Mwe Usru Sacohk luhn Finsrak

Sel Prestuhn Henry B. Eyring

Mwet in Kahsruh Se Met ke Prestuhnsi Se Met

Ke kowos sulaclah lah kowos ac oruh kuh karihngihn sie olwelah nuh sin God, kowos sulaclah lah kowos ac fihliyac sie usru luhn finsrak nuh selos suc kuh in muh ukwe mwe srihkasrak lowos an.

Tamuhlwel ac tahmtahel wolacna wiyuck an, kuhtuh suwos suliyuck nuh ke miting se inge sin misineri ke Alu luhn Jisus Kraist luhn Mwet Luhlahlfongi ke Lwen-sahflah. Misineri ingacn sahp suli kowos tari in orwaclah sulaclah in oruh olweacng nuh sin God in pacptaislac.

Kuhtuh sahyac suwos lohng ke srihpen kowos insese nuh ke solsol se luhn pahpah ninac, kuh sahp sie tuhlihk, tahfweoht nuh suwos ke finsrak tuh kowos in sulaclah in oruh olweacng kowos orwaclah tari nuh sin God in sifilpac lohacng ke moul lowos an. Kuhtuh suwos suc lohng an sulaclah tari in fohlohk nuh yurun Mwet Lahngo ac kowos puhla mihsenge mwe engan ke pain Lal.

Finne suc kowos an ac oacna sie acn kowos oasr we an, kowos sruok in pouwos engan se luhn mwet puhs liki ma kowos kuh in motko kac ingena. Lwen nuhkwewa ac ao nuhkwewa kowos kuh in sulaclah in oruh kuh karihngihn sie olweacng nuh sin God.

Oacna sie acn kowos oasr we ke inkacnek soko in usrui mwe sang luhn moul ma pahtpaht, kowos sruok in pouwos pacl wowo in ahkkahlwemye nuh sin mwet puhs inkacnek nuh ke engan yohk. Ke kowos sulaclah lah kowos ac oruh kuh karihngihn sie olwelah nuh sin God uh, kowos sulaclah lah kowos ac fihliyac sie usru luhn finsrak nuh selos suc kuh in muh ukwe mwe srihkasrak lowos an.

Kowos ac nga ahkinsewowoyeyuck tari ke olwelah se ke kain usru se. Nga soemoul yohk ke engan luhk uh nuh sin mukul se nga tiacna ohsun nuh se ke moul suhkawihl. El sie tuhlihk muhkahimtacl suc fahsr ne el sie sin pahpah tuhman pahpah mahtuh tuhmuhk. El fihliyac nuh sihk mwe usru sacohk luhn finsrak. Lwelah ngan fahk nuh suwos kuhtuh ip ke kunohkohn in moul lal in orwaclah usru sacn nuh sihk.

Inel pa Heinrich Eyring. El isuslac nuh sin sie sucu kahsruhp. Pahpah tuhmwacl ah oasr lohm na luhlahp se sel fin acn Coburg, ke acn ma inge etweyuck muh Germany. Ninac kiyacl ah pa Viscountess Charlotte Von Blomberg, Viscountess ine fuhlwact se. Pahpah tuhmwacl ah mwet liyacacng acn luhn Tohkohsrah luhn acn Prussia.

Heinrich pa tuhlihk mukul se emet nahtuhl Charlotte ac Edward. Charlotte el misac ke el yac 31, tukun isuslah luhn tuhlihk ahktolu nahtuhl. Edward el misac tohkohyang, ke wacngihnlac nohfohn ma lal ac acn sel ac ma kahsruhp ke mani wacngihnlac ah. El matwac yac na 40. El som sislah tuhlihk muhkahimtahllac tolu nahtuhl ah.

