Mensahe sang Unang Panguluhan, Hunyo 2014
Pagpadasig sang Buluhaton
Nahibaloan bala ninyo nga ang ginpanumbalik nga Simbahan 98 na ka tuig antes ini makaangkon sang 100 ka mga stake? Pero wala pa mag-30 ka tuig pagkaligad sina, ang Simbahan naka-organisar pa gid sang 100 ka mga stake. Kag walo lamang ka tuig pagligad sina ang Simbahan may masobra na sa 300 ka mga stake. Sa karon may masobra na kita 3,000 ka mga stake.
Ngaa bala subong sini kadasig ang ining pagtubo? Tungod bala nga mas kilala na kita karon? Tungod bala nga may matahum kita nga mga simbahan?
Ining mga butang importante, pero ang rason nga nagadako ang Simbahan sa karon kay ginhambal sang Ginuo nga mangin subong sini. Sa Doctrine and Covenants, nagsiling Sia nga pagapadasigon Niya ang Iya buluhaton sa husto nga tion.1
Kita, bilang espiritu nga kabataan sang aton Amay nga Langitnon, ginpadala sa kalibutan sa sini nga panahon agud sarang kita makaentra sa pagpadasig sining dako nga buluhaton.
Ang Ginuo wala gid, sa akon pagkahibalo, nagsiling nga ang Iya buluhaton limitado lamang sa sini nga kinabuhi. Kundi, ang Iya buluhaton nagalakip sang wala’y katapusan. Nagapati ako nga Iya ginapadasig ang Iya buluhaton sa kalibutan sang mga espiritu. Nagapati man ako nga ang Ginuo, paagi sa Iya mga alagad didto, nagahanda sang madamo nga mga espiritu para magbaton sang ebanghelyo. Ang aton obra amo nga pangitaon ang aton mga minatay kag dayon magkadto sa templo kag maghikot sang sagrado nga mga ordinansa nga magadala sa ila nga yara sa pihak nga kabuhi sang pareho nga mga oportunidad nga yari sa aton.
Ang tagsa ka maayo nga Santos sa Ulihing-mga-Adlaw sa kalibutan sang mga espiritu masako, siling ni Pangulong Brigham Young (1801–77). “Ano ang ginabuhat nila didto? Nagapangwali sila, nagapangwali sa tanan nga tion, kag nagahanda sang dalan para sa aton agud padasigon ang aton buluhaton sa pagpatindog sang mga templo diri kag bisan diin pa.”2
Sa karon, ang buluhaton sa family history indi mahapos. Sa inyo nga mga naggikan sa Scandinavia, nahangpan ko ang inyo kabudlayan. Halimbawa, sa akon Swedish nga linyada, ang ngalan sang akon lolo amo si Nels Monson; ang ngalan sang iya tatay indi Monson kundi Mons Okeson. Ang ngalan sang tatay ni Mons’ amo si Oke Pederson, kag ang ngalan sang iya tatay amo si Peter Monson—balik naman sa Monson.
Ang Ginuo nagapaabot sa inyo kag sa akon nga mangin matutom sa paghimo sang aton family history. Sa banta ko ang una gid naton nga himuon kon gusto naton himuon sing maayo ang aton ulobrahon amo ang mag-angkon sang Espiritu sang aton Amay nga Langitnon upod sa aton. Kon magpangabuhi kita nga matarong suno sa nahibal-an naton, pagabuksan Niya ang dalan para sa katumanan sang mga bugay nga hanuot kag matutom naton nga ginapangita.
Makahimo kita sang mga sayop, pero wala sing isa sa aton nga mangin eksperto sa buluhaton sang family history nga wala nagaagi sang pagka-bag-uhanon. Gani, kinahanglan naton mangin matutom sa sini nga buluhaton, kag kinahanglan naton maghanda para sa mga kabudlayan. Indi ini mahapos nga ulobrahon, pero ginhatag ini sang Ginuo sa inyo, kag ginhatag Niya ini sa akon.
Sa inyo pagtuman sang buluhaton sang family history, makasumalang kamo sang mga sablag, kag magasiling kamo sa inyo kaugalingon, “Wala na gid ako sing mahimo.” Pag-abot ninyo sa sina nga punto, magluhod kag pangabaya ang Ginuo nga buksan ang dalan, kag pagabuksan Niya ang dalan para sa inyo. Nagasaksi ako nga ini matuod.
Palangga sang Amay nga Langitnon ang Iya mga anak sa kalibutan sang mga espiritu kasubong sang Iya pagpalangga sa inyo kag sa akon. Nahanungod sa buluhaton sang pagluwas sang aton mga minatay, ang Propetang si Joseph Smith nagsiling, “Kag karon samtang ang dalagko nga mga katuyuan sang Dios madasig nga nagakatuman, kag ang mga butang nga ginpanghambal sang mga Propeta nagakatabo, samtang ang ginharian sang Dios ginapasad sa kalibutan, kag ang dumaan nga pamaagi sang mga butang ginapanumbalik, ang Ginuo nagpakita sa aton sining katungdanan kag pribelihiyo.”3
Nahanungod sa aton mga katigulangan nga nagtaliwan nga wala makahibalo sang ebanghelyo, si Pangulong Joseph F. Smith (1838–1918) nagpahayag, “Paagi sa aton mga pagtinguha para sa ila ang ila mga gapos mahukas sa ila, kag ang kadulom nga nagapalibot sa ila mapuhag, agud ang kasanag magsilak sa ila kag ila mabatian sa kalibutan sang mga espiritu nga ang buluhaton naobra na para sa ila sang ila mga kabataan sa diri, kag magakalipay upod sa inyo sa inyo paghikot sining mga katungdanan.”4
May yara sang minilyon ka espiritu nga kabataan sang Amay nga Langitnon nga wala pa makabati sang ngalan ni Cristo antes mapatay kag magpadayon sa kalibutan sang mga espiritu. Pero karon natudluan na sila sang ebanghelyo kag nagahulat sang adlaw nga ikaw kag ako magaobra sang kinahanglanon nga pagpangita agud hawanan ang dalan agud makasulod kita sa balay sang Ginuo kag hikuton ang buluhaton nga indi nila mahimo para sa ila mga kaugalingon.
Mga kauturan ko, nagasaksi ako nga ang Ginuo magabugay sa aton sa aton pagbaton kag paghulag sa sining panghangkat.
Pagtudlo gikan sa Sining Mensahe
Magpanumdum sang isa ka paborito nga istorya gikan sa kasaysayan sang inyo pamilya kag ipaambit ining istorya sa inyo ginabisitahan. Basi gusto ninyo gamiton ang mga pamangkot sa seksyon sang kabataan sa Mensahe sang Unang Panguluhan (pahina 6) agud paisugon ang inyo ginabisita nga magpaambit sang ila mga istorya. Binagbinaga ang pagbasa sang Doctrine and Covenants 128:15 kag hambalan ang importansya sang paghikot sang mga ordinansa sa templo tal-os sa aton mga katigulangan.
© 2014 iya lang sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14. Petsa sang pagtugot sa paglubad: 6/14. Paglubad sang First Presidency Message, June 2014. Hiligaynon. 10866 861