Fal’ab nib Gaa’ Puluwon ko Athap

Rok President Henry B. Eyring

Bin Somm’on e Counselor u lane Bin Somm’on e Presidency

Nap’an ni gara mel’eg ningam fi’leg fa fol e m’ag ngak Got, kam me’leng fa’an gara fi’leg e tin fla’ab ngam pii’ ko athap ngak e gidii’ nibe fol e welthin rom.

Pi Walageg nib t’uf rog, boech i gimed e missionary ko fare Galasia ku Yesus Kristus ni e Gidii’en Got ko Tin Tomur e Rran e kar piningmed. Sana boche pi missionary nir e kar pinningmed ningam tayed michmicheg ngak ko Got man tawfe nigem.

Boech i gimed e ba motoyil ni bachan ni kam un ko labthir, fa ba bitir, ni kar pii’ed gom ufithik e athap ni ram me’leg ni ngam tay e pi m’ag ni kam fal’eg ngak Got man sulweg nga nga lukngun e yafas rom. Boech i gimed nibe motoyil gaed e kam me’leg ningam sulweged ngak en Tathapeg ma daba’ kam falflaen’ ko e fel’ Laniyaen’ ko pinning.

Demturug ko gur mini’ fa gin ni bay riy’, chiney gaba koel u pa’am fare falflaen’raed e gidii’ nib gaa’ ko rogon ni gabe lem nag e chiney. Urngin e rran nge urngin e awa rayog e rayog ni ngam me’leg ningam fol mu athamgiliy ko e michmicheg ngak Got.

Demturug e gin ni kam mub nga fare kanawo’ ningam athapeg e tawa’ath ko yafas nib manemus, gabe koel u pa’am e wo’en ningam dag e gidii’ e kanawo’ nibe soer nga faflaen’ nib thabi gaa’. Nap’an ni gara mel’eg ningam fi’leg fa fol e m’ag ngak Got, kam me’leng fa’an gara fi’leg e tin fla’ab ngam pii’ ko athap ngak e gidii’ nibe fol e welthin rom.

Gur nge Gag e kan taw’ath nag dow ko micheg ko re fla’ab nem. E tin falflaen’ug ko yafas rog ke yib ngog ko e pumo’on ni dabkug mada’nag u yafas ney. Dariy’’ e labthir rok ni ke mang e tituw ko tituw rog. Ke pii’ ngog e fla’ab nib gaa’ puluwon ko athap. Soem nggu weliy’ ngomed boech e chep ko e murwel ke rrin’ ninge fi’leg fare fla’ab ke pii’ ngog.

Fithingan e Heinrish Eyring. Kan gargaleg ko ba tabinaew nib fla’ab ko salpiy. Papa’ rok, Edward, e fana’ e binaw nib gaa’ u Coburg, chiney e yima yoeg e Germany ngay. Nina’ rok e i’ir fare Viscountess Charlotte Von Blombert. Papa’ rok e i’ir e tapowiy’ ko fapi binaw rok re Pilune ko Prussia.

Heinrich i’ir e bin somm’on e faak ko Charlotte nge Edward. Charlotte ke yim’ nap’an nib guyey nge ta’areb e duw rok, ni yim’ nap’an nike gargaleg e bin dalip e bitir rok. Ma fini yim’ Edward ni tomuren, ni ke n’ag urngin e nam nge fla’ab u e investment. Kemus nib aningeg nge ragag e duw rok. Ke dugey dalip e bitir ni dariy’’ galabthir roraed.

Heinrich, i’ir e tituw ko tituw rog, ke n’ag e glabthir rok nge tin fla’ab ko fayleng. Dariy’ e salpiy rok. Ke yoloey u lan fare chep ko tabinaew rok ni ke leam nag ni thingar i yaen nga United States ko athap. Machane dariy’’ e fagar fa tabinaew rok aram, ke thamiy e athap ninge yaen nga United States. U somm’on e ke yaen nga New York City. Ta’aboch riy me yaen ko e bin tir e walagen nib ppin u St. Louis, Missouri.

