Te Rongorongo man te Moan Beretitentii, Tuun 2014
Kawaekoan te Mwakuri ni Kamaiu
Ko ataia ae ai 98 ana ririki ni maan te Ekaretia ae e a tia ni kaokaki imwaain ae e reke 100 ana titeiki? Ni kee iaan 30 te ririki imwiina, te Ekaretia e a tia ni barongai ana kauoua ni ka 100 n titeiki. Ao tii inanon waniua te ririki imwiina anne e a raka riki iaon 300 ana titeiki te Ekaretia. N te bong aei ti a karekea riki ae raka iaon 3,000 titeiki aika matoatoa.
E aera ngkai e riki te rikirake aei n te ware ae birimwaka? Ibukina ngkai a mwaiti aomata aika a ataa te Ekaretia? Ibukina bwa a raraoi ara umwantabu?
Bwaai aikai a bon kakawaki, bwa bukin ae rikirake te Ekaretia n te bong aei bwa te Uea e kamatata bwa e na bon rikirake. N te Doctrine ao Covenants, E taku; bwa E na kawaekoa ana mwakuri inanon taina.”1
Ngaira, ngkai naati tamnei iroun Tamara are i Karawa, ti kanakomaiaki nakon te aonaaba n te tai aei bwa ti aonga ni ira te waaki ni kawaekoa te mwakuri ae kakannato aei.
Te Uea e bon aki, n aron ae I ataia, e kamatata bwa Ana mwakuri e tii kabaeaki nakon te maiu aei. N oneanmwiin anne, Ana mwakuri a irekereke ma bwaai aika akea tokiia. I kakoaua bwa E kawaekoa Ana mwakuri n te aonaaba n tamnei. I kakoaua naba bwa te Uea, rinanoia Ana toro ikekei, a katauraoiia tamnei aika mwaiti bwa a na butimwaea te euangkerio. Tabera bwa ti na ukoukouriia ara mate ao imwiina ti na nako nakon te tembora ao ni karaoi otenanti aika tabu bwa a na kairaki naake a mena riaon te rabuna ni karekei taai ni kakabwaia aikana ti a tia naba ni karekei.
Ni kabane Aomata aika Itiaki ni Boong aika Kaitira aika raoiroi n te aonaaba n tamnei a tabetabe, e taku Beretitenti Brigham Young (1801–77). “Tera ae a bon karaoia ikekei? A taetaekina te euangkerio, a taetaekina te euangkerio n taai nako, ao ni katauraoa te kawai ibukira ni kawaekoa ara mwakuri ni katean taian tembora ikai ao n taabo nako.”2
Ngkai, te mwakuri n rongorongon te utu e bon aki bebete. Ibukimii ngkami aika roko mai Scandinavia, I tibwaua aron tabeaiangami. N aron te katoto, ibuakoia au bakatibu n Sweden, aran tibu te unimwaane bon Nels Monson; aran tamana bon tiaki naba Monson ma bon Mons Okeson. Aran taman Mons bon Oke Pederson, ao aran tamana bon Peter Monson—e a manga oki naba nakon Monson.
Te Uea e kantaningako ao ngai bwa ti na ukeuke ma te botumwaaka ibukin rongorongoia ara utu. I taku bwa te moan bwai ae ti riai ni karaoa raoi iai ara mwakuri e na iai iroura Tamnein Tamara are i Karawa. Ngkana ti maiuakina ae raoiroi n aron ae ti ataa aron maiuakinana, E na kauka te kawai ibukin kakoroan bukin taian kakabwaia ake ti botumwaaka ni ukoukori ma nanora ni koaua.
Ti na bae ni karaoi kairua, ma akea mai buakora ae e na kona n rang ni mwaatai n te mwakuri n rongorongon te utu n ae e na aki moa riki bwa te tia moan waaki. Ai ngaia are, ti riai ni botumwaaka ni karaoa te mwakuri aei, ao ti riai n tauraoi ni kaitarai kaangaanga [inanon karaoakina]. Bon tiaki aio te mwakuri ae bebete, ma te Uea e a tia ni mwiokoiko bwa tabem, ao E a tia ni mwiokoai bwa tabeu.
Ngkai ko karaoa te mwakuri iaon rongorongon te utu, ko na kuneko bwa ko a rinanon kaangaanga (are e tukiko man karaoan te rikirake ni mwakuri iaon rongorongon am utu), ao ko na kangai ni bon nakoim, “Ai bon akea riki te bwai ae I kona ni karaoia.” Ngkana ko a roko n te aekaki n iango anne, katorobubua iaon bubuan waem ao butia te Uea bwa e na kauka te kawai, ao E na kauka te kawai ibukim. I kakoaua bwa e bon koaua aei.
Te Tama are i Karawa e tangiriia Natina ake n te aonaaba n tamnei n aron mwaitin tangiram irouna ao ngai. Ni kaineti ma te mwakuri ibukin kamaiuaia ara mate, e taku te Burabeti Iotebwa Timiti, “Ao ngkai oin ana kantaninga te Atua e kawaekoaki ibukin kakoroan bukiia, ao bwaai ake a taekinaki irouia burabeti a korobukiia, ngkai e a tia ni kateaki uean te Atua iaon te aba, ao kaokakin bwaai n aron teia ake ngkoa, te Uea e a tia ni kaoka te beku aei ma te kakabwaia nakoira.”3
Ni kaineti ma ara bakatibu ake a tia ni mate n akea aia atatai iaon te euangkerio, e katanoata Beretitenti Joseph F. Smith (1838–1918), “Rinanon ara kekeiaki ibukiia te tiein are a kabaeaki iai a na bwaka mai iaoia, ao te rotongitong are a katobibiaki iai e na kaitiakaki nako, bwa te ota anne e na raneanea iaoia ao a na ongo n te aonaaba n tamnei bwa e a tia ni karaoaki te mwakuri ibukiia mairouia natiia ikai, ao a na kimwareirei ma ngkoe ni karaoan beeku aikai.”4
Bon mirion mwaitiia naati tamnei iroun Tamara are i Karawa ake a tuai man ongo aran Kristo imwaain mateia ao a nako n te aonaaba n tamnei. Ma ngkai a tia n reiakinaki taekan te euangkerio ao a tataninga te bong ngkana ngkoe ao Ngai ti na karaoa te kakae ae kainnanoaki ni kaitiaka kawaia bwa ti aonga ni kona n nako n ana auti te Uea ao ni karaoa te mwakuri ibukiia ake a bon aki kona ni karaoi i bon ibukiia.
Tariu ao mwaaneu, I kakoaua bwa te Uea e na kakabwaiaira ngkai ti butimwaea ao ni kaeka te kakawaenako aei.
Reirei man te Rongorongo Aei
Iangoa te karaki ae mamatenanom iai man rongorongon am utu ao tibwaua te karaki aei ma naake ko kawariia. Ko kona ni kabonganai titiraki aikai n aia mwakoroataei man aia Rongorongo Moan Beretitentii (iteraniba 6) ni kaungaia naake ko kawariia n tibwauai aia karaki. Iangoa warekan Doctrine ao Covenants 128:15 ao maroroakina kakawakin karaoan otenanti n te tembora n tei ibukiia ara bakatibu.
© 2014 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/14. Kariaiakaki rairana: 6/14. Rairan te First Presidency Message, June 2014. Kiribati. 10866 859