2014
Yexus Khetos lub Luag Hauj Lwm Los Saum Ntuj Los: Tus Txhawb Pab
June 2014

Cov Mus Saib Xyuas tom Tsev tsab Xov, Rau Hli Ntuj 2014

Yexus Khetos lub Luag Hauj Lwm Los Saum Ntuj Los: Tus Txhawb Pab

Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub tus Cawm Seej lub neej thiab lub luag hauj lwm yuav ua rau koj txoj kev ntseeg Nws loj tuaj thiab foom koob hmoov li cas rau cov uas koj saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.

Kev Ntseeg, Tsev Neeg, Kev Pab

Thaum peb txhawb pab lwm tus, peb yog Yexus Khetos cov thwj tim tiag tiag, tus uas tau coj yam ntxwv rau peb xyaum. Thawj Tswj Hwm Thomas S. Monson hais tias: “Cov uas xav tau kev pab nyob ib puag ncig. … Peb yog tus Tswv txhais tes hauv ntiaj teb no, uas twb raug txib kom mus pab thiab txhawb nqa Nws cov me nyuam.”1

Linda K. Burton, Koom Haum Niam Tsev tus tuam thawj tswj hwm, qhia hais tias, “Yog tias peb xyaum ua, peb txhua tus yeej yuav ua tau zuj zus li tus Cawm Seej thaum peb pab tus Tswv cov me nyuam. Kom pab peb ib leeg hlub tau ib leeg zoo me ntsis, kuv xav kom peb nco cov lus no: ‘xam saib ua ntej ces mam li pab.’ …Thaum peb ua li no, peb tab tom khaws peb tej kev khi lus, thiab peb txoj kev pab, zoo li Thawj Tswj Hwm Monson, yuav ua puav pheej txog peb txoj kev ua ib tug pab coj.”2

Peb thov tau Vajtswv txhua hnub kom pom tej cib fim pab lwm tus. David L. Beck, Koom Haum Tub Hluas tus tuam thawj tswj hwm hais tias, “Leej Txiv Saum Ntuj Ceeb Tsheej yuav coj nej kev, thiab cov tim tswv yuav pab nej. Nej yuav muaj hwj chim foom koob hmoov rau lwm tus thiab cawm lawv cov ntsuj plig dim.”3

Los ntawm cov Vaj Lug Kub

Mathais 20:25–28; 1 Nifais 11:27–28; 3 Nifais 28:18

Los ntawm Peb zaj Keeb Kwm

Nyob hauv lub tuam rooj sab laj thaum lub Yim Hli Ntuj xyoo 1856, Thawj Tswj Hwm Brigham Young (1801–77) tshaj tawm tias cov neeg pioneer rub laub tseem hla tej tiaj nrag thiab txhua tus yuav tsum khaws cov khoom mus pab lawv tam sim ntawd. Lucy Meserve Smith sau hais tias cov poj niam “hle lawv cov tiab hauv qab, thom khwm, thiab txhua yam uas lawv hle tau, nyob hauv lub Tsev Kheej kiag ntawd, thiab tso [tej ntawd] rau hauv tsheb.”

Thaum cov neeg pioneer uas lawv cawm dim pib tuaj txog lub nroog Salt Lake City, Lucy sau hais tias, “Kuv yeej tsis tau txaus siab rau tej hauj lwm kuv tau ua hauv kuv lub neej npaum li lub sij hawm ntawd uas kuv ua hauj lwm pab lawv, vim zoo li sawv daws koom siab heev. Kuv tsuas mus rau hauv lub tsev muag khoom xwb thiab qhia lawv tias kuv xav tau dab tsi; yog tias kuv yuav ntaub, ces lawv muab ntsuas thiab muab rau kuv pub dawb xwb.”4

Thawj Tswj Hwm George Albert Smith (1870–1951) hais txog kev txhawb pab lwm tus: “Peb txoj kev zoo siab mus ib txhis yuav muaj ntau npaum li peb mob siab pab lwm tus.”5

Xav Txog Qhov No

  1. Kev thov Vajtswv yuav ua li cas kom pab peb ua cuab yeej nyob hauv tus Tswv txhais tes?

  2. Qhov uas peb txhawb pab lwm tus yuav ua li cas pab peb ua raws li peb tej kev khi lus?

© 2014 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv : 6/14. Pub txhais ua lus Hmoob: 6/14. Kev txhais lus Visiting Teaching Message, June 2014. Hmong. 10866 295

Lus Cim

  1. Thomas S. Monson, “What Have I Done for Someone Today?” Liahona, Kaum Ib Hlis Ntuj 2009, 86.

  2. Linda K. Burton, “First Observe, Then Serve,” Liahona, Kaum Ib Hlis Ntuj 2012, 78, 80.

  3. David L. Beck, “Your Sacred Duty to Minister,” Liahona, Tsib Hlis Ntuj 2013, 56.

  4. Lucy Meserve Smith, nyob hauv Daughters in My Kingdom: The History and Work of Relief Society (2011), 36–37.

  5. George Albert Smith, nyob hauv Daughters in My Kingdom, 77.

Luam