U St. Louis, reb e tamuruwel arma i’ir chonggin ko fare Gidii’en Got ko Tin Tomur e Rran. Rok me thap ba pamphlet rok Elder Parley P. Pratt ngak. Ke bi’eg me fil urngin e babyor ni rayog ninge piry’eg morunga’gen fare Gidii’en Got ko Tin Tomur e Rran. Ke meybil ninge nang fa’an kar m’ugew boech e angel ngak e gidii’, fa’an bay e profet nib fas, nge fa’an ke piriy’eg e tiliw nib riyul’ ni kan dag.

Tomuren l’agruw e pul ko e fil nge meybil nib fel’, Heinrich ke lik’ay ni ke yoeg ngak ninge tawfe. E pumo’on ni bay e fithingan nge priesthood rok ni gube tay fan, Elder William Brown, ke ngongoliy fare gam’ing. Heinrich e kantawfe nag u fithik e raenko March 11, 1855, u 7:30 ni kakadabul.

Mich u waen’nug ni Heinrich Eyring e ma nang ko ngiyal’ nem ni tin ni Gube fil e daba’ e ba riyul’. Manang ni falflaen’ ko yafas nib manemus nira yib udakaen e m’ag ko tabinaew nima yaen nga manemus. Nap’an e ngiyal’ ni ke fini pir’eg fare tunom ko falflaen’ ku en Somoel, irmanang ni athap ko tin faflaen’ ko manemus nira yib udakaen e mel’eg ko bee’ ningar fol ko wo’ rok. Athap rok ko falfalen’ nib manemus e bea yaen ko rogon ko gidii’ ni daworin gargeleg.

Bang ko fal’ab nib athap ko tabinaew romaed, ke ngongoliy e chep ngak e pi gidii’ rok.

U lane re chep nem ma gube thamiy e t’ufeg rok ni fan e gidii’ nira laek . Udakaen e thin rok ma Gube athapeg ni fapi gidii’ rok e yaed ra leakfare kanawo’ nima sar nga tibinaew romaed u tharmiy. Kan nang ni gathi ta’areb e mel’eg nib gaa’ machane i’ir boech e mel’eg nib chigchig. Gube yoeg ko chep rok:

“Nap’an e ngiyal’ ni somm’on ni Kug rung’ag e welthin rok Elder Andrus … Gubin ngiyal’ ma guma un mo’olung ko fapi Gidii’en Got ko Tin Tomur E rran ma boech e yay, nap’an [kug] waer ningu un e mo’olung, i’ir ta’ab e ngiyal’ ko muruwel rok ningu rrin’.

“Ku yoloey e biney nga lane ra chep ney ni bitir rog e yaed ra leak e wo’ rog ma dabir pii’ed keru’ raed ko biney e muruwel nib gaa’fan ningar [pinningaed] fapi Gidii’en Got.”¹

Heinrich e ma nang ni nap’an e mo’olung ko sacrament ma rayog ningad fi’leged bayay e micheg rodad ningad pug urran gaed en Tathapeg ni gubin yal’ nge pinning e Kan Thothup Rok ninge paer rodad ni gubin ngiyal’.

Iraram e ra Kan Thothup nike ayuweg ngak ko fare muruwel ni kan pinning ir ngak fini pul u tomuren ke thapeg e michmicheg ko tawfe. Ke fal’eg ninge athamgiliy e chepin rok maki michaen’ nap’an e mission rok ko nel’ e duw u binaw ni nap’an e ngiyal’ nem e kanoeg fare Binaw ko Indian. Ninge thapeg e puf ko mission rok, ke milekag u but ko Oklahoma nga Salt Lake City, palog ni chuchugur ko ta’areb e biyu’ nge ra’ay e mile (ta’areb e biyu’ nge medlip mira’ay e km)

