Mensahe sa Visiting Teaching, Hunyo 2014

Ang Langitnon nga Misyon ni Jesucristo: Alagad

Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sa kabuhi kag misyon sang Manluluwas makapadugang sang inyo pagtuo sa Iya kag magabugay sa ila nga inyo ginabantayan paagi sa visiting teaching? Para sa dugang nga impormasyon, mag-log on sa reliefsociety.lds.org.

Pagtuo, Pamilya, Bulig

Sa aton pag-alagad sa iban, kita mangin matuod-tuod nga mga sumulunod ni Jesucristo, nga nagpahamtang sang halimbawa para sa aton. Si Pangulong Thomas S. Monson nagsiling: “Ginapalibutan kita sadtong mga nagakinahanglan. …Kita ang mga kamot sang Ginuo diri sa duta, nga may obligasyon sa pag-alagad kag sa pagtib-ong sang Iya mga kabataan.¹

Si Linda K. Burton, pangkabilugan nga pangulo sang Relief Society, nagtudlo: “Sa sige nga paghimo, ang tagsa sa aton sarang mangin mas pareho sa Manluluwas samtang nagaalagad kita sa mga anak sang Dios. Agud mabuligan kita nga [mag-alagad] sing mas maayo sa isa kag isa, nagapanugyan ako sang apat ka tinaga nga panumdumon: ‘Una magpanilag, dayon mag-alagad.’ …Kon himuon naton ini, nagatuman kita sang mga kasuguan, kag ang aton pag-alagad, pareho kay Pangulong Monson, mangin ebidensya sang aton pagkadisipulo.”²

Sarang kita magpangamuyo tagsa ka aga agud makakita sang mga oportunidad sa pag-alagad sa iban. “Giyahan kamo sang Amay nga Langitnon, kag ang mga anghel magabulig sa inyo,” siling ni David L Beck, pang-kabilugan nga pangulo sang Young Men. “Pagahatagan kamo sang gahum sa pagbugay sang mga kabuhi kag pagsagop sang mga kalag.”³

Gikan sa Balaan nga mga Kasulatan

Mateo 20:25–28; 1 Nefi 11:27–28; 3 Nefi 28:18

Gikan sa Aton Kasaysayan

Sa pang-kabilugan nga komperensya sang Oktubre 1856, si Pangulong Brigham Young (1801–77) nag-anunsyo nga ang mga pionero nga de-kariton nagapatabok pa sa kapatagan kag ang kada isa dapat gid nga magbulig tipon sang mga suplay para sa ila sa gilayon. Si Lucy Meserve Smith nagsulat nga ang mga kababayin-an “naghukas sang ila mga petticoat [dalagko nga mga sayal], mga medyas, kag tanan nga bagay nga pwede nila ihatag, didto mismo sa Tabernakulo, kag ginkarga [ang mga ini] sa mga karwahe.”

Sang nag-inabot na ang ginpangsalbar nga mga pionero sa Siyudad sang Salt Lake, si Lucy nagsulat, “Wala na sing … mas nagpalipay sa akon nga buluhaton sa bug-os ko nga kabuhi, ang subong nga balatyagon sang pag-isa nagpangibabaw. Kinahanglan ko lang gid magkadto sa tindahan kag ihambal kon ano ang gusto ko [para makabulig sa mga nag-alabot]; kon tela man ini, takson nila ini kag ihatag nga wala sing bayad.”⁴

Si Pangulong George Albert Smith (1870–1951) naghambal parte sa pag-alagad sa iban: “Ang aton wala’y katapusan nga kalipay mangin suno sa paagi nga ginhalad naton ang aton kaugalingon sa pagbulig sa iban.”⁵

Binagbinaga Ini

Paano ang pangamuyo makabulig sa aton nga mangin mga instrumento sa mga kamot sang Ginuo?
Paano ang pag-alagad sa iban makabulig sa aton nga magtipig sang aton mga kasugtanan?

© 2014 iya lang sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14. Petsa sang pagtugot sa paglubad: 6/14 Paglubad sang Visiting Teaching Message, June 2014. Hiligaynon. 10866 861