Sohso Kesempwal en Koapwoaroapwoar

Sang President Henry B. Eyring

Sounsawas Keieu nan Presidensi Keieu

Ni ansou me kumwail kin pilada en wiahda de kolokol inou rehn Koht, kumwail pilada ma kumwail pahn pwilikihdi sohso en koapwoaroapwoar ong irail akan me kakete idawehn amwail karasaras.

Riei oholoko oh lihoko, ekei kumwail lukodohng mihting wet sang misineri kan en Mwomwohdiso en Sises Krais en Souleng en Imwin Rahn Akan. Misineri pwuko mwein lukeikumwailehr en wiahda pilipil en inouiong Koht sang ni pepdaisla.

Ekei kumwail wie rongorong pwehki kumwail alehda luk en pahpa nohno, amwail pwoud, de mwein serihmen, me kohieng kumwail ni kesikpen me kumwail pahn pilada en kapwurehieng inou kan me kumwail wiahdahier rehn Koht en pwurehng wia poahsoan en amwail mour. Ekei kumwail me rongorong wiahdahier pilipilo en pwurala idawehn Sounkomouro oh kin pehm rahn wet duwen peren en Sapwellime kasamw.

Mendahte ihs kumwail oh iawasa kumwail mih ie, kumwail kolokol nan pehmwail kan peren en aramas tohtohsang me kumwail kak leme. Rahn koaros oh awa koaros kumwail kak pilada en wiahda de kolokol inou rehn Koht.

Sohte lipilipil wasa me kumwail mih pohn ahl en sohsohki kisakis en mour soutuk, kumwail ahniki ansou mwahu en kasalehieng aramas tohto ahl ong laudilahn peren. Ni ansou me kumwail kin pilada en wiahda de kolokol inou rehn Koht, kumwail pilada ma kumwail pahn pwilikihdi sohso en koapwoaroapwoar ong irail akan me kakete idawehn amwail karasaras.

Kumwail oh ngehi kapaikidahr inoupen soangen sohso wet. I pweipwandohng ohl emen me I sohte tuhwong nan mour wet pwehki ahi peren nan mour wet. Ih seri sopwoupwou men me wia emen ahi pahpa kahlapo. E pwilikihdiengie sohso kesempwal en koapwoaroapwoar. I en ndahieng kumwail mahs ah pali nan wiahda sohsohu ong ie.

Ede Heinrich Eyring. E ipwidiong nan kepwehpwe laud. Ah pahpao, Edward, ahniki sahpw oh ihmw laud nan Coburg, me met iei Sehmeni. Ah nohnohu iei Viscountess Charlotte Von Blomberg. Ah pahpao kin apwalih sapwen nanmwarki en Prussia.

Heinrich iei nein Charlotte oh Edward pwutak mesenih. Charlotte mehla ni eh sounpar 31, mwurin ipwidi en nah seri kesilimeno. Edward mehla sohte pwand mwuri, murin koaros ah dipwisou oh pai salongasang ih mwurin pesnes me sapwungala. E sounparete 40. E mehsang seri silimen me sopwoupwoula.

Heinrich, ahn ahi pahpa kahlap eh pahpa, salongasang ih ah nohno pahpa oh kepwehpwe laud en sampah. Sohte nah sent te ehu. E kilelehdi nan ah poadoapoad me e pehm me ihte ah koapwoaroapwoar iei en kohla America. Mendahte eh sohte ah peneinei de kompoakapah wasao, e ahniki pepehm en koapwoaroapwoar me pid kohla America. E tepida mahs kohla New York City. Mwuri e kosoula St. Louis, Missouri.

Nan St. Louis, emen ienge tohndoadoahk iei Souleng en Imwin Rahn men. Sang reh e alehdi koapi en kisin pwuhk ehu me ntingda sang Elder Parley P. Pratt. E wadek oh eri onopiki nting koaros me e kak alehdi me pid Souleng en Imwin Rahn Akan. E kapakapiki en ese ma mehlel mie tohnleng me kin pwarohng aramas, ma mie soukohp ieias, oh ma e diarehr sarawi ehu me mehlel oh me kokohpda.

