya mga pulong nabatyagan ko ang iya paglaum nga ang iya mga himata mahimo magpili nga sundon sia sa dalan pabalik sa aton langitnon nga puluy-an. Nahibaluan niya nga indi ini mangin resulta sang isa ka dako nga pagpili kundi sang madamo nga magagmay nga mga pagpili. Sambiton ko gikan sa iya journal:
“Halin sang una ko palang mabatian si Elder Andrus nga naghambal …nagatambong gid ako sa mga miting sang mga Santos sa Ulihing mga Adlaw kag malaka lang gid nga indi ako makatambong, tungod nangin obligasyon ko ang magtambong sining mga miting.
“Ginasulat ko ini sa akon journal agud ang akon kabataan mahimo magsunod sa akon halimbawa kag indi magsikway sining… importante nga katungdanan [nga magtipon] kaupod sa mga Santos.”1
Nakahibalo si Heinrich nga sa mga pang-sakramento nga miting sarang naton mabag-o ang aton pangako nga panumdumon pirme ang Manluluwas kag mag-angkon sang Iya Espiritu nga mangin kaupod naton.
Ang amo nga Espiritu amo ang nagpabakod sa iya sa misyon nga gintanyag sa iya pila lamang ka bulan pagkatapos mabaton ang kasugtanan sa bunyag. Ginbilin niya bilang palanublion ang iya halimbawa sa pagpadayon nga matutom sa iya misyon sa sulod sang anom ka tuig sa lugar nga ginatawag sadto nga Indian Territories. Agud mabaton ang iya release halin sa misyon, naglakat sia halin sa Oklahoma pakadto sa siyudad sang Salt Lake, nga ang kalayuon may halos 1,100 ka milya (1,770 km).
Wala madugayi gintawag sia sang propeta sang Dios nga magsaylo sa nabagatnan nga Utah. Didto nabaton niya sang isa naman ka tawag nga magmisyon sa iya natawhan nga Germany. Dayon ginbaton man niya ang pangagda sang isa ka Apostoles sang Ginuong Jesucristo nga magbulig pasad sang mga duog para sa mga Santos sa Ulihing mga Adlaw sa naaminhan nga Mexico. Sang didto na sia gintawag naman sia sa siyudad sang Mexico bilang isa ka full-time nga misyonero. Gintuman niya ining mga calling. Ginlubong sia sa isa ka gamay nga sementeryo sa Colonia Juárez, Chihuahua, Mexico.
Ginasaysay ko ining mga butang indi agud ipadayaw sia ukon ang iya mga hinimuan ukon ang iya mga himata. Ginasaysay ko ining mga butang agud pasidunggan sia sa halimbawa sang pagtuo kag paglaum nga yara sa iya tagipusuon.
Ginbaton niya ining mga tawag tungod sa iya pagtuo nga ang nabanhaw nga Cristo kag ang aton Amay nga Langitnon nagpakita kay Joseph Smith sa kakahuyan sa estado sang New York. Ginbaton niya ang mga ini tungod may pagtuo sia nga ang mga yabi sang priesthood sa Simbahan sang Ginuo ginpanumbalik upod ang gahum sa paghugpong sang mga pamilya sa katubtuban, kon lamang sila may nagakaigo nga pagtuo agud tipigan ang ila mga kasugtanan.
Pareho kay Heinrich Eyring, nga akon lolo, mahimo nga una man kamo sa inyo pamilya sa pag-usoy sa dalan padulong sa wala’y katapusan nga kabuhi sa banas sang sagrado nga mga kasugtanan nga ginhimo kag gintipigan nga may katutom kag pagtuo. Ang tagsa ka kasugtanan may kaupod nga mga katungdanan kag mga pangako. Para sa aton tanan, kasubong kay Heinrich, ining mga katungdanan kon kaisa simple lamang pero sa masami mabudlay. Pero panumduma, ang mga katungdanan dapat gid kon kaisa nga mabudlay bangod ang ila katuyuan amo nga itulod kita sa dalan agud magkabuhi upod sa Amay nga Langitnon kag sa Iya Hinigugma nga Anak, nga si Jesucristo, sa mga pamilya.
