Tu’ufeg—Nib Ga’fan ko fare Gospel

Rok President Thomas S. Monson

Dabyog ni ngari tu’uf Got rodaed fa’anra dani tu’uf e gidii’ rodaed u lane biney e yafas.

Pi walageg nib tu’uf rog, nap’an ni machib e Tathapeg rodaed ko gidii’, me fith ba lawyer ngak ni, “Masta, bin ngan e motochiyel e tha’abi man gil ko motochiyel?”

Yoloey Matthew ni fulweg Yesus ni ga’ar:

“Nge tu’uf Somoel ni Got rom, u lan gumircha’em, nga gubin e ya’el rom, nge gubin lanin’um.

“Iraray e bin somm’on nge bin falel’ e motochiyel.

“Bin migid e boed, Nge tu’uf e yoror rom ni boeded.”¹

Mu’ nag Mark fare n’en nikan yoloey ko thin rok Tathapeg: “Dariy’ reb e motocchiyel nib falel’ ni boed e gal ney.”²

Dabyog ni ngari tu’uf Got rodaed fa’anra dani tu’uf e gidii’ rodaed u lane biney e yafas. Boed ni, dabyog ni nge tu’uf e gidii’ rodaed fa’anra dani tu’uf Got rodaed, ni Chitamangdad ni gubin. Ke ga’ar Apostle John ngodaed, “Biney e motochiyel e ke yib ngodaed rok, Cha’anem nib tu’uf Got rok ma kab tu’uf e walagen rok.”³ Gadaed gubin ma bitir ni ya’el ni faak e Chitamangdad nu Tharmiy ma, bachane biney, ma gadaed walag. Nap’an ni gadaed ra tafiney dad ko biney, ma pifaak Got ninge tu’uf rodaed e ra moem rogon.

Machane, tu’ufeg e ban’en nib rib ga’fan ko fare gospel rok Yesus Kristus ni Wo’ rodaed. Yafas Rok e ba sug ko tu’ufeg. Ke gol nag e ubchiya’, ke chubiy e picha’an nikan li’ ngalang, ke ayuweg e cha’an nib ta denen. Tomur riy, me yib e gidii’ nib domomow ngar feked e yafas Rok. Machane u dakean e berey u Golgotha ma luman ni be ga’ar: “Chitamag, mu n’ag fan raed; ya dar nanged ko mang e yaed be rrin’”⁴— ba wo’ ni rib ga’fan u lane yafas u fithik e tu’ufeg.

Bukun ban’en nibe dag e tu’ufeg, gol, athamgil, dani si’in, nang fan bee’, ta n’ag fan. Ko gubin e tafagar rodaed, ma pi n’ey nge kuboech e ra ayuweg boech e gidii’ ni ngar guyed e tu’ufeg u lan gumircha’daed.

Baga’ ni tu’ufeg rodaed e ra m’ug ko mithmith rodaed ko rran ngo rran ngak bee’. N’en nni tha’abi ga’fan e rogon ningad poyed bee’ nike tu’uf ban’en rok man mithmith. Gubin ngiyal’ ma guma cha’ariy ma thin ni kan yoloey u lan ba poem:

Kug yoer ni neap.
Ni fan ko sap nike ngoch
Ko n’en nib tu’uf rok bee’ nike n’anggin neg dakur guy;
Machane dariy’ biyay ni ku
Thamiy ni ke kalngan’ug
Ni kug gol.5

Kafin noeg ngog ba wo’ nib man gil u fithik e murunguy—reb ni dariy’ bee’ nike guy. Duw e 1933, bachan ni nap’an fare Great Depression, murwel e ke momaw’ i pir’eg. Gin’em e bang ko ngael u United States. Kafin ni chuw Arlene Biesecker u high school. Tomuren nap’an ni i yaliy e murwel nib n’uw nap’an, me yag ni nge pir’eg ba murwel u bang ni fan e maad ni kanoeg e seamstress ngay. Gidii’ nima murwel e yima pi’ pulwon raed ko maad ni kar yuped nib fal’ rogon ni gubin e rran. Urngin ni yaed be rrin’, e urngin ni yibe pi’ pulwon raed riy.