Ta’aboch riy me pinning e profet ku Got ninge yaen nga yimuch u Utah. Urom ma ke thapeg reb e pong ninge pigpig ko mission u binaw rok u Germany. Ke thapeg fare pong ko fare Apostle ku Somoel Yesus Kristus ninge toey e coloniy ko Gidii’en Got ko Tin Tomur e Rran u loe’luch e binaew u Mexico. Nge mu’ man pinning ningemang e full-time missionary u Mexico City. Ke tay fan e pi pigpig nem. Kan ke’eyag u lane taliw nib achig u Colonia Juárez, Chihuahua, Mexico.

Dagur sul u dakaen e pin’nen nib riyul’ ere rayog ningu pinning e liyoer ngak ko e ngongol ni ke rrin’ fa papayngin rok. Gube sul u daken ningu liyoer ngak ko wo’en e mich nge athap ulane gum’racha’en nap’an ni pigpig gamaed gubin.

Ke thapeg fapi pigpig nem ni bachan e mich rok ni Kristus nike fas ko yam’ nge Chitamangdad nu Tharmiy ni ke m’ug ngak Joseph Smith u fithik e paan ulane state u New York. Ke athapeg e pinn’ey ni bachane michaen’ ni fapi kiy ko priesthood ulan fare Galasia rok Somoel e kan sulweg ninge m’ag paa’ e tabinaew u ta’abang ko manemus, fa’anra bay e mich roraed ni ngar fol gaed ko pi m’ag roraed.

Boed Heinrich Eyring, bee’ rog ni kakrom, sana gur e tha’abi somm’on ko tabinaew rom ni ngam dag kanawo’en mag powi’iy ko yafas nib manemus ko pi m’ag nib thothup udakaen e athamgiliy nge mich. Urngin e m’ag e ba pii’ e muruwel nge micheg. Urngin e m’ag e ba pii’ e muruwel nge micheg. Gadad gubin, woed rogon Heinrich, pi muruwel nem e ba moem ko boech e ngiyal’ machane ba moem’aw ko reb e ngiyal’. Machane mu tafineyem riy ni, pi muruwel e ngari moemaw’ ko boech ngiyal’ ni bachane fan ngoraed ningar fekdaed ko kanawo’ ko yafas nib manemus ko en Chitamangdaed nu Tharmiy nge Faak nib T’uf Rok, Yesus Kristus, ko tabinaew.

Mu pugurran fapi thin ko fare Babyor ku Abraham:

Got Ke dag ngak Abraham bay e bee’ ufithikraed i’ir woed rogon Got, me Ke yoeg ngak bogi cha’nem Uto’oben nigar ranoed u bang ko farengi mag feked e ba’nen mag fi’leged e fayleng riy’ ningad paered nga dakaen.

Ke yoeg Got ni yowra sikennog dad mar guyew fa’an ngad rin’ed urngin e tin ni ra fith en Somoel e Got rodad nira motochiyel nogdad.

Nge fa’an gadadba michaen’ ko e bin somm’on e sikeng rodad ningad pii’ed reb ngak, nge fa’an dad folgaed e bin somm’on e sikeng dad thapeged e fel’ngin ulane ta’ab e gil’lungun ko e gidii’ kar folgaed e bin somm’on e sikeng roraed, nge enra michaen’ ko e bin la’agruw e sikeng ran thapeg e fel’ngin nga dakaen e loelgen ko manemus.²

Fa’an gadadra michaen’dad ko e bin l’agruw e sikeng rodad thingar ningad fi’leged e m’ag ngak Got mag ngongoliyed u fithik e mich fapi muruwel nib t’uf ngodad. Ningad koelgaed fapi m’ag nib thothup ko urngin e yafas rok thingar ningad michaen’daed ngak Yesus Kristus i’ir e Tathapegdaed.