Madumduman ninyo ang mga pulong gikan sa libro ni Abraham:
Ginpakita sang Dios kay Abraham nga may isa nga nagtindog nga kaupod nila nga daw kaanggid sa Dios, kag nagsiling sia sa ila nga kaupod niya nga: Manaog sila kag magkuha sang mga materyales kag maghimo sang duta nga mahimo naton puy-an;
Kag pagatilawan nila kita agud tan-awon kon himuon naton ang tanan nga mga butang nga isugo sa aton sang Ginuong Dios;
Kag kon aton tipigan ang aton nauna nga estado pagadugangan kita; kag kon indi naton matipigan ang aton nauna nga estado indi naton mabaton ang pareho nga himaya sadtong mga nagtipig sang ila nauna nga estado; kag kon tipigan naton ang aton ikaduha nga estado pagadugangan ang aton himaya sa wala’y katubtuban.2
Ang pagtipig sang aton ikaduha nga estado nagadepende sa aton paghimo sang mga kasugtanan upod sa Dios kag sa matutom nga paghimo sang mga katungdanan nga ginapangayo sa aton. Kinahanglan naton sang pagtuo kay Jesucristo bilang aton Manluluwas agud matipigan ang sagrado nga mga kasugtanan sa bug-os naton nga kabuhi.
Bangod si Adan kag si Eba napukan, maagyan naton ang mga pagsulay, pagtilaw, kag kamatayon bilang aton pangkabilugan nga palanublion. Apang, ang aton mapinalanggaon nga Amay nga Langitnon naghatag sa aton sang dulot sang Iya Hinigugma nga Anak, nga si Jesucristo, bilang aton Manluluwas. Inang dako nga regalo kag bugay sang Pagpasag-uli ni Jesucristo nagadala sang pangkabilugan nga palanublion: ang pangako sang Pagkabanhaw kag ang posibilidad sang kabuhi nga wala’y katapusan sa tanan nga nabun-ag.
Ang pinakadako sa tanan nga mga bugay sang Dios, nga amo ang wala’y katapusan nga kabuhi, mabaton lamang naton kon maghimo kita sang mga kasugtanan nga ginatanyag sa matuod nga Simbahan ni Jesucristo paagi sa Iya awtorisado nga mga alagad. Tungod sang Pagkapukan, kita tanan nagakinahanglan sang nagapangtinlo nga epekto sang bunyag kag sang pagtakdong sang mga kamot agud batunon ang dulot sang Balaan nga Espiritu. Ining mga ordinansa dapat hikuton sadtong mga nagakapot sang husto nga awtoridad sang priesthood. Dayon, upod ang bulig sang Kasanag ni Cristo kag sang Balaan nga Espiritu, sarang naton matipigan ang tanan nga mga kasugtanan nga ginhimo naton upod ang Dios, ilabi na gid ang mga gintanyag sa Iya balaan nga mga templo. Sa sina lamang nga paagi, kag upod sinang bulig, ang bisan sin-o sarang makaangkon sang iya kinamatarong sa palanublion bilang anak sang Dios sa isa ka pamilya sa katubtuban.
Sa pila nga nagapamati sa akon, ayhan daw halos isa na lamang ina ka wala’y katumanan nga damgo.
Nakita ninyo ang matinuohon nga mga ginikanan nga nagakasubo para sa ila kabataan nga nagsikway ukon nagpili nga supakon ang ila mga kasugtanan upod sa Dios. Pero ining mga ginikanan makasalapo sang kaumpawan kag paglaum gikan sa eksperiyensya sang iban nga mga ginikanan.
Ang mga anak nga lalaki ni Alma kag ni Haring Mosias nagbalik gikan sa masupog nga pagrebelde batok sa mga kasugtanan kag sa mga kasuguan sang Dios. Nakita sang Bata nga Alma ang iya anak nga si Corianton nga nagliso gikan sa sobra nga pagpakasala pabalik sa matinuohon nga pag-alagad. Ang Libro ni Mormon nagarekord man sang milagro sang mga Lamanhon nga nagbiya sang mga tradisyon nga kaugtan ang pagkamatarong padulong sa pagpakigsugot nga manginmatay agud mapadayon ang paghidaet.
Isa ka anghel ang ginpadala sa bata nga Alma kag sa mga anak ni Mosias. Nagpakita ang anghel tungod sa pagtuo kag mga pangamuyo sang ila mga amay kag sang katawhan sang Dios. Sa sining mga halimbawa sang gahum sang Pagpasag-uli nga nagahikot sa mga tagipusuon sang tawo, sarang ninyo mabaton ang kaisog kag kaumpawan.