Reb e rran nap’an ni tabab u mill, me aw Arlene ko ban’en nib momaw’ nibe balyang riy ma be chalban riy. I paer ko fare masin rok nima yup’ e maad riy ni be guy rogon ni nge mu’ nag e yup’ e gin nibe farowliy. Boed ni dariy’ bee’ ni nge ayuweg, gubin e pi gidii’ e yaed be gurgur ni ngar mu’ niged urngin e maad ni rayog roraed. Ke thamiy Arlene rok ni dariy’ ban’en nib fal’ ngay. Achig luman, me tabab ko miyoer.

U barba’ ku Arlene e be paer Bernice Rock. Ma ilal ma ba cheg nag nib seamstress. Yaliy e kirbaen’ rok Arlene, me digey Bernice e murwel rok me yaen nga barba’ ku Arlene, me pi’ e ayuw ngak nge rogon ni nge rrin’ u fithik e gol. Me paer nge taw ko ngiyal’ nike cheg nag Arlene nike yag ni nge mu’ nag reb. Me aram me sul Bernice ko birok e masin, machane saki yog ni nge mu’ nag urngin e maad ni rayog rok, ni bachane ke ayuweg bee’.

Biney e mithmith u fithik e murunguy, me fal’ e thin rok Bernice nge Arlene nib n’uw nap’an. Ra bag yow ma ke mabgol ma bay e bitir rorow. Bangiyal’ u lane 1950, Bernice, nib chonggin e Galasia, e pi’ ngak Arlene nge tabinaew rok ba copi ko fare Babyor ku Mormon. U lane 1960, me tawfe Arlene nge pumo’on rok nge bitir rok nga lan fare Galasia. Ta’aboch riy miyaed chiyliy gaed u lan fare temple rok Got nib thothup.

N’en nike buch ko tu’ufeg rok Bernice nap’an ni yaen nge ayuweg bee’ ni dani nang machane ke kirbaen’ mab tu’uf e ayuw ngak, bukun e gidii’, nib fas nge make yim’, e chiney e be falfalen’ ko pi gam’ing ko fare gospel.

Gubin e rran u lane yafas rodaed ma yima pi’ kanawo’en ngodaed ni ngad daged e tu’ufeg nge gol ngak e picha’an nib liyeg daed. Ke ga’ar President Spencer W. Kimball: “Ngarin tafineyed gadaed ni picha’an ni gadaed be mada’ nag u lane gin nima tal e karo riy, pi ofis, pi elevator, nge yugyang e picha’an nike pi’ Got ngodaed ni ngad tu’ufeged ma gadaed ayuweg. Ra fal’ ngodaed ni ngad non gaed ngak bee’ fa’anra dabyog ni ngad tayfaned e picha’an nib liyeg dad ni pi walagdaed.”⁶

Baga’ ni kanawo’en daed ni ngad daged e tu’ufeg e ma yib nib tumgin. Boed fare kanawo’en ni m’ug u lane newspaper ko October ko 1981. Ku falfalen’ ko tu’ufeg ni kan noeg u langgin ni ku cha’ariy u lan e file rog nike pag guyey e duw.

Fare thin e be weliy’ mornga’agen ba Alaska Airlines ni dani tal u Anchorage, Alaska, nga Seattle, Washington—nibe feek ta’areb mira’ay nge wugem urngin e gidii’—kan pi’ ni nge yaen ko ba binaew u Alaska ni ngan transport nag ba bitir ni kari mad’ad. Pagal ni l’agruw e duw rok ni nuchey rok u paa’ e ke mad’ad ngay nap’an ni mul nga dakean ba meloer nap’an nibe fafal nib chugur nga tabinaew rok. Fare binaew e aningeg mira’ay nge wugem e mile (medlip mira’ay nge ral’iw nge laal e km) lel’uch ko yu Anchorage ma dani mo’ ko gin nima yaen e sukuki riy. Machane, gidii’ e bay riy ni yibe gay rogon ni ngan ayuweg e kar ninged e ayuw, ere man pi’ fare sukuki nge feek fare bitir man feek nga Seattle ngeyog ni ngan tafley nag u lane aspital.

