Agtutubo
Magustuak Ngata ti Indeksing?
Agnanaed ti nagsurat iti Veracruz, Mexico.
Nakiramanak iti panggepmi a tun-oyen iti stake nga agindeks iti 50,00 a nagnagan. Idi damo narigat daytoy. Iti sumagmamano a gundaway ti batch a na-downloadko ket narigat a basaen ti surat nga insurat ti ima, ket no dadduma kayatko nga isubli daytoy ken agdownloadak iti sabali. Ngem naamirisko a no kastoy met ti panunoten ti tunggal maysa, mabati a di naileppas dagita a batch iti udina. Mapampanunotko nga adu a nakalinia a tattao ti agur-uray iti lubong dagiti espiritu, ket inkeddengko nga ituloy a mangikarigatan a mangbasa kadagidiay a nagnagan ket ulitek nga isurat dagitoy nga awan biddut.
Nasursurok nga impateg dagidiay a pimmusayen a tattao. Naawatak a pudno a kasapulanda ti tulong, ket kasapulantayo met ti tulongda. Ad-adda a naawatak a ti naan-anay a plano ti Nailangitan nga Ama ket ti pannakaseknanna iti tunggal maysa. No surotentayo ti pammaregta ken dagiti pangiturong dagiti napili a dadaulona, masaksiantayonto ti asi ken awan patinggana nga ayatna.
Napintas a padas para kaniak ti indeksing. Nasursurok nga ikkan pateg ken ayaten ti adu a banag maipapan iti pakasaritaan ti pamilia wenno family history. Nakagun-odak pay kadagiti sagut a naindaklan ti pategna manipud ti Apo babaen ti panagtungpal iti maysa a banag a gagangay kas iti pannakiraman iti indeksing.