Ang Ginuo naghatag sa aton sang tanan nga ginhalinan sang paglaum samtang nagatinguha kita nga buligan ang aton mga mahal sa kabuhi nga batunon ang ila wala’y katapusan nga palanublion. Nakapangako Sia sa aton samtang padayon kita nga nagatinguha agud tipunon ang mga tawo sa Iya, bisan pa nga ginapakigbatuan nila ang Iya pagpangagda sa ila. Ang ila pagpakigbato nagapasubo sa Iya, pero wala Sia nagapangampo, kag dapat kita amo man. Ginpahamtang Niya ang perpekto nga halimbawa para sa aton upod ang Iya tayuyon nga paghigugma: “Kag sa liwat, daw ano kasunson nga buot ko kuntani kamo nga panipunon subong sang isa ka munga nga nagapanipon sang iya mga piso sa idalom sang iya pakpak, huo, O kamong katawhan sang panimalay sang Israel, nga nalaglag; huo, O kamong katawhan sang panimalay sang Israel, kamo nga nagpuyo sa Jerusalem, subong sa inyo nga nalaglag; huo, daw ano kasunson nga buot ko kuntani kamo nga panipunon subong sang isa ka munga nga nagapanipon sang iya mga piso, kag indi kamo buot.”3
Sarang kita magsandig sa sinang wala’y pagpalya nga kaluyag sang Manluluwas nga dalhon ang tanan nga mga anak nga espiritu sang Amay nga Langitnon pabalik sa ila puluy-an kaupod Niya. Ang tagsa ka matinuohon nga ginikanan, lolo, kag kalolohan nagaupod sa sinang kaluyag. Ang Amay nga Langitnon kag ang Manluluwas amo ang aton perpekto nga mga halimbawa kon ano ang aton masarangan kag dapat himuon. Wala nila kita ginapuwersa nga mangin matarong tungod ang pagkamatarong dapat ginapili. Ginapakita Nila sa aton kon ano ang matarong, kag ginapakita Nila sa aton nga ang mga bunga sini manamit.
Ang tagsa ka tawo nga nabun-ag sa kalibutan nagabaton sang Kasanag ni Cristo, nga amo ang nagabulig sa aton nga makita kag mabatyagan kon ano ang husto kag kon ano ang sayop. Ang Dios nagpadala sang mortal nga mga alagad nga sarang magbulig sa aton, paagi sa Balaan nga Espiritu, nga makilala kon ano ang Iya buot ipahimo sa aton kag kon ano ang Iya ginadili. Ginahimo sang Dios nga makagalanyat ang magpili sang husto paagi sa pagpabatyag sa aton sang mga epekto sang aton mga pagpili. Kon pilion naton ang husto, masalapuan naton ang kalipayan—sa husto nga tion. Kon pilion naton ang malain, magaabot ang kasubo kag paghinulsol—sa husto nga tion. Ining mga epekto piho gid. Pero sa masami hungod ini nga ginapadugay-dugayan. Kon yara dayon ang mga bugay, ang pagpili sang husto indi magpatubo sang pagtuo. Kag tungod ang kasubo kon kaisa ginapadugayan man, nagakinahanglan sang pagtuo agud mabatyagan ang kakinahanglanon sa pagpangayo sang kapatawaran para sa sala sing mas temprano imbes nga pagkatapos na naton mabatyagan ang iya masubo kag masakit nga epekto.
Si Tatay Lehi nagpangasubo sa mga pagpili nga ginhimo sang pila niya ka kabataan kag sang ila pamilya. Isa sia ka dungganon kag maayo nga tawo—isa ka propeta sang Dios. Masami sia nga nagapanaksihon parte sa Manluluwas, nga si Jesucristo, sa ila. Isa sia ka halimbawa sang pagkamatinumanon kag pag-alagad sang gintawag sia sang Ginuo nga bayaan ang tanan niya nga kalibutanon nga manggad agud luwason ang iya pamilya sa pagkalaglag. Sa katapusan mismo sang iya kabuhi, nagapanaksihon gihapon sia sa iya kabataan. Pareho sa Manluluwas—kag wala’y sapayan sang iya gahum nga mahibaluan ang ila mga nabatyagan kag makita ang palaabuton alangay nga masubo kag manami—si Lehi padayon nga nagtan-ay sang iya mga kamot agud dalhon ang iya pamilya padulong sa kaluwasan.
Karon minilyon sa mga kaliwatan ni Tatay Lehi ang nagapakamatarong sang iya paglaum para sa ila.
Ano ang sarang naton himuon agud matun-an ang halimbawa ni Lehi? Sarang naton matun-an ang iya halimbawa paagi sa pagtuon sang balaan nga kasulatan sing mainampuon kag paagi sa pag-obserba.