Bachane nike mul Adam nge Eve, ma bay e lumel, sikeng, nge yam’ rodad e yaed e tin ke yib ngodad ko likngindaed. Machane, Got ni Chitamangdaed nu Tharmiy nib t’uf ke pii’ e taw’ath ngodad i’ir en Faak nib T’uf Rok, Yesus Kristus, ni Tathapeg rodaed. Re taw’ath nem nib gaa’ nge fare taw’ath ko fare Bayul ku Yesus Kristus e be pii’ e taw’ath ngak gubin e gidii’: fare m’ag ko fare Foskoyam’ nge rogon nga yafas nib manemus ko urngin e gidii’ kan gargaleg.

Bin tha’abi gaa’ e taw’ath ku Got, e yafas nib manemus, e ra yib ngodad fa’an ngad fi’leged e m’ag ulane fare Galasia nib riyul’ ku Yesus Kristus udakaen e tapowiy ni kan mat’awaen read Ngak. Bachane fare Mul, ma gadad gubin ba t’uf e tin ningan be’ech ko tawfe nge e tay paa’ ngadakaen ningad thapeged fare taw’ath ko fare Kan ni Thothup. Pi gam’ing nem e thingari ngongoliy bee’ ni bay e mat’won ko priesthood nib fel’ rogon. Nge mu’, udakaen e ayuw ko fare Kan Thothup ku Kristus nge fare Kan ni Thothup, rayog ningad folgaed fapi m’ag ngak Got, arragon fapinn’en ningan pii’ ulan fapi temple Rok. Ni mus udakaen fare rogon nem, nge ko e ayuw, rayog bee’ ninge thapeg e inheiritance rok ko e bitir ku Got ulane tabinew nib manemus.

Ko picha’an nibe motoyil ngog, pinn’ey e woed rogon e lik’ay ni dariy’’ athap riy’.

Kam guy e labthir nib michaen’ ni kar kirbaen’ gaed ko bitir roraed ni kar pii’ed keru’raed fa kar me’leged ningar tha’abed e michmicheg roraed ngak Got. Machane fapi labthir nem e gay fel’ laniyaen’read mar athapeged ko reb e chepin e labthir.

Pifaak Alma nge Pilung Mosiah e kar sul gaed ko e fek ya thin nib almarin ko e m’ag nge motochiyel ku Got. Alma nib Wayin e ke guy faak ni Corianton ni ke chel ko e denen nib almarin ninge pii’ e pigpig nib michaen’. Fare Babyor ku Mormon ke weliy’’ fapi ma’ang’ang ku fapi Lamanite ni kar paged e yalen ningar domomuw gaed ko e gidii’ nib mat’aw mar fal’eged e michmicheg ningar rim’ad u fithik e gapas.

Kan l’oeg ba angel nge yib ngak Alma nib wayin nge fapi faak ku Mosiah. Fare angel e yib ni bachane e micahaen’raed nge fapi meybil ku e labthir roraed nge rok e gidii’ ku Got. Udakaen fapi chep ney koe gelngin nge Bayul nima muruwel ulan e gum’racha’ ko gidii’, mu fi’legem mu madangdang mu gapas.

En Somoel ke pii’ e mang’aenfan ko athap nap’an ngad chamgaed ningad ayuweged e gidii’ nib t’uf ngodad ningar thapeged e tin fla’ab ko manemus roraed. Ke fi’leg e micheg ngodad nap’an ngad athamgiliyed ngad mukungaed e gidii’ Ngak, arragon nap’an e ngiyal’ ngad chamgaed Ngak. E cham ba pii’ kirebaen’ Ngak, machane Dani waer, nge dad waergaed. Ke dag e rogon nib machaelboeg ngodad ma Ke athamgil ko t’ufeg: “Nge bayay, ke uw urngin yay ni kug kunuy med ni boed ba alabol ni ma kunuy pifak nga tan poen, arragon, O gimed e gidii’en e gidii’ ku Israel, ni kam m’aed; arragon, O gimed e gidii’en e gidii’ ku Israel, gimed e pi’in ni ma paer u Jerusalem, nge gimed e pi’in ni kam m’aed; arragon, nge uw urngin yay ni nggu kunuy med ni boed ba alabol ni ma kunuy pifak, ma damur mukun gaed.”³

