Parau poro‘i no te hahaereraa a te mau tuahine, Tiurai 2014
Te misioni hanahana a Iesu Mesia : Paruru
A tuatapapa na roto i te pure i teie materia ma te imi ia ite eaha te faaite atu. Nahea te maramaramaraa i te oraraa o te Faaora e i Ta’na misioni e faarahi i to outou faaroo Ia’na e e haamaitai i te feia ta outou e haapa‘o nei na roto i te tere hahaereraa ? No te mau haamaramaramaraa hau atu, a haere i ni‘a i te reliefsociety.lds.org.
Te Faaroo, Te Utuafare, Te Totauturu
O Iesu Mesia to tatou paruru i te Metua ra. Te parau paruru to’na auraa i roto i te reo latino, « te taata e paruru no te tahi ».1 E paruru te Faaora no tatou, ma te faaohipa i te aau maitai, te parau ti‘a e te aroha. E nehenehe te iteraa i te reira e faaî ia tatou i te here e te mauruuru no Ta’na Taraehara.
« A faaroo mai na ia’na o te ‘arai i te Metua ra, o tei ani u‘ana i te parau no outou i mua ia’na ra—
« I te na o raa’tu e : E te Metua e, a hi‘o na i te mau ati e te pohe hoi no’na o tei ore roa i rave i te hara ra, o ta oe i mauruuru roa ra ; a hi‘o na i te toto no to oe Tamaiti nei o tei haamaniihia ra, te toto hoi no’na no ta oe iho i horoa’tu ia faahanahana oe ;
« No reira, e te Metua e, a faaora na i teie ta’u nei mau taea‘e i tei faaroo na i to’u nei i‘oa, ia haere mai ai ratou ia’u nei e ia noaa hoi te ora mure ore ». (PH&PF 45:3–5).
Nio ni‘a i te Mesia to tatou paruru, ua parau o Elder D. Todd Christofferson no te Pŭpŭ no te tino Ahuru ma Piti Aposetolo : « E mea faufaa rahi mau no’u, i te mea e, e nehenehe ta’u i te mau taime atoa e i roto i te mau huru haafatataraa atoa na roto i te pure i te terono o te aroha, e e faaroo mai to’u Metua i te Ao ra i ta’u aniraaa, e to’u Paruru, oia tei ore i rave i te hara, tei haamanii i to’na toto, e paturu oia i ta’u aniraa ».2
No roto mai i te mau papaʻiraa moʻa
Mosia 15:8–9; Moroni 7:28; Te Parau Haapiiraa e te Mau Parau Fafau 29:5; 110:4
No roto mai i to tatou aamu
I roto i te aamu o te Ekalesia a te Fatu, ua pee te mau pĭpĭ vahine a Iesu Mesia i To’na hi‘oraa. Ua riro o Esetera ei hoê paruru haapa‘o maitai e te itoito. Ua tuu maira to’na taea‘e fetii o Moredekai i te hoê parau faaau na te arii e taparahi i te mau ati Iuda, e ua a‘o hua’tu ia’na « ia faateni hua’tu [i te arii] ia ora to’na mau taata ». Na ô faahou atu ra Moredekai : « O vai te ite e te mea teie i noaa’i ia oe te hau i teie nei anotau ? » Esetera 4:8, 14.
Noa’tu te ati o te riroraa ei paruru no to’na mau taata, ua farii o Esetera : « E ore noa’tu â te au i te ture, e haere â vau i te arii ra : e ia pohe au ra, pohe noa’tu vau ». (Esetera 4:16).
I muri iho ua parau Esetera ma te haehaa i te arii « tipapa maite ihora i te tiroroaraa avae, e ua faateni atura ia’na ma te roimata… e papa‘i i te parau faaore… e rave i te mau ati Iuda ia mou roa ». Ua na ô faahou atu ra oia, « eaha ra hoi au nei e tia’i ia faaoromai i te hi‘oraa’tu i teie nei ino e hopoihia mai i nia i to’u nei mau taata ? ». (hi‘o Esetera 8:3,5–6. Ua tamaruhia te aau o te arii, e ua farii oia i ta’na aniraa.3
© 2014 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/14. Parau faati‘a no te iritiraa : 6/14. Iritiraa no Visiting Teaching Message, July 2014. Tahitian. 10867 895
A feruri i teie
Nahea te parururaa a Iesu Mesia i te faaûru ia tatou ia horo‘a i te aroha e te faaoreraa hara ia vetahi è ?