Heinrich, pahpah tuhman pahpah mahtuh tuhmuhk ah, wacngihnlac kwewa pahpah ac ninac kiyacl ac sie usru na yohk se lal fin facluh. Wacngihn mani lal. El suhmuhslah ke sramsram mahtuh lal lah el puhla lah finsrak wo emet ke pacl fahsruh lal uh pa in som nuh America. El ne wacngihn sucu kuh kawuck lal we, oasr puhla luhn finsrak se lal in som nuh America. El som nuh New York City emet. Tohkoh el wi tuhlihk muhtwacn se wiyacl ah mukwi nuh St. Louis, Missouri.

Fin acn St. Louis, sie sin mwet weluhl orekma ah pa sie Mwet Luhlahlfongi ke Lwen-sahflah. Sel me el eis sie kapi ke sie puk srihsrihk sihmlac sel Elder Parley P. Pratt. El ritwelah na lutlut ke kahs nuhkwewa el kuh in eis ke Mwet Luhlahlfongi ke Lwen-sahflah uh. El pruhe in etuh fin pwacye lah oasr lipufacn ma sikyang nuh sin mwet uh, fin pwacye oasr sie mwet pahluh moul, ac fin pwacye el sokwack sie alu pwacye ac ahkkahlwemyeyuck.

Tukun mahlwem luo in lutlut wo ac pruhe, Heinrich el mwemwe muh fwackyuck nuh sel in pacptaislac. Mukul se suc inel ac wal luhn pristut la nga sruok ke mwe esam muhtahl, Elder William Brown, elan oruh akwuck sac. Heinrich el pacptaislac ke luhluh in kof ke af in Mahs 11, 1855, ke ao 7:30 ke lututacng ah.

Nga luhlahlfongi muh Heinrich Eyring el etuh na met lah ma nga luti kowos kac mihsenge uh pwacye. El etuh lah engan ke moul ma pahtpaht tuhkuh ke kuhpahsr luhn sucu se suc tuhtahflah ne tok ma pahtpaht. Finne ke pacl se el tuhfahna konwacack plwacn in engan luhn Leum ah, el etuh lah finsrak lal ke pwacr ma pahtpaht uh muhngngweyuck ke sulaclah sukohsohk luhn mwet sahyac in ukwe mwe srihkasrak lal. Finsrak luhn engan ma pahtpaht lal muhngngweyuck sin mwet suc soenna isuslac.

In ip se ke usru luhn finsrak luhn sucu lasr uh, el fihliyac sie sramsram mahtuh nuh sin mwet ke elaksraonak lal.

Ke ritiyacn sramsram mahtuh sacn nga puhlakihn luhngse lal nuh sesr suc ac ukwacl. Ke kahs lal nga puhla finsrak lal lah mwet ke elaksraonak lal fah sulaclah in ukwacl ke inkacnek soko ma ac fohlohk nuh lohm sesr inkuhsrao. El etuh lah ac tiac sie sulaclah yohk in oruh oacna tuhsruhk sulaclah srihsrihk pucspucs. Nga fahk kahs lal:

“Ke pacl se emet nga lohng sramsram lal Elder Andrus ah … nga wi pacl nuhkwewa nuh ke miting luhn Mwet Luhlahlfongi ke Lwen-sahflah ac pacl ma nga tiac kuh in wi miting ah puh, mweyen ma kunuck in wi miting inge.

“Nga suhmuhslah ma se inge ke sramsram mahtuh luhk tuh tuhlihk nuhtihk in etahi mwe srihkasrak luhk ac in tiac pihlesruh kunohkohn yohk srihpac se inge in tuhkweni nuh yurun Mwet Luhlahlfongi uh.”¹

Heinrich el etuh lah ke miting ke kuhfa luhn Leum uh kuht kuh in ahksasucye olwelah lasr in esam Mwet Lahngo pacl nuhkwewa ac eis Nguhn Lal in wi kuht.

Nguhn sac pa ahkkweyacllah ke misin se el tuh pahngyak nuh kac ke mahlwem na ekahsr tukun el insese nuh ke olweacng luhn pacptais ah. El fihliyac mwe usru lal ke mwe srikasrak lal in oaru nuh ke misin lal ke yac ohnkohsr ke acn ma met tuh pahngpahng Acn luhn Indian. In eis fihlfihllac lal ke misin lal, el fahsr Oklahoma lac nuh Salt Lake City, lusac mael 1,100 (1,700 km).