Rayog ni ngad tayed fan ngak e ba’ adag ni dani waer ku en Tathapeg ninge fek urngin e gidii’ ni bitir ni ya’el rok Chitamangdaed nu Tharmiy mar sulweged Ngak nga tabinaew roraed. Urngin e labthir nib michaen’, tutuw fa titaw, nge labthir ko tutuw e ba a’dag daed ta’ab e ba’nen. Chitamangdad nu Tharmiy nge en Tathapeg e yow e wo’ nib machaelbog ko tin rayog nge thingar rrin’ed. Dar gagyeg nigew e tin nib mat’aw ko kireb rogon bachan e tin mat’aw e thingar ni mel’eg. Yow ma fal’eg e tin mat’aw ni ngad nanged fan, Mar pagew dad ngad guyed ni falfalen’ e ma yib ko wo’ nib man gil.

Urngin e gidii’ ni kan gargel nga fayleng ney e ke yag fare Tamilang ku Kristus, nima ayuweg daed ngad guyed ma gadad thamiy e tin nib ma’taw nge tin kireb. Got e ke loeg e tapigpig nib mat’aw ni rayog nignar, udakaen fare Kan Thothup, ayuwegdaed ningad nanged fan e tin Irba a’dag ningad rrin’ed nge tin ni Ke yog e mathngel e wol. Got e ba dag e tin nib fel’ ko mel’eg nib mat’aw nap’an pag daed ngad thamiyed e mel’eg rodad. Fa’an gadad ba me’leg e mat’aw, ma gadad ra pir’eg e falflaen’—boran. Fa’an gadad ba mel’eg e kireb, ma ra yib e kirbaen’ nge gafgow—boran. Tin ni ra yib e ba riyul’. Machane pin n’em e ra sag’al ni bay fan. Fa’an fapi taw’ath ra yib chiney, e me’leg ko mat’aw dani toey e mich. Nge kirbaen’ ma soen ko n’uw nap’an, irba t’uf e mich ninge pir’eg e n’ag fan ko e denen nib papey mekirbaen’ daed ko tin kireb u tomur.

Papa’ Lehi e kirbaen’ ko fapi mel’eg ni ke tay fapi faak nib pagal rok nge tabinaew roraed. I’ir e mo’on nib gaa’ mab fel’—ba profet ku Got. Ke pii’ e m’ag ni morung’agen e e Tathapeg rodaed, Yesus Kristus, ngoraed. I’ir e wo’ nib fel’ ko mafol nge pigpig nap’an en Somoel e pinning ni nge digey e chugum rok u faylang me yaen ni nge ayuweg e tabinaew rok ko magothgoth. Tomuren e yafas rok, ma kube micheg ngak fapi bitir rok. Woed i Tathapeg—ma dariy’ fan ni bay gelngin ni nge nang gumircha’raed ma rayog ni nge guy e tin nga m’on nib kirbaen’ nge tin man gil— ke paer Lehi nibe tu’ufeg e tabinaew rok i yaen ko kanawo’ ko thap.

Daba’e bukum e milyon gidii’ ko Chitamangiy ni Lehi e ba fel’ rogon e athap rok ngoraed.

Mang e rayog ningad rrin’ew ni ngad filew ko wo’ rok Lehi? Rayog ni ngam rrin’ i bi’eg fapi chep nib thothup uu fithik e meybil ma gadaed be yaliy.

