Fas Presidensi Mesej, Jun 2014
Muvum Wok I Go Hariap
?Yu save se Jos we i bin kambak i bin kasem 98 yia bifo hem i gat 100 stek? Be i no bitim 30 afta long hemia, Jos i oganaesem 200 stek blong hem. Mo eit yia nomo afta long hemia Jos i gat moa bitim 300 stek. Tedei yumi bitim 3,000 stek finis.
?From wanem Jos i gro long wan spid olsem? ?Hem i from oli save yumi gud moa? ?Hem i from yumi gat ol naesfala japel?
Ol samting ia oli impoten, be risen Jos i gro tedei hem i from Lod i bin talem se bae i gro olsem. Long Doktrin mo Ol Kavenan, Hem i talem se bae Hem i mekem wok blong Hem i go hariap long stret taem blong Hem.1
Yumi, olsem ol spirit pikinini blong Papa blong yumi long Heven, oli bin sendem yumi long wol long taem ia blong yumi save tekem pat blong spidim bigfala wok ia.
Long wanem mi save, Lod i neva talem se wok blong Hem i stop nomo long laef ia. Be, wok blong Hem i blong taem we i no save finis. Mi biliv Hem i stap muvum wok blong Hem i go hariap long spirit wol. Mi biliv tu se Lod, tru long ol wokman blong Hem long spirit wol, i stap mekem rere plante spirit blong kasem gospel. Wok blong yumi i blong mekem famle histri wok blong yumi mo go long tempol mo mekem ol tabu odinens blong givim long olgeta we oli stap narasaed long vel semfala janis we yumi gat.
Presiden Brigham Yang (1801–77) i talem se, evri gudfala Lata-dei Sent long spirit wol oli bisi. “?Wanem nao oli stap mekem long spirit wol? Oli stap prij, oli stap prij evri taem, mo stap mekem rere rod blong yumi blong muvum wok i go hariap blong bildim ol tempol long ples ia mo long ol nara ples.”2
Nao, famle histri wok i no isi. Long yufala blong Skandinevia, mi serem wetem yufala harem nogud blong yufala. Olsem eksampol, folem laen blong ol olfala blong mi blong Swiden, nem blong bubuman blong mi i bin Nels Monson; nem blong papa blong hem i no Monson nating, be Mons Okeson. Papa blong Mons, nem blong hem Oke Pidasen, mo nem blong papa blong hem i Pita Monson —i go stret bakegen long Monson.
Lod i wantem luk yu mo mi i mekem gud famle histri blong yumi. Mi ting se fas samting we yumi mas mekem sapos yumi mas mekem wok blong yumi gud, i blong gat Spirit blong Papa blong yumi long Heven i stap wetem yumi. Taem yumi laef folem fasin blong stap stret mo gud, bae Hem i openem rod blong fulfilim ol blesing ia we yumi wok had blong lukaotem.
Bae yumi mekem mistek; be i no gat wan long yumi bae i save kam top man long saed blong famle histri wok sapos i no statem wok ia. Hemia nao from wanem yumi mas wok had oltaem wetem strong tingting long wok ia, mo mas rere blong pas tru long ol had ekperiens [taem yumi stap mekem wok ia]. Hemia i no wan isi wok, be Lod i givim long yu, mo Hem i givim long mi.
Taem yu mekem famle histri wok, bae yu eksperiensem ol hadtaem we bae oli stopem yu long famle histri wok blong yu, mo bae yu talem long yuwan, “Bae mi nomo save mekem wan samting moa.” Taem yu kam long poen ia, nildaon long ol ni blong yu mo askem Lod blong openem rod, mo bae Hem i openem rod blong yu. Mi talemaot se hemia i tru.
Papa long Heven i lavem ol pikinini blong Hem long spirit wol i semmak nomo olsem we Hem i lavem yu mo mi. Profet Josef Smit i tokbaot wok blong sevem ol ded blong yumi, i talem se: “Mo naoia taem ol bigfala stamba tingting blong God oli stap tekem ples kwik, mo ol samting we Ol Profet oli bin stap talem oli stap hapen, taem kingdom blong God i stanap long wol, mo ol olfala oda blong ol samting oli kambak, Lod i bin soemaot long yumi diuti ia mo bigfala janis ia.”3
Long saed blong ol bubu blong yumi we oli bin ded mo oli no gat save blong gospel, Presiden Josef F. Smit (1838–1918) i talem: “Tru long ol hadwok blong yumi long bihaf blong olgeta ol jen blong olgeta blong slef bae oli brok mo folfoldaon, mo tudak we i kavremap olgeta bae i kamaot, mekem se laet bae i saen long olgeta mo bae oli harem long spirit wol ol wok we oli bin mekem blong olgeta we i kam long ol pikinini blong olgeta long ples ia, mo bae oli glad wetem yufala long wok blong yufala blong ol diuti ia.”4
I gat plante milian spirit pikinini blong Papa blong yumi long Heven we oli neva harem nem blong Kraes bifo oli ded mo go long spirit wol. Be naoia oli bin tijim olgeta long gospel mo oli stap wet long dei ia taem yu mo mi i mekem wok ia we i nid blong yumi mekem blong kliarem rod mekem se yumi save go long haos blong Lod mo mekem wok blong olgeta we oli no save mekem olgetawan.
Ol brata mo sista blong mi. Mi testifae se Lod bae i blesem yumi taem yumi akseptem mo ansa long hadwok ia.
Yusum Mesej Ia blong Tij
Tingbaot wan stori blong famle histri blong yu we yu laekem mo serem stori ia long olgeta we yu visitim olgeta. Maet yu wantem blong yusum ol kwestin long seksen blong ol pikinini long Fas Presidensi Mesej (pej 6) blong leftemap tingting blong olgeta we yu stap visitim olgeta blong oli serem ol stori blong olgeta. Tingbaot blong ridim Doctrine and Covenants 128:15 mo tokbaot olsem wanem i impoten blong mekem ol tempol odinens long bihaf blong ol bubu blong yumi.
© 2014 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/14. Oli letem translesen: 6/14. Translesen blong First Presidency Message, June 2014. 10866 852