Limpoak—Mour en Rongamwahuo

Sang President Thomas S. Monson

Kitail sohte kak uhdahn poakohng Koht ma kitail sohte poakohng iengetail sounseiloak kan nan seiloak wet en mour.

Riei ohl oh lih akan, ni ansou me atail Sounkomouro kalohk rehn aramas, sounkawehwehn kosonnedo patohwanohng, “Maing Sounpadahk, mehnia kosonned nan pelien Kosonnedo me keieu kesempwal?”

Madiu kilelehdi me Sises ketin sapengki:

“Ke pahn poakohng Kauno omw Koht, sang nan kapehdomw unsek, sang ni ngenohmw unsek, sang ni omw lamalam koaros unsek.”

“Ih met kosonned me keieu lapalap oh kesempwal.

“A me keriaun kesempwal, me rasehngete met, iei: ‘Ke pahn poakohng mehn mpomw duwen omw kin poakohng pein uhk.”¹

Mark kilelehdi mahsen en Sounkomouro ni keimwseklan irairo: “Sohte ehu kosonned mie me kesempwalsang mepwukat.”²

Kitail sohte kak uhdahn poakohng Koht ma kitail sohte poakohng iengetail sounseiloak kan nan seiloak wet en mour. Duwehte, kitail sohte kak uhdahn poakohng iengetail aramas kan ma kitail sohte poakohng Koht, Semen kitail koaruhsiehn. Wahnpoaron Sohn mahsanihong kitail, “Eri, iet kosonned me Krais ketikiongkitailehr; mehmen me kin poakohng Koht, en pil poakohng rie.”³ Kitail koaros iei seri ngehn en Samatail Nanleng, oh pwehki met, kitail ohl oh lih pirien. Ni atail pahn tamataman mehlel wet, poakohng koaros Sapwellimen Koht serihkan pahn mengeila.

Ni mehlel, limpoak iei mour en rongamwahuo, oh Sises Krais iei atail Mehn Kahlemeng. Sapwellime mour iei sohso en limpoak. Me soumwahu E ketin kamwahuiala; me apwal E ketin sewesehda; me dipan E ketin komourala. Ni imwilao pwihn en aramas lingeringer kihsang Sapwellime mour. Ahpw mahsen pwukat kin peidohsang dohl en Kolkoda: “Semei, Komw ketin mahkohng irail, pwe re sehse dahme re wiewia”⁴—kasalada ileile nan mour wet me pid nsenoh oh limpoak.

Mie mwohmw tohto me wia kasalepen limpoak, rasehng kadek, kanengamah, tohnmetei, wehwe, oh mahk. Nan atail ehupene kan koaros, mwohmw pwukat oh me duwehte pahn sawas kasalehda limpoak en nan mohngiongitail.

Atail limpoak kin kalapw sansalda nan atail ehupene kan ong emenemen nan ehuehu rahn. Me pahn inenen kesempwal iei atail koahiek en kasawiada ahn aramas emen anahn oh eri mwekidki. I kin kesempwaliki sangete mahs madamadau me sansal nan ngihs mwotomwot wet:

I sengisengehr nihpwong
Pwehki ei sohte kilang wasa mwahu
Me anahn en aramas wiahda I en masukun;
Ahpw I saikinte 
Pehm I en koluhkihla 
Ahi ekiste nohnla kadek.5

Me kerendohte I esehda duwen mwekid kapehm en kadek limpoak—ehu me imwilao sohte kesikpe. Pahro iei 1933, ansou me pwehki Apwal Laudo, doadoahk inenen apwal. Wasao iei pali mese en United States. Arlene Beisecker ahpwtehn kesepwilsang high school. Mwurin eh repen doadoahk ansou werei, e ahpw alehdi doadoahk nan wasahn dehk likou. Tohndoadoahngko kin alepweipweiki ihte likou kan me re dehkpene pwung nan ehuehu rahn. Ni eh pahn laud me re dehkada, e pahn laud pweinarail.

Ehu rahno sohte pwand mwurin eh tepida ni wasao, Arlene sohpai deidei ehu me kahrehieng eh pingida oh pwunodada. E mwohndi ni nah misihno songosong en sapwad ah deidei sapwungo. E mwomwen me sohte me men sewese, pwe soun deidei teiko nannanti en kanekehla arail ko. Arlene pehm me sohte sawasepe oh sohte ah koapwoaroapwoar. Ni eh sohte mwesei, e tepida seng.

Paliohsang Arlene, Bernice Rock wie mwomwohd. E mahsang oh mai en deideisang. Kilikilang ahn Arlene pwunod, Bernice pwilikihdi pein ah doadoahk oh keila limwahn Arlene, kihkihieng kaweid oh sawas ni kadek. E mihmi lao Arlene soupeikasalda oh kak en kanekehla deideio. Bernice eri pwuralahng ni nah misihno, ni eh sohla eh ansou en kanekehla uwen tohto me e kak ma e sohte sawas.