Tohkohyang na el pahngyak sin mwet pahluh luhn God in mukwi nuh lwacyacn epang Utah. Ke acn we el topuk siepac pahng in kuhlwacnsap ke sie misin ke acn sel Germany. Na el insese nuh ke solsol se sin sie Mwet Sap luhn Leum Jisus Kraist in kahsruh muhsahi acn sin un mwet luhn Mwet Luhlahlfongi ke Lwen-sahflah lwacyacn acir fin acn Mexico. Ke acn we el tuh pahngyak in ekihn misineri ke pacl nuhkwewa nuh Mexico City. El ahkfalyelah pahng ingacn. El misac puckpucki ke sie inkuclyuck srihsrihk e Colonia Juárez, Chihuahua, Mexico.

Nga tiac fahk ma pwacye inge ke srihpac ma in fahkkihn woiyacl kuh woiyacn ma el oruh ah kuh woiyacn mwet ke elaksraonak lal. Nga fahk kac in suhnakkuhnuhl ke mwe srihkasrak luhn luhlahlfongi ac finsrak ma oasr insiacl.

El inseselac nuh ke pahng ingacn ke srihpen luhlahlfongi lal lah Kraist moulyak ac Pahpah tuhmasr Inkuhsrao sikyang nuh sel Joseph Smith ke un sahk fin acn New York. El inseselac nuh kac ke srihpen oasr luhlahlfongi lal lah ki luhn Pristut ke Alu luhn Leum uh fohlohkihnyuckyak ke kuh se in siliyac sucu uh ne tok ma pahtpaht, fin oasr na luhlahlfongi fal lalos in karihngihn olweacng lalos.

In oacna Heinrich Eyring, mwet mahtuh luhk, kowos kuh in pa emet ke sucu lowos an in kol inkacnek nuh ke moul ma pahtpaht ma fahsr ke inkacnek luhn olweacng muhtahl oreklac ac karihngihnyuck ke oaru ac luhlahlfongi. Kais sie olweacng oasr kunohkohn ac olwelah kac. Nuh sesr nuhkwewa, oacna ke oasr sel Heinrich, kunohkohn ingacn kuhtuh pacl uh fihsrwacsr tuhsruhk kwacna upac. Tuhsruhk esam, kunohkohn uh enenuh in upac kuhtuh pacl uh mweyen srihpac la uh pa in pahtok kuht nuh met ke inkacnek in moul ne tok yurun Pahpah Lucng ac Wen Kuloh Nahtuhl, Jisus Kraist, ke sucu.

Kowos esam kahs ke puk lal Abraham:

God El ahkkahlwemye nuh sel Abraham lah oasr sie selos ma oacna God, ac El fahk nuh selos suc weluhl lah elos enenuh in som nuh ten ac orekmakihn kuhfa ingacn ac orwaclah facluh se ma kuht kuh in muhta we.

God El fahk lah elos ac srihke kuht in liye lah kuht ac kuh in oruh ma nuh kwewa ma Leum God lasr ac sapkihn nuh sesr uh.

“Ac kuht fin karihngihn lohm luhlahp se emet sesr; ac fah tuhtahflah pihsacsr, ac kuht fin tiac karihngihn lohm luhlahlp se emet sesr uh; ac fah wacngihn wolacna luhn facluh ke tohkohsrahi sefanna weluhlos suc karihngihn lohm luhlahp se emet selos uh; ac elos suc karihngihn lohm luhlahp se ahkluo selos an fah laisyucklac wolacna nuh selos ne tok ma pahtpaht.”²

Karihngihn lohm luhlahp ahkluo sesr uh muhngngweyuck nuh ke oruh luhn olweacng lasr nuh sin God ac oaru in oruh orekma enenweyuck kac sesr uh. Enenuh luhlahlfongi ke Jisus Kraist in oa Mwet Lahngo lasr in karihngihn olweacng muhtahl nuh ke lusacn moul uh.