Mwurin sounpwong riau en onop ni keneinei oh kapakap, Heinrich ouraman me e alehdi kaweid me e pahn pepdaisla. Ohl emen me ede oh ah priesthood I tamataman ni wahu, Elder William Brown, me pahn wia tiahk sarawio. Heinrich pepdaisla nan kisin leh en pilen kotou ni March 11, 1855, ni kuloak 7:30 nihmenseng.

I kamehlele me Heinrich Eyring ese ansouo me dahme I padapadahkihong kumwail rahn wet mehlel. E ese me peren en mour soutuk kin kohdohsang selin nan peneinei me kin doula kohkohlahte. Lella ansou me e ahpwtehn diarada sapwellimen Kauno pilahn en peren, e ese me ah koapwoaroapwoar en ahniki peren soutuk pahn pahsan pilipil siluh en idawehn sapwellime karasaras. Sapwellime karasaras en peren soutuk pahsan aramas me saikinte ipwidi.

Ni eh wia kisehn ahn aht peneinei sohso en koapwoaroapwoar, e kihdieng kadaukokehkan poadoapoad ehu.

Nan poadoapoado I kak kehn ah limpoak ong kiht kan me pahn kohdo mwuri. Nan ah mahsen I kak kehn ah koapwoaroapwoar me kadaudokehkan kakete pilada en idawehn ih pohn ahl en pwuralahng nihmwatailo nanleng. E ese me e sohte pahn wia ehu pilipil laud ahpw me tohto me tikitik. I pahn wadawad sang ah poadoapoad:

“Sangete ahi tepin rong Elder Andrus mahsen” … I kin ansou koaros towe mihting en Souleng en Imwin Rahn Akan oh ansou kan malaulau mehlel, me I sohte kohla ni mihting, ni eh wia ansouohte ahi pwukoa en kohla.

Ni ahd met iei ahi poadoapoad pwe nei serihkan en kak alasang ahi karasaras oh sohte pohnsehsehla met … pwukoa kesempwal wet [en patpene] rehn Souleng kan.”¹

Heinrich ese me nan mihting en kamadipw sarawi kitail kak weliakapw atail inou en kin tamataman Sounkomouro ansou koaros oh ahniki Sapwellime Ngehn en kin ketiket rehtail.

Iei Ngehno me utungada ih nan misin me e malipilipohng sounpwong te depe mwurin ah alehdi inou sarawi en pepdais. E pwilikihdi ni duwen ah sohso ah karasaras en loaloapwoatohng ah misin erein sounpar weneu me e malipilipohng Indian Territories. Pwehn alehdi nah kisin likoun kakommoaldihsang misin, e sapalasang Oklahoma lel Salt Lake City, me dohki mweinele mwail 1,100 (1,770 km).

Sohte pwand mwuri e malipilipda sang soukohp en Koht en kosoula paliepeng en Utah. Sang mwo e alehda pil ehu malipilip en papah nan misin nan uhdahn sapweo Sehmeni. Ih eri pil alehdi luhko sang Wahnpoaron men en Kaun Sises Krais en sawas kauwada kahnihmw en Souleng en Imwin Rahn Akan nan Mexico. Sang mwo e malipilipohng Mexico City en pwurehng wia misineri. E kapwaiada ni wahu pwukoa malipilip pwukat. Paliwere nekinekdi nan kisin sousou nan Colonia Juárez, Chihuahua, Mexico.

I kihda mepwukat kaidehn pwehn nda me e kesempwal de pwehki dahme e wia de pwehki kadaudokehkan. I nda ire mehlel pwukat pwehn kawahuih ih pwehki ah karasaras en pwoson oh koapwoaroapwoar me mihmi nan ah mohngiong.

E alehda pwukoa ko pwehki ah pwoson me Krais iasadahro oh Samatail Nanleng pwarohng Joseph Smith nan welin tuhke ieu nan kahnihmw en New York. E alehda pwehki e pwoson me kih kan en priesthood nan sapwellimen Kauno Mwomwohdiso kopwurupwurdohr iangahki manaman en katengehpene peneinei kohkohlahte, ma re kakete ahniki pwoson en kolokol arail inou kan.