Gube yoeg ningam guy fare rogon nib ngochngoch nge palow nap’an ngam gagyeg fare inheritance ko athap ngak e tabinaew rom. U rogon nib ngochngoch, ra yib boech e magawon ma Satan e ra tolul. Ma bay boech ban’en ni ran soen nag u fithik e gumaen’, u fithik e mich, nang ni en Somoel e ba muruwel u ngiyal’ Rok nge rogon Rok.

Bay boech ban’en ni ngam rrin’ u somm’on, nap’an e gidii’ nib t’uf rom e kab fel’ yangren raed. Tafiney med ni meybil ko tabinaew ni urngin e rran, bi’eg e chep nib thothup ko tabinaew, nge weliy’ e m’ag ulane mo’olung ko sacrament e ba moem nge fel’ rogon ningam ayuweg e bitir nap’an nib fel’ yangren raed. E bitir nib fel’ yangren raed e giyaed ra thamiy fare Kan Thothup nib fel’ rogon ko rogon ni gadaed manang.

Nap’an ni kar ilalgaed, yaed ra nang fapi tang ni kam m’oened u ta’abang. Gathi go’ tang, ya yaedra tafneyiraed ko fapi thin u lane chep nib thothup nge mich. Fare Kan Thothup e ra fek urngin ba’nen ko tafnay, machane fapi thin ko chep nib thothup nge tang e ra paer nib n’uw nap’an. Pi tafiney nem e ra tel raed ngar sul gaed ngak nap’an ni kar malog gaed ko boech e ngiyal’, sana ko bo’or e duw, ko fare kanawo’ nib soer ko yafas nib manemus.

Ba t’uf rodaed i yaliy nap’an e picha’an nib t’uf ngodad e ra thamiy e matel ko fayleng nge manileng ko muluwaen’ ra cham ko mich roraed. Bay e mich, athap, nge t’ufeg ningan powiy’daed ma pii’ gilingraed.

Kuguy ni pinn’en nap’an ni kug counselor ko l’agruw ngak l’agruw e profet nib fas ku Got. Yow ba gidii’ nib thil rogon. Machane yowba ta’abrogon ko fel’ laniyaen’. Nap’an e bee’ ra tolul ko koel chiya’ ko ban’en ulan fare Galasia, e fulweg rorow e ba “Oh, ra fel’ rogon e gubin.” Yow manang fan mornga’gen fare magowen ko tin ba’aram e gidii’ nibe weliy’.

Ki yow manang fan wo’en Somoel, ere gubin ngiyal’ ma yow ba athapeg e gil’ungun Rok. Yow manang mornga’gen ni I’ir e ba suwey. Ba gubin e rayog rok ma irba runguy. Fa’an gara pii’ mat’awaen ninge mang e tapowiy’ ko tabinaew rom, ran fel’ rogon e gubin.

Boech e papay ngin Henrich Eyring e kar malogaed. Machane bo’or e pi bitir ko bitir ko bitir rok maroed nga pi temple ku Got nap’an 6:00 u kakadabul ningar ngongoliy e gam’ing ni fan e liknginraed ni dawor mada’nag. Yaedma yaen ni fan e tin ku athap ni ke rrin’. Ke fa’leg e inheritance nibe fek fapi papay ngin rok.

Tomuren urngin e tin ni rayog ningad rrin’ed ufithik e mich, en Somoel e ra dag e tin fel’ rogon ko athap rodad ko e taw’ath nib fel’ ngak e pi tabinaew nib gaa’ ko laemnog rodad. Irba’adag e tin nib thabi fel’ ngoraed ngodaed, ngak gubin e bitir Rok.

Gadad gubin e bitir ku Got nib fas. Yesus nu Nazareth e ir Faak nib T’uf Rok ma fare Tatahapeg nike fas ko yam’. Ireray e Galasia Rok. Bay fapi kiy ko priesthood riy’, ere fapi tabinaew e rayog ni ngar pired nib manemus. Iraray e tin fal’ab nib gaa’ puluwon ko athap rodaed. Gube micheg nib riyul’ u dakaen fithngan Yesus Kristus, amen.