Nap’an ni aw fare sukuki nga but nib chugur ko fare binaew, me yoeg fapi gidii’ nima taflay ngak fare pilot ni be lul’ rach’en fare pagal nib alamrin ni dabyog ni nge fas iyaen nga Seattle. Man dugliy ni ngan changag u lan reb e l’agruw mira’ary e mile (dalip mira’ay nge raliw’ e km) ni yibe sar nga biyang ni gathi ir nga Juneau, Alaska, bin e city ni tha’abi chugur ko aspital.

Nap’an ni kan mu’ i pi’ fare pagal nga Juneau, me sar fare sukuki nga Seattle, chiney e kar sag’al gaed ni bukun e awa. Dariy’ bee’ u lan fare sukuki ni mada’ luman ngalang, mus ni oren i giyaed e dani yag ni nge yaen ko mo’olung rok nge sukuki ni ngar af gaed ngay. Machane, nap’an bukun e ment nge awa ni yaem, ma yaed be ulnguy e salpiy, ni yibe kunuy ni fan pulwon fare pagal nge tabinaew rok.

Nap’an ni ba ni nge aw fare sukuki nga Seattle, me tolul fapi gidii’ u lan fare sukuki u fithik e falfalen’ nap’an ni yoeg fare pilot ni nike rung’ag ko radio ni ra fal’ rogon fare pagal.⁷

Ku leam nag e pi thin ko chep nib thothup: “T’ufeg e fare adag rok’ Kristus nib machalbog, … ma cha’ ni yira pir’eg ni bay rok’ ko bin tomur e rran, ma ire ba fel’ rogon.”⁸

Pi walageg, boech kanawo’en daed ni ngan daged e tu’ufeg e bay u lane tabinaew rodaed. Tu’ufeg e thingar mang e bin tha’abi ga’fan u lane yafas ko tabinaew, machane baga’ ni gathi aramrogon. Rayog nib yo’or e chalban, tugthing, cham nib yo’or, nge yilu’ nib yo’or. President Gordon B. Hinckley e yoeg u fithik e lu’ ni ga’ar, “Mongfan ni [picha’an] ni [rib] ba tu’uf rodaed e baga’ ni yaed ma mang e picha’an ni gadaed ba yoeg e thin ngorodaed ni kireb. Mongfan ni boech ngiyal’ ma [gadaed] ma non ni kireb nima kireb nag e tafiney rok bee’?”⁹ Fulweg ko pi duwer ney e rayog nib thil rogon rodaed, machane nen nib riyul’ e fan e dariy’ fan. Fa’anra gadaed ra fol ko pi motochiyel ni ngad tu’ufeg gadaed, ma ngarin ayuweg gidaed u fithik e gol nge tay fan.

Arrogon ni riyul’ ni bay boech e ngiyal’ nap’an nib tu’uf ni ngan thin ngak bee’. Tafiney daed, ni machane, fare thin ni kan pir’eg u lane Doctrine and Covenants—nibe yoeg, ni nap’an nib ga’fan ni ngad thin gaed ngodaed, ma gadaed sug ko tu’ufeg ko tomur riy.¹⁰

Gube athapeg ni gadaed ra athamgil ni gubin ngiyal’ ni ngan tay fan man leam nag e pi tafiney nge thomthom nge magawon rok e picha’an nib liyeg daed. Dabin tugthin gaed fa ni og tharan ney. Machane, ngad sug gaed ko tu’ufeg nge pi’ e athamgil. Ngarin sag’al gaed ni dabin kireb niged lanyaen’ bee’ ko thin nge mithmith nib kireb.