Duwehte Heinrich Eyring, ahi peneineio, kumwail me mwein wia tepin nan amwail peneinei en tiengla nan ahl ong mour poatoapoat en inou sarawi kan me wiawihda oh kolkoldi ni ngoang oh pwoson. Ehuehu inou kin iangahki pwukoa kan oh inou kan. Ong kitail koaros, pil duwehte ong Heinrich, pwukoa ko kin ekei pak mengei ahpw kin kalapw apwal. Ahpw taman, pwukoa kan uhdahn anahne ekei pak apwal pwehki arail pwukoa iei en kamwakidkitail pohn ahlo en mour poatoapoat rehn Sahm Nanleng oh Sapwellime Iehros Kempoake, Sises Krais, nan peneinei.

Kumwail taman mahsen sang pwuhk en Abraham:

Koht kasalehieng Abraham me mie emen nanpwungatail me duwehte Koht, oh E mahsanihiong irail me pato Reh me re en kohdihla oh ale dipwisou ko oh wiahda ehu sampa wasa me irail kak kousoan;

Koht mahsanih me re pahn song kitail en kilang ma kitail pahn wia mehkoaros me Kauno atail Koht pahn mahsanihong kitail.

Oh ma kitail pahn kapwaiada atail irair keieuo me laudsang pahn kohieng kitail, oh ma kitail sohte kapwaiada atail irair keieuo kitail sohte pahn ahniki kilohri nan wehiohte rehn irail me kapwaiada arail irair keieuo, oh irail akan me kapwaiada arail irair keriauo pahn alehdi kilohri pohn moangarail kan kohkohlahte.²

Kolokol atail irair en mour keriau pahn pahsan atail wiahda inou rehn Koht oh kapwaiada ni loaloapwoat pwukoa kan me re anahne sang kitail. E kin anahne pwoson Sises Krais ni duwen atail Sounkomour pwehn kolokol atail inou sarawi kan erein mour unsek.

Pwehki Adam oh Ihp pwupwidi, kitail ahniki kasongosong, kahpwal, oh mehla en wia atail koaros sohso. Ahpw, Samatail Nanleng limpoak ketikihieng kitail kisakis en Sapwellime Iehros Kempoake, Sises Krais, en wia atail Sounkomour. Kisakis oh kapai lap wo en Tomw en Sises Krais kin wahdo sohso ong koaros: inoupen Iasada oh mour soutuk eh kak pweida ong koaros me ipwidi.

Sapwellimen Koht kapai keieu lap, mour soutuk, pahn kohdohng kitail ihte ni atail kin wiahda inou kan me kohda nan Mwomwohdiso mehlel en Sises Krais sang rehn Sapwellime tohnpapah mweimwei kan. Pwehki pwupwulao, kitail koaros anahne lipwen kamwakel en pepdais oh kepwilipwildien peh kan pwehn alehdi kisakis en Ngehn Sarawi. Tiahk sarawi pwukat uhdahn anahne kohda sang me kolokol priesthood ni mweimwei. Eri, sang ni sawas en Marain en Krais oh Ngehn Sarawi, kitail kak kolokol koaros inou kan me kitail kin wiahda rehn Koht, ni mehlel mwohkan me kin kohda nan Sapwellime tehnpas sarawi kan. Ihte ni wiepe wet, oh sang ni sawas wo, me aramas emen kak alehda ah pwungen sohso ni duwen seri en Koht nan peneinei ehu kohkohlahte.

Ong ekei me rongorong ie, met kak mwomwen wia ouraman me sohte koapwoaroapwoarpe.

Kumwail kilangehr pahpa nohno pahtouki serihkan me soikala de me pilada en kauwehla arail inou kan rehn Koht. Ahpw pahpa nohno pwuko kak ahniki peren oh koapwoaroapwoar sang irair teikan me re lelohngehr.

Nein Alma pwutako oh nein Nanmwarki Mosiah pwutangko pwurasang mwekid lemei en uhwongada inou kan oh kosonned akan en Koht. Alma me Pwulopwulo kilangada nah pwutak Corianton sohpeisang dihp laud ong papah loaloapwoat. Pwuken Mormon pil kilelehdi manaman en mehn Lamanite kan ahr pwilikihdi arail tiahk en kailongki mour pwung oh uhd inouki en mehla pwehn kolokol meleilei.