Ke srihpen Adam ac Eve puhtatlac ah, oasr mwe sruhf, ma upac, ac misac in oacna mwe usru yohk lasr. Tuhsruktuh, Pahpah pahkotwen tuhmasr Inkuhsrao El acse nuh sesr mwe sang luhn Wen Kuloh Nahtuhl, Jisus Kraist, in ekihn Mwet Lahngo lasr. Mwe sang yohk sacn ac mwe insewowo ke Iwaclah luhn Jisus Kraist use mwe usru yohk: olwelah ke Sifil Moulyak sac ac kuh luhn moul ma pahtpaht nuh sin mwet nuhkwewa suc isuslac.

Mwe insewowo yohk liki nuhkwewa luhn God, moul ma pahtpaht, fah tuhkuh nuh sesr kuht fin oruh olweacng ma oasr ke Alu pwacye se luhn Jisus Kraist sin mwet kuhlwacnsap suc oasr kuh la Sel. Ke srihpen Puhtatlac sac, kuht nuhkwewa enenuh oruh luhn ahknwacsnwacs ke pacptais ac ke fihl po fin sifac in eis mwe sang luhn Nguhn Muhtahl. Akwuck inge enenuh in oreklac selos suc oasr kuh luhn pristut fal la. Na, ke kahsruh ke Nguhn luhn Kraist ac Nguhn Muhtahl, kuht kuh in karihngihn olweacng nuhkwewa kuht oruh nuh sin God, yohkna ke ma oasr lun tempuhl Lal. Ke inkacnek sac muhkwena, ac ke kahsruh sac, ma mwet nuhkwewa kuh in eis mwe usru suwohs lalos in ekihn tuhlihk nuhtin God ke sucu ma pahtpaht.

Nuh sin kuhtuh suc lohng fahk luhk uh, ma luhman apkuhran in sie mwemwe ma wacngihn finsrak kac.

Kowos liye tari pahpah ninac oaru ma ahsor sin tuhlihk ma kihpacklac kuh suc ma sulaclah in kuhnaus olweacng lalos sin God. Tuhsruhk pahpah ninac ingacn sokwack ahkpwacr ac finsrak ke ma puhlakihnyuck luhn kuhtuh pahpah ninac sahyac an.

Alma ac wen nahtuhl Tohkohsrah Mosiah auliyak ke fohlkahs upac nuh ke olweacng ac masap luhn God. Alma Fuhsr el liyacack tuhlihk mukul nahtuhl suc pa Corianton ke el eklac liki orekma koluk nuh ke kuhlwacnsap oaru. Puk luhn Mormon suhmuhslah pac mwenmwen luhn mwet Laman ma tilac orek ke facsin luhn srahngwesroa ke ma suwohswohs in olweacng in misac in karihngihn mihs ah.

Lihpufacn se tuh suhpweyucklac nuh yohrohl Alma fuhsr ac wen nahtuhl Mosiah. Lihpufacn sac tuhkuh ke srihpen luhlahlfongi ac pruhe luhn pahpah tuhmwaclos ac sin mwet luhn God. Ke mwe srihkasrak ingacn ke kuh luhn Iwaclah mokle insiacn mwet uh, kowos kuh in eis puhlaik ac ahkpwacr.

Leum El acse tari nuh sesr ma nuhkwewa ke finsrak ke kuht kampare in kahsrwelos suc kuht luhngse in insese nuh ke mwe usru ma pahtpaht lalos. El orwaclah tari olwelah nuh sesr ke kuht srihke in orwacni mwet uh nuh Yohrohl, finne ke elos sruhnga mwe solsol Lal in oruh. Sruhnga lalos ahksuhpwacryacl, tuhsruhk El tiac fuhlweack, ac kuht tiac pac enenuh in fuhlweack. El orwaclah mwe srihkasrak wowo se nuh sesr ke luhngse tiac tui Lal: El fahk nuh sin mwet Israel lah El ac orwacltahlweni oacna ke won muhtwacn se orwacni won nahtuhl ye pahol uh. El ac orwacni mwet Israel weacng mwet ma misac America ke pacl se El misac ah ac elos suc muhta Jerusalem-oacna ke won muhtwacn se orwacni won nahtuhl, tuhsruhk elos ac tiac lwelah nuh Sel.³

