Mensahe ti Umuna a Panguluen, Hunio 2014
Panangpadaras iti Aramid
Ammoyo kadi a 98 a tawen ti naisubli a Simbaan idin sakbay a naaddaan daytoy iti 100 nga stake? Ngem kalpasan ti nakurang a 30 a tawen, binukel ti Simbaan ti maikadua a 100 nga stakena. Ken walo a tawen laeng kalpasan dayta addaanen ti Simbaan iti nasurok a 300 nga stake. Ita addaanen ti simbaan iti nasurok a 3,000 nga stake.
Apay a maar-aramid ti kasta a kapardas daytoy a panagdakkel? Gapu kadi ta nalatlataktayon? Gapu kadi ta addaantayo kadagiti napipintas a chapel?
Napateg dagitoy a banag, ngem ti gapu ti panagdakkel ti Simbaan ita ket impakitan ti Apo daytoy a mapasamak. Iti Doktrina ken Katulagan, kinunana, “Adtoy, padarasek ti aramidko iti panawenna.”1
Datayo, kas espiritu nga annak ti Nailangitan nga Amatayo, ket naibaon iti daga iti daytoy a panawen tapno makiraman iti panangpadaras iti daytoy naindaklan nga aramid.
Iti pannakaammok, saan iti kaano man impakita ti Apo nga iti laeng mortalidad ti aramidna. Ketdi, sakupen ti aramidna ti kinaagnanayon. Mamatiak nga padardarasenna ti aramidna iti lubong dagiti espiritu. Mamatiak pay a ti Apo, babaen dagiti katulonganna, ket mangisagsagana iti adu nga espiritu nga umawat iti ebanghelio. Trabahotayo ti mangsukisok kadagiti minataytayo ket mapantayo iti templo ket aramidentayo dagiti sagrado nga ordinansa a mangyegto kadagita a pimmusayen kadagiti isu met laeng a gundaway nga adda kadatayo.
Adu ti aramiden ti tunggal nasingpet a Santo iti Ud-udina nga Aldaw iti lubong dagiti espiritu, kinuna ni Presidente Brigham Young (1801–77). “Ania ti ar-aramidenda sadiay? Agikaskasabada, agikaskasabada iti amin nga oras, ket isagsaganada ti dalan para kadatayo tapno mangpadaras iti aramidtayo iti panangbangon kadagiti templo ditoy ken iti sadino man.”2
Ita, saan a nalaka ti aramid a family history. Para kadakayo manipud iti Scandinavia, maipadakayo kaniak iti pannakapaayyo. Kas pagarigan, iti liniak a Swedish, Nels Monson ti nagan ti lelongko; saan ketdi a Monson ti nagan ti amana no di ketdi Mons Okeson. Oke Pederson ti nagan ti ama ni Mons, ken Peter Monson ti nagan ti amana—naisubli manen iti nagan a Monson.
Namnamaennatayo ti Apo mangsukisok a sipapasnek iti pakasaritaan ti pamiliatayo. Panagkunak ti umuna a banag a masapul nga aramidentayo no nasken a sukisokentayo a nasayaat ti pakasaritaan ti pamiliatayo ket maaddaantayo iti Espiritu ti Nailangitan nga Ama. No agbibiagtayo a nalinteg kas iti pannakaammotayo a nasken a panagbiagtayo, luktannanto ti dalan para iti pannakatungpal dagiti bendision a sipapasnek ken situtudio a sapsapulentayo.
Agbidduttayonto, ngem awan kadatayo iti agbalin nga eksperto iti aramid a family history no saantayo nga umuna nga agbalin nga agdadamo. Ngarud, nasken a sipapasnek nga aramidentayo daytoy a trabaho, ken nasken nga agsaganatayo a mangpasar kadagiti rigat iti panangaramidtayo iti daytoy. Saan a nalaka daytoy nga aramid, ngem impaaramid ti Apo kadakayo daytoy, ket impaaramidna kaniak daytoy.
No trabahuenyo ti aramid a family history, mapasaranyonto dagiti rigat a manglapped kadakayo nga agprogreso iti panagaramidyo iti family history, ket kunaenyonto iti bagiyo, “Awanen ti maaramidko pay.” No dumtengto kadakayo dayta a gundaway, agparintumengkayo nga agkararag ket kiddawenyo iti Apo a mangted iti solusion a makatulong kadakayo, ket itdennanto ti tulong kadakayo. Paneknekak a pudno daytoy.
Ay-ayaten unay ti Nailangitan nga Ama dagiti annakna iti lubong dagiti espiritu kas iti panagayatna kadatayo. Maipanggep iti aramid a pangisalakan iti minataytayo, kinuna ni Propeta Joseph Smtih, “Ket ita bayat ti panangpadaras kadagiti naindaklan a panggep ti Dios iti pannakaipatungpalda, ken pannakaipatungpal dagiti banag nga insao dagiti Propeta, bayat ti pannakaipasdek ti pagarian ti Dios iti rabaw ti daga, ken pannakaisubli ti nagkauna nga urnos dagiti banag, imparangarang ti Apo kadatayo daytoy a pagrebbengan ken pribilehio.”3
Maipanggep kadagiti kapuonantayo a pimmusayen nga awanan pannakaammoda iti ebanghelio, impakdaar ni Presidente Joseph F. Smith (1838–1918), “Babaen dagiti panagkagumaantayo a maipaay kadakuada, mawayawayaandanto iti naespirituan a pannakaadipen wenno pannakabalud, ken aglawagto ti sipnget a nanglawlaw kadakuada, agraniagto ti silaw kadakuada ket mangngegandanto iti lubong dagiti espiritu ti aramid nga inleppasen para kadakuada dagiti annakda ditoy daga, ket makipagrag-odanto kadakayo iti panangipatungpalyo kadagitoy a pagrebbengan.”4
Minilmilion nga espiritu nga annak ti Nailangitan nga Amatayo ti saan pay a nakangngeg iti nagan ni Cristo sakbay ti ipapatayda ken ipapanda iti lubong dagiti espiritu. Ngem itan nasuruandan iti ebanghelio ket ur-urayenda ti aldaw a panangaramidtayonto iti panagsukisok a kasapulan tapno malawagan ti dalan tapno makapantayo iti balay ti Apo ket aramidentayo para kadakuada ti aramid a saanda mismo a kabaelan nga aramiden.
Kakabsatko a babbai ken lallaki, paneknekak a bendisionannatayto ti Apo no awaten ken sungbatantayo daytoy a karit.
Panangisuro manipud iti Daytoy a Mensahe
Mangpanunotka iti paggugustom nga estoria manipud iti pakasaritaan ti pamiliam ket ibinglaymo daytoy kadagiti sarungkaram. Mabalin a kayatmo nga usaren dagitoy a saludsod iti benneg dagiti ubbing iti Mensahe ti Umuna a Panguluen (panid 6) a pangallukoy kadagiti sarsarungkaram a mangibinglay kadagiti estoria manipud iti pakasaritaan ti pamiliada. Ibilangmo a basaen tiDoktrina ken Katulagan 128:15 ken ilawlawag ti kinapateg ti panangaramid kadagiti ordinansa iti templo a maipaay kadagiti kapuonantayo.
© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti First Presidency Message, June 2014. Ilokano. 10866 864