Tohnleng men poahngoklahng Alma me Pwulopwulo oh nein Mosiah pwutangkan. Tohnlengo kohdo pwehki pwoson oh kapakap en arail pahpa ko oh en aramas akan en Koht. Sang karasaras pwuko en manaman en Tomwo wie doadoahk nan mohngiong en aramas, kumwail kak alehdi kangoang oh kaloalamwahu.

Kauno ketikihieng kitail koaros utuhn koapwoaroapwoar ni atail nannantihieng en sewese irail akan me kitail poakohng alehda arail sohso soutuk. E wiahda inou kan ong kitail ni atail kin songosongete en kihpene aramas ong Ih lella ni ansou me re kin soikala Sapwellime luhk en wia met. Arail kin soikala kin kapahtouwih, ahpw E sohte kin uhdi, oh kitail sohte pil konehng. E wia karasaras unsek ong kitail sang ni Sapwellime limpoak tengeteng: Oh pwurehng, ia uwen dir en ahnsou me I kin kolkumwaildi duwehte litok me kin kihieng nah pwurok pahn peh, aramas en tehnpas en Israel, me pwupwudihier; aramas en tehnpas en Israel, me kin mih Serusalem, ehng, ia uwen dir en ahnsou me I kin kolkumwaildi duwehte litok me kin kihieng nah pwurok pahn peh.³

Kitail kak koapwoaroapwoarki kupwuren Sounkomouro me sohte uhdi en wahdo koaros seri ngehn en Sahm Nanleng pwuralahng nihmwarailo Reh. Koaros pahpa nohno, pahpa nohno kahlap, oh ahr pahpa nohno loaloapwoat iang kupwuriki met. Sahm Nanleng oh Sounkomouro iei karasaras unsek en dahme kitail kak wia oh anahne wia. Ira sohte pahn itonehng kitail mour pwung pwehki mour pwung uhdahn anahne wia pilipil ehu. Ira kin wiahda mour pwung en kak sansalohng kitail, oh Ira kin mweidehng kitail en kilang me wah kan iou.

Aramas koaros me ipwidiong sampah kin alehdi Marain en Krais, me kin seweseikitail kilang oh pehm dahme pwung oh dahme sapwung. Koht ketin kadarodo sounpapah aramas me kak, sang ni Ngehn Sarawi, seweseikitail kasawiada dahme E ketin kupwuriki kitail en wia oh dahme E ketin irehdi. Koht ketin wiahda en lingan en pilada me pwung sang ni mweidehng kitail pehm lipwen atail pilipil kan. Ma kitail pahn pilada me pwung, kitail pahn diar peren—ansou me konehng. Ma kitail pilada mour suwed, e pahn kohdo pahtou oh koluhla—ansou me konehng. Lipwehkan uhdahn pahn kohdo. Ahpw re kin kalapw kapwandala pwehki kahrepe ieu. Ma kapai kan mwadang, pilada me pwung sohte pahn kakairada pwoson. Oh pwehki pahtou pil kin ekei pak kapwandala mehlel, e kin anahne pwoson pwehn pehm anahnepen repen mahk pwehki dihp ansou mwadang ah kaidehn mwurin atail kehn lipwe kapahtou oh kamedek kan.

Pahpa Lehi pahtoukihla pilipil me ekei nah pwutangko oh arail peneinei wiahda. Ih ohl lap oh mwahu men—soukohp men en Koht. E kin kalapw kadehdehki duwen atail Sounkomouro, Sises Krais, ong irail. Ih iei karasaras en peik oh papah ni ansou me Kauno malipe en kohkohsang ah dipwisou kan koaros en sampah oh doarehsang ah peneinei kamwomwmwomwala. Ni imwin ah mour, e wie kadehdehte ong nah serihkan. Duwehte Sounkomouro—oh mendahte eh ahniki manaman en kasawiada mohngiongirail oh en kilang dahme pahn kohdo ehu rahn, koaros me kansensuwed oh me kaperen—Lehi kapahpesengete peh kan pwehn wahdo ah peneinei ong komour.