Kuht kuh in muhngnguh kena ma tiac kuh in tiac oreklac luhn Mwet Lahngo in fohlohkohnma nohfohn tuhlihk nguhn nuhtin Pahpah Lucng nuh lohm selos nuh Yohrohl. Pahpah ninac, pahpah ninac mahtuh, pahpah ninac kiyacn pahpah ninac mahtuh oaru nuh kwewa akacsruhi ke kena sacn. Pahpah Lucng ac Mwet Lahngo pa mwe srihkasrak suwohs lasr ke ma kuht kuh ac enenuh in oruh uh. Elos tiac wi kwacfe kuht in oruh sulaclah suwohswohs ke srihpen ma suwohswohs uh enenuh in suleyucklac. Elos oruh kuht in kuh in akihlen ma suwohswohs uh, ac Elos lwelah kuht in liye engan sacn tuhkuh ke sulaclah suwohswohs.

Mwet nuh kwewa isuslac nuh facluh eis Kahlwem luhn Kraist, suc kahsrwe kuht in liye ac puhla ma pwacye ac ma suhtuhuh. God El suhpwacma mwet kuhlwacnsap moul suc kuh, ke Nguhn Muhtahl, in kahsrwe kuht akihlen ma El acse kuht in oruh ac ma El sruhnga. God El oruh in kahto in sulaclah ma pwacye ke El lwelah kuht in puhla usrwen sulaclah lasr uh. Kuht fin sulaclah ma pwacye, kuht ac sokwack engan—ke pacl fal. Kuht fin sulaclah ma koluk, ac oasr ahsor ac welah—ke pacl fal. Usrac ingacn pwacye. Tuhsruhk elos kwacna kohtlah ke sie srihpac. Mwe insewowo uh fin sana, sulaclah ma pwacye uh ac tiac muhsahi luhlahlfongi. Ac ke ahsor uh pac kuhtuh pacl uh kohtlah yohk, enenuh in oasr luhlahlfongi in puhla enenuh se in sana suk nuhnak muhnahs ke ma koluk likina tukun kuht puhla usrwen ahsor ac ngal kac.

Pahpah Lehi el ahsor ke sulaclah oreklac sin kuhtuh sin wen nahtuhl ac sucu lalos. El mukul wowo ac suwohswohs se—mwet pahluh se luhn God. El kwacna fahkwack ke Mwet Lahngo lasr, Jisus Kraist, nuh selos. El mwe srihkasrak se ke ahkostwen ac kuhlwacnsap ke Leum El pahnglol in som liki ma luhn facluh nuh kwewa lal in molwelah sucu lal in tiac kuhnausyucklac. Ke sahflahiyacn moul lal, el srackna fahkwack nuh sin tuhlihk nahtuhl. Oacna Mwet Lahngo—ac macnsiskuhnlah kuh lal in mokle insiaclos ac in liye pacl fahsruh uh kwewana ahsor ac wolacna—Lehi el ahsroelah pahol in kohllah sucu lal nuh ke molwelah.

Mihsenge mwet miliacn ke elaksraonak lal Pahpah Lehi ahkpwacyeye finsrak lal nuh selos.

Meac kowos ac nga kuh in oruh in lutlutkihn mwe srihkasrak lal Lehi uh? Kuht kuh in eis ke mwe srihkasrak lal ke pruhe in lutlutkihnyacn ma suhmuhslah ac in tuni.

Nga muh kowos in nuhnkuh kwewa ke pacl fototo ac pacl loeloes ke kowos ac srihke in sang mwe usru luhn finsrak nuh sin sucu lowos an. Ke pacl fototo, ac fah oasr pacl upac ac Setuhn elac srihfe kuht yohk. Ac oasr ma in mongfihsracsr tuhpan, ke luhlahlfongi, in etuh lah Leum El oruh ke pacl Lal ac ke ohiyac Lal sifacna.