Sang ni mwekid wet en limpoak, Bernice oh Arlene kompoakapahla erein ara mour. Emenemen pwopwoudda oh nainiki seri. Nan pahr kan en 1950 samwa, Bernice, me towe Mwomwohdiso, kihieng Arlene oh ah peneinei ehu Pwuken Mormon. Nan 1960, Arlene oh ah pwoud oh neira seri pepdaisla wiahla tohn Mwomwohdiso. Mwuhr irail katengtengdi nan tehnpas sarawi en Koht.

Pwehki nsenoh me Bernice kasalehda ni kediropwahki pein ih en sewese emen me e sohte ese ahpw me pwunod oh anahne sawas, diren aramas, koaros me momour oh me melahr, met paieki tiahk sarawi komour kan en rongamwahuo.

Rahn koaros en atail mour kitail kin alehdi ansou mwahu en kasale limpoak oh kadek ong irail akan me kapil kitail. Mahsanih President Spencer W. Kimball: Kitail uhdahn anahne taman me aramas akan me kitail tuhwong nan wasahn peidi en sidohsa, ohpis, elevator, oh wasa teikan iei kisehn aramas en sampah me Koht ketikihieng kitail en kin poakohng oh papah. E sohte pahn wiahiong kitail mehkot laud en koasoaia duwen aramas koaros ahr pirien ma kitail sohte kak kesempwaliki irail akan me kapil kitail ni duwen riatail ohl oh lih akan.”⁶

Pak tohto atail ansou mwahu kan en kasale atail limpoak kin kohdo ni sohte kesikpe. Karasaras en soangen ansou mwahu wet pwarada nan doaropwehn rohng nan Oaktohpe 1981. Uwen ahi wadekala limpoak oh nsenoh me mihmi loale me I kolokol doaropwehn soaio nan nei file kan erein sounpar 30.

Soaio kasalehda me sompihr pwoat pihrsang Anchorage, Alaska, lel Seattle, Washington—me weuwa pahsinse 150—wetila nan kahnihmw ehu me mih nan wel en Alaska pwehn idan serihmen me ohla laud. Kisin pwutak men sounpar riau pwupwudiong pohn kilahs ni eh mwadmwadong karanih imweo eri kamweid ehu selin nta nan peho. Kahnihmwo mih mwail 450 (725 km) palieir en Anchorage oh sohte mih wasa me sompihr kin kohla ie. Ahpw, soun wini kan wasao peki sawas karuwaru, oh sompihro wetila pwehn pwokada serio oh wahla Seattle pwehn kak koadoahk nan imwen wini.

Ni ansou me sompihro sokedi karanih kahnimwo, soun wini ko kapehsehki paileto me uwen nta eh kohkohsang pwutako e sohte pahn mour ma re pihr lel Seattle. E koasoandi me re pahn pihrla mwail 200 (320 km) wetsang nan uhdahn wasa re pipihrlahngie oh uhd kohla Juneau, Alaska, kahnimw keieu keren me mie imwen wini.

Mwurin arail peidaidla pwutako Juneau, sompihro uhd tenge Seattle, met awa kei pwandalahr. Sohte emen pahsinse ko kaulimiki, mendahte pali laud en irail ahr pwandehla arail mihting kan oh sompihr me re dokdoke palio pwehn douluhl nan arail seiloak. Ahpw, ni minit kan oh awa kan ahr doula, re rikpene kisin sent, wiahda lapalahn mwohni ong pwutako oh ah peneinei.

Ni sompihro eh pahn sokedi nan Seattle, pahsinse ko pa werda ni paileto eh pakairki me e alehdi ronge nan radio me pwutako pahn pitila.⁷

Ong ahi madamadau kohdo mahsen en pwuhk sarawi: “Limpoak unsek iei limpoak mehlel en Christ, … Oh mehmen me kin kolokol lao lel ni imwin rahno, e pahn kin mwahu ong ih.”⁸

Riei ohl oh lih akan, ekei atail ansou mwahu keieu lap en kasalehda atail limpoak pahn mih nanpwungen dihd en imwatail kan. Limpoak konehng mih ni poahsoan en mour en peneinei, ahpw pak tohto e sohte kin. E kin kak nohn laudila soukanengamah, nohn laud akamai, nohn dir pei, nohn dir pilen mas. President Gordon B. Hinckley mahsanih ni pahtou: “Dahme kahrehda me [mwo kan] me kitail [keieu] poakohng atail lokaia lemei kin kalapw doke? Dahme kahrehda me [kitail] kin ekei pak lokaia duwe naip me kin lek inen oh loal?”⁹ Pasapengpen peidek apwal pwukat kak en wekpeseng ong emenemen kitail, ahpw uhdahno kahrepehkan sohte kesempwal. Ma kitail pahn kolokol kosonned akan en poakohng emenemen, kitail uhdahn anahne kesempwaliki emenemen ni kadek oh wahu.