Ginapanugyan ko nga binag-binagon ninyo ang malip-ot kag malawig nga resulta samtang ginatinguhaan ninyo nga ihatag ang palanublion sang paglaum sa inyo pamilya. Sa malip-ot nga panahon, may mga kabudlayan kag magabakas si Satanas. Kag may mga butang nga dapat gid hulaton sing mapinasensyahon, nga may pagtuo, nga nagasalig nga ang Ginuo nagagiho sa Iya nga tinion kag sa Iya paagi.
May mga butang nga sarang ninyo himuon sing temprano, kon magagmay pa ang inyo mga pinalangga. Panumduma nga ang adlaw-adlaw nga pangamuyo sa pamilya, pagtuon sang balaan nga kasulatan sa panimalay, kag pagpaambit sang aton panaksihon sa pang-sakramento nga miting mas mahapos kag mas epektibo kon magagmay pa ang kabataan. Ang magagmay nga kabataan sa masami mas sensitibo sa Espiritu sangsa pagdumdom naton.
Kon magdalagko na sila, madumduman nila ang mga himno nga ginkanta nila upod sa inyo. Mas labi pa gid sangsa pagdumdom sang musika, madumduman nila ang mga pulong sa balaan nga kasulatan kag ang panaksihon. Ang Balaan nga Espiritu sarang magpabalik sang tanan nga mga butang sa ila handurawan, pero ang mga tinaga sa balaan nga mga kasulatan kag sa mga himno ang magatiner gid sing madugay. Yadtong mga handurawan magaimpluwensya sa ila nga magbalik kon mapalayo sila sing makadali, basi sing tinuig man, gikan sa dalan papuli sa kabuhi nga wala’y katapusan.
Kinahanglan naton ang mas malawig nga panglantaw kon yadtong mga palangga naton nagabatyag sang impluwensya sang kalibutan kag ang pagduhaduha daw nagakulap sa ila pagtuo. May yara kita sang pagtuo, paglaum, kag putli nga gugma nga magagiya sa aton kag magpabakod sa ila.
Nakita ko ina bilang manuglaygay sa duha ka buhi nga mga propeta sang Dios. Sila mga indibidwal nga may magkatuhay nga mga kinaiya. Pero daw magkapareho ang ila tayuyon nga pagkapositibo. Kon may isa nga magpabutyag sang problema parte sa Simbahan, ang ila masami nga sabat amo ang “Ah, malampuwasan naton ina.” Mas madamo pa gani sila sang nahibaluan parte sa problema sangsa mga tawo nga nagpahibalo sang problema.
Nahibaluan man nila ang paagi sang Ginuo, kag gani pirme gid sila nga nagasalig sa Iya ginharian. Nahibaluan nila nga Sia amo ang pangulo. Nga Sia makagagahum sa tanan kag Sia nagaulikid. Kon tugtan ninyo Sia nga mangin lider sang inyo pamilya, malampuwasan gid ninyo ang tanan.
Ang pila sa mga himata ni Heinrich Eyring daw nagtalalang na. Pero madamo sa iya mga kaapohan ang nagakadto sa mga templo sang Dios sa 6:00 sang aga agud maghikot sang mga ordinansa para sa mga katigulangan nga wala nila makilala. Nagagwa sila tungod sa palanublion sang paglaum nga iya ginbilin. Nagbilin sia sang isa ka palanublion nga ginabaton sang madamo sa iya mga kaanakan.
Pagkatapos sang tanan nga aton mahimo upod ang pagtuo, ang Ginuo magapakatarong sang aton mga handum para sa mas dalagko nga mga bugay para sa aton nga pamilya sangsa aton mahunahuna. Gusto Niya ang pinakamaayo para sa ila kag para sa aton, bilang Iya mga anak.
Kita tanan mga anak sang buhi nga Dios. Si Jesus sang Nasaret amo ang Iya Hinigugma nga Anak kag amo ang aton nabanhaw nga Manluluwas. Iya ini Simbahan. Yari diri ang mga yabi sang priesthood, kag gani ang mga pamilya sarang mangin sa katubtuban. Amo ini ang aton bilidhon nga palanublion sang paglaum. Nagasaksi ako nga ini matuod sa ngalan sang Ginuong Jesucristo, amen.
© 2014 iya lang sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. English approval: 06/13. Translation approval: 06/13. Paglubad sang Visiting Teaching Message, May 2014. Hiligaynon. 10865 861