Oasr ma kowos kuh in sana oruh, ke mwet kowos luhngse an fuhsr uh. Esam lah pruhe luhn sucu pengana lwen, lutlutkihn ma suhmuhslah luhn sucu, ac akacsruhi ke fahkwack luhlahlfongi lasr ke toeni ke kuhfa luhn Leum uh fihsracsruh ac wolac kuhtuh ke tuhlihk uh fuhsr uh. Tuhlihk fuhsr uh kwacna acsmak yohk nuh ke Nguhn likina akihlen lasr.

Ke elos mahtuhlah uh, elos fah esam on ma elos wikowos yuck ah. Finne yohk liki esam on an, elos fah esam kahs luhn ma suhmuhslah ac fahkwack luhlahlfongi. Nguhn Muhtahl kuh in use ma nuh kwewa nuh ke esam lalos, tuhsruhk kahs ke ma suhmuhslah ac on in alu fah oan paht. Mwe acsmakihn uh fah moklwaclos in fohlohk ke elos fahsr tuhlac ke kihtin pacl uh, kuh pac in sun lusen yac, liki inkacnek nuh lohm ah nuh ke moul ma pahtpaht.

Kuht ac enenuh nuhnak nuh ke pacl loeloes ke mwet kuht luhngse uh puhla mokleyuck luhn facluh ac puhla luhn suhmuhngnguh luhman ahkupacye luhlahlfongi lalos. Oasr luhlahlfongi, finsrak, ac luhngse pwacye lasr in kol kuht ac in ahkfokokoye kuht.

Nga liye tari kac ke nga ekihn mwet in kahsruh se nuh sin luo sin mwet pahluh moul luhn God. Elos kais sie mwet ma siena ohiyaclos. Tuhsruhk elos akacsruhi ke sie luhlahlfongi tiac tui. Ke mwet se ac sruhkwack fahk elyah lah ke sie ma ke Alu uh, top lalos an kwacna ohinge “O, ma nuh kwewa ac wo.” Elos inkaiyacn pacl uh etuh yohk ke elyah sacn likina mwet ma fahk kac an.

Elos etuh pac inkacnek luhn Leum, ac oruh elos finsrakkihn pacl nuhkwewa ke tohkohsrahi Lal. Elos etuh lah El kol Alu Lal uh. El kuh liki nuhkwewa ac El elyahkihn ma uh. Kowos fin lwelah nuh Sel in mwet kol se ke sucu lowos an, ma nuhkwewa ac oreklac fal.

Kuhtuh sin mwet ke elaksraonak lal Heinrich Eyring uh tiac ukwe ma suwohswohs uh. Tuhsruhk puhs sin tuhlihk nuhtin tuhlihk nuhtin nahtuhl som nuh ke tempuhl luhn God ke ao 6:00 ke lututacng in oruh akwuck luhn mwet mahtuh somlah suc elos soenna ohsun nuh se. Elos som ke srihpen mwe usru luhn finsrak ma el fihliyac. El fihliyac sie mwe usru ma fwackyuck tari sin mwet elaksraonak puhs lal.

Tukun ma nuhkwewa kuht kuh in oruh ke luhlahlfongi uh, Leum Elac fah ahkpwacyei finsrak lasr uh nuh ke mwe insewowo yohk nuh sin sucu lasr liki na motkweyac sesr. El luhngse ma ac wo emet nuh selos ac nuh sesr, in ekihn tuhlihk Nahtuhl.

Kuht nuhkwewa tuhlihk nuhtin God moul se. Jisus luhn Nazareth pa Wen Kuloh Nahtuhl ac Mwet Lahngo moulyak se lasr. Pa inge Alu Lal uh. Ke Alu se oasr ki luhn pristut, ac oruh sucu uh kuh in ma ne tok ma pahtpaht. Pa inge mwe usru sacohk luhn finsrak lasr uh. Nga fahkwack lah ma inge pwacye ke inen Jisus Kraist, amen.