N’ag fan e thingari yaen yaen u fithik e tu’ufeg. U lane tabinaew rodaed, boed ko pi tafagar rodaed, rayog ni bay e thomthom ni kirbaen’ nge tin kireb ni ngan n’ag fan. Biyay, dani ga’fan ko mang e magawon. Dabyog ma thingari dabin pag ni nge kireb, chalban, ngari kireb. Yoen’ e kireb nga dakean bee’ e ma taleg daed ni dabi fal’ rogdaed. Kemus ni n’ag fan e ma gol nag.

Ba ppin nib pidorang nike yim’ e mada’ nigeg reb e rran mug gin ni weliy’ mornga’agen boech e n’en nike kalngan’ riy. I weliy’ mornga’agen e n’en nike buch nike bukun e duw nib mu’un bee’ nima milaey’ ngay, ni moey nib fagar machane ir nge pumo’on rok e dar fal’ rogon e thin rorow. Reb e rran me fith facha’ nib ta milay’ fa’anra rayog ni nge feek e gin nib ngoch ninge tha’eb e tabianew rok ni nge taw ko girok e tabinaew. Ngiyal’ ney e tal me sap ngog, nibe dada’ luman me, ga’ar, “Brother Monson, danug pag nge tha’eb e tabinaew romad, e ngiyal’ nem ma dariy’ biyay machane i feek e gin nib n’uw yang nibe liyeg ni nge taw nga tabinaew rok. Gub kireb, ma ke kalngan’ug riy. Ke yim’ e chiney, machane oh, gube athapeg ni rayog ni nggu ga’ar ngak, ‘siro’.’ Ri gube athapeg ni bay e bin migid yay ni rayog ni ngug gol.”

Nap’an ni gube motoyil ngak, me yib ba tafiney nga lanin’ug nib kirbaen e thin rok John Greenleaf Whittier: “Ko gubin e thin nib kirbaen’ ni ko langay fa pen, bin tha’abi kirbaen e biney: ‘Susun ra buch!”’¹¹ Pi walageg, nap’an ni gadaed ra ayuweg e gidii’ u fithik e tu’ufeg nge gol, ma dab i kalngan’ daed.

Tu’ufeg e kan dag nib yo’or rogon: tingi’, repoy pa’ay, thin nib gol, thin nib man gil. Boech rogon e rayog nib falel’, boed ni yibe dag ni yiba adag e gosgos rok bee’, sensey nag e n’en nib ga’fan u fithik e gol nge athamgil, guy bee’ nib ubchiya’ fa bay u tabinaew. Pi thin ney nge mithmith, nge ku bukun boech, e rayog ni nge yoeg e tu’ufeg.

Dale Carnegie, ba author u United States ni yigo yi manang mab sensey, e michan’ ni ra bee’ ma bay rok “gelngin ni nge gel yo’or nag e falfalen’ … [u] fayleng ni nge yoeg in e thin u fithik e magaer ngak bee’ ni go’ ir rok fa ke kirbaen’.” Ke ga’ar, “Sana gara pagtilin gabul e pi thin ni kam moeg e daba’, machane facha’ e ra cha’ariy u lane yafas roraed.”¹²

Aygud tabab gaed e chiney, re rran ney, ni ngad daged e tu’ufeg ngak gubin pifaak Got, demtrug ko gothon e tabinaew rodaed, tafagar, gidii’ ni yibe guy, fa bee’ ni dan nang. Nap’an ni gadaed ra od ni kadbul, thingar di tu’ufeg gaed mad gol gaed ko demtrug e cha’ nibe yib nga pow’chen daed.

Pi walageg, tu’ufeg ni bay rok Got ngodaed, e ban’en ni dabyog ni ngad nang faned. Bachane e biney e tu’ufeg, ma ke pi’ Faak, nib ri gadaed ba tu’uf Rok nike pi’ e yafas Rok ni fan daed, ya ngeyog ni ngeyog e yafas nib manemus ngodaed. Nap’an ni gadaed ra nang fan e biney e tawa’ath ni rib ma’ang’ang, me sug gumircha’daed ko tu’ufeg rok e Chitamangdaed ni Gubinfen, ngak e Tathapeg rodaed, nge ngak gubin e gidii’. Binem e meybil rog u dakean fithngan nib thothup rok Yesus Kristus, amen.