Mehlel me e pahn mie ansou me kapwung anahne kohda. Ahpw, kitail taman, kaweid me dierek nan Doctrine and Covenants—me mahsanih, me ni ansou me e konehng kitail en kapwung emen, kitail anahne kasalehda laudilahn limpoak mwuri.¹⁰

I men koapwoaroapwoarki me kitail pahn ansou koaros nantihieng en nsenohki oh kesempwaliki madamadau oh pepehm oh irair en irail akan me kapil kitail. Kitail dehr lemei de mwamwahl. Ahpw, kitail en kin nsenoh oh kangoang. Kitail anahne kanaiehng me kitail sohte pahn kihsang ahn aramas emen eh soupeikasal sang ni atail lokaia oh mwekid soulamalam.

Mahk konehng patehngete limpoak. Nan atail peneinei kan, iangahki rehn kompoakapahtail kan, kak mie pepehm medekila oh nanpwungsuwed. I kapwurehieng, e sohte uhdahn kesempwal ia uwen tikitik en kapwunodo. E sohte kak oh sohte konehng mihmi pwehn kawehla, en ohla, oh imwila kauwehla douluhl. Kapwopwohniki kin elehieng ohla kan sohte mohdi. Mahk kelehpw me kin kamwahuiala.

Lih kaselel men me melahr mwemweit rehi ehu rahno oh ni soh kesikpe koasoaiahda soahng kei me e koluhkihla. E koasoaia ansou kis me wiawi sounpar kei mwowe oh pid soumwet men me karanih, mahso wia kompoakapah mwahu ahpw me ansou kei ih ah pwoud oh ohlo sohte kin dokpene. Ehu rahno soumweto peki ma e kak kotehla sapwarao pwehn lella nan sapweo. Ansou wet nan eh soai ong ieo e uhdi, oh ni ngihl rerrer, nda, “Brother Monson, I sohte mweidehng en kotehla sapwo ansouo de mwuri ahpw mweidehng en keid wasa dohu pwehn lella ni sapweo. I sapwung, oh I koluhla. E solahr mie met, ahpw oh, ia uwen ahi mentehnohn kak ndahieng, ‘Mahk.’ Ia uwen ahi mentehnohn me I pwurehng ahniki ansou en kak kadek.”

Ni ei rongorong liho, e kodohng ahi madamadau dahme John Greenleaf Whittier kasawiada ni pahtou: “Nanpwungen lokaia kansensuwed koaros sang ni lewe de pehn, me keieu kansensuwed iei mepwukat: ‘E kakete pweida!’”¹¹ Riei ohl oh lih akan, ni atail pahn ehuong mehteikan ni limpoak oh kadek, kitail pahn sohte ahniki soangen kaulim pwukat.

Limpoak kin kasansalda ni wiepe tohto me sansal: sirei ehu, oaloahl ehu, lokaia kadek ehu, kaping ehu. Kasalada teikan kak wiawi ni mwohmw tikitiksang, rasehng nsenohki dahme emen tohrohr wiewia, padahk tepin padahk ni kadek oh kanengamah, pwarek me soumwahu de mihmihla nan ihmw. Lokaia oh mwekid pwukat oh me tohto teikan kak kasalehda limpoak.

Dale Carnegie, emen sounnting oh sounkapahrek ndand nan America, kamehlele me loalehn pein emenemen aramas mie “manaman en kalaudehla uwen koaros peren en sampah … sang ni kihda ekei lokaia en kalahngan mehlel ong aramas emen me loaloid de sohla koapwoaroapwoar.” E nda, “Mwein kumwail pahn manokehla lakapw lokaia kadek me kumwail nda rahn wet, ahpw me alehdio kakete kesempwaliki erein ah mour.”¹²

Kitail menlau tepida met, rahn wet te, en kasale limpoak ong koaruhsiehn sapwellimen Koht serihkan, mehnda ma re wia tohn atail peneinei, kompoakapahtail, aramas me kitail sohte nohn ese, de me kitail sehse douluhl. Ni atail kin pwourda nihmenseng koaros, kitail koasoanehdi en pelianiki limpoak oh kadek sohte lipilipil me kohdohng kitail.

Siksang me kitail kak wehwehki, riei ohl oh lih akan, iei sapwellimen Koht limpoak ong kitail. Pwehki limpoak wet, E ketin kadarodo Sapwellime Iehros, me poakohng kitail itar pwehn ketikihda Sapwellime mour pwehki kitail, pwe kitail en kak ahniki mour soutuk. Ni atail wehwehkihda duwen kisakis kapwuriamwei wet, mohngiongitail kan pahn direkihla limpoak ong Samatail Soutuk, ong atail Sounkomour, oh ong aramas koaros. Me met en pweida iei ahi kapakap ngoang ni lengileng sarawi en Sises Krais, ahmen.