Rahn wet rar kei en kadaudok en Pahpa Lehi kapwaiadahr ah koapwoaroapwoarkinirail.

Dahme kumwail oh ngehi kak wia pwehn alasang ahn Lehi karasaras? Kitail kak alasang sapwellime karasaras ni onopiki pwuhk sarawi ni kapakap oh ni tetehk wasa.

I men kumwail en medewe ahl mwotomwot oh me reirei ni amwail pahn kihieng amwail peneinei sohso en koapwoaroapwoar. Nan ahl mwotomwot, e pahn mie kahpwal oh Sehdan pahn wer laud. Oh mie soahng kan kumwail en awih ni kanengamah, ni pwoson, ese me Kauno kin ketin mwekid ni pein sapwellime ansou oh ni Sapwellime koasoandi.

Mie soahng kan me kumwail kak wia mwadang, ni ansou me irail me kumwail poakohng pwulopwulte. Taman me kapakap en peneinei, onop pwuhk sarawi rahn koaros, ehukihda kadehde nan mihting en kamadipw sarawi kin mengeisang oh ahpwete lipwan ansou me serihkan pwulopwul. Seri pwulopwul kin kalapw kak pehm Ngehno laudsang me kitail leme.

Ni arail pahn laudila, irail pahn taman koul en sarawihkan me re kouliki rehmw. Laudsang tamanda ngilen koulo, irail pahn taman mahsen en pwuhk sarawi oh kadehde. Ngehn Sarawi kak katamando mehkoaros, ahpw mahsen en pwuhk sarawi oh koul en sarawihkan pahn keieu werei. Mehn ketemen pwuko pahn wia sahl me kakete kapwureiraildo ni ahr kin dohla ansou kis, mwein sounpar, sang ahl kolahng mour soutuk.

Kitail pil anahne kilang ahl reireio ni ansou me irail akan me kitail poakohng kin kehn weweik sang sampah oh depwek en peikasal me kin powehdi arail pwoson. Kitail ahniki pwoson, koapwoaroapwoar, oh limpoak unsek pwehn kaweid kitail oh kakehlailih irail.

I kilangehr met ni ei wia sounsawas emen ong soukohp ieias riemen en Koht. Re wia aramas me wekpeseng. Ahpw ira mwomwen ahnikipene ehute soangen koapwoaroapwoar tengeteng. Ni ansou me aramas kin keperkinkitail mehkot nan Mwomwohdiso, pali laud en ansou pasapengo iei “Oh soahng koaros pahn pweida.” Re kin kalapw ese duwen kahpwalo laudsang aramas kan me kihkihda kepero.

Re pil ese wiepen Kauno, oh eri re kin ansou koaros koapwoaroapwoarki Sapwellime wehi. Irail kin ese me ih me moangehda. E ahniki manaman unsek oh E ketin nsenoh. Ma komw pahn mweidehng Ih en wia kaun en amwail peneinei, soahng koaros pahn pweida.

Ekei kadaudoken Heinrich Eyring mwomwen dohlahsang ahlo. Ahpw tohto nein nein nah kan serihkan kin kohla nan tehnpas sarawihkan en Koht ni kuloak 6:00 nihmenseng pwehn kapwaiada tiahk sarawi kan ong arail peneinei kan me re sohte ese. Irail kin kohla pwehki sohso en koapwoaroapwoar me e kihdieng irail. E ketikihdi sohso ehu me kak en alahlda sang tohto kadaudoke kan.

Mwurin mehkoaros me kitail kak wia, Kauno pahn kapwaiada atail koapwoaroapwoarki kapai kan me laudsang me kitail kak kasik ong atail peneinei kan. E kupwuriki me keieu mwahu ong kitail, Sapwellime serihkan.

Kitail koaros sapwellimen Koht ieias. Sises en Nasared iei Sapwellime Iehros Kempoake oh atail Sounkomour iasadahr. Met iei Sapwellime Mwomwohdiso. Kih kan en priesthood mih loale, oh eri peneinei kan kak patpene kohkohlahte. Met iei atail sohso kesempwal en koapwoaroapwoar. I kadehdehki me e mehlel ni mwaren Kauno Sises Krais, ahmen.