Ennaan eo an Būreejtōnji eo Kein Kajuon, Juļae 2014
Kallim̧ur eo kōn Oktak an Bōro ko
Jinō, Mildred Bennion Eyring, eaar rūttoļo̧k ilo jukjukinpād an rikallib ilo Granger, Utah, USA. Juon iaan būratōr ro an, Roy, kar ļoor pejnej eo an baam̧le eo kōn tāāp jiip. Ke eaar juon likao eaar joļo̧k elōn̄ wiik ettoļo̧k jān kapijuknen eo. Ilo tōre ko eaar jino dikļo̧k an kar itok limo ilo Kabun̄ in. Āliktata eaar em̧m̧akūt jān Idaho, USA, kar m̧are, im kar wōr jilu nejin ajri ro. Eaar mej ke eaar 34 iiō dettan ke kōrā eo pāleen eaar 28 iiō dettan im ajri ro nejin raar iddik.
Men̄e baam̧le eo edik an Roy eaar pād ilo Idaho im jinō eaar em̧m̧akūt enan̄in 2,500 m̧aiļ ko (4,025 km) n̄an New Jersey, USA, liin emakijkij an kar jeje n̄an er leta in iakwe ko im kōketak. Baam̧le eo an eo ulepa em̧m̧an eaar ba kōn m̧am̧a āinwōt “Aunt Mid.”
Iiō ko raar eļļāļo̧k, im juon raan iaar bōk juon taļboon jān juon iaan ro rilikū. Kar jiron̄ eō bwe lio emej pāleen kar pāleen Roy eaar mej. Eo rilikū eaar ba, “Aunt Mid ekōnaan bwe kwon jeļā.” Aunt Mid eaar mej wōt etto, bōtaab baam̧le eo an eaar en̄jake wōt iakwe eo an im pukōt tok n̄an jiron̄ eō.
Iaar bwilōn̄ kōn ewi jon̄an an jinō kar kōm̧m̧ane juon jerbal ilo baam̧le eo an ejja āinwōt jerbal eo an rikanaan ro an Rinipai raar kōm̧m̧an ilo baam̧le ko aer n̄an pād epaake doon wōt n̄an ro nukier raar kōņaan bōktok n̄an ko̧jpeļ eo an Jisōs Kraist. Nipai eaar je juon ļo̧o̧k me eaar kōjatdikdik enaaj kar kareel ajri ro nejin ro jeir im jatier n̄an bar ro̧o̧l n̄an tōmak eo an patriak eo aer, Liai. Ļōmaro nejin Mosaia raar kwaļo̧k bwe ejja iakwe eo wōt raar kwaļo̧k ko̧jpeļ eo n̄an ro ineen Liai.
Irooj eaar kōpooj iaļ ko n̄an kōj n̄an en̄jake iakwe ilo baam̧le ko me remaron̄ wōnm̧aanļo̧k wōt indeeo. Rim̧m̧an ded ro ilo Kabun̄ in rainin rej en̄jake an būruwier oktakļo̧k n̄an baam̧le ko aer. Rej pukōt āt ko an ro uwaan baam̧le eo ro raar jab wōr aer iien em̧m̧an n̄an bōk kain̄i ko an lo̧mo̧o̧r ilo mour in. Rej bōk āt kein n̄an tampeļ eo. Ke rej tulo̧k ilo dān ko an peptaij, ewōr aer iien em̧m̧an n̄an en̄jake iakwe eo an Irooj im an ro uwaan baam̧le eo n̄an ro me rej kōm̧m̧ani kain̄i ko ilo etaer.
Imaron̄ keememej wōt iakwe eo ilo ainikien eo rilikū me eaar kūr im ba, “Jined em̧ōj an mej, im Aunt Mid eaar kōņaan bwe kwon jeļā.”
N̄an kom̧ ro me rej kōm̧m̧ani kain̄i ko n̄an ro uwaan baam̧le eo rej pukōtļo̧k er ilo iakwe, āinwōt kar an ļōm̧aro nejin Mosaia im rikanaan Nipai. Āinwōt er, kom̧ naaj en̄jake lan̄lōn̄ kōn ro rej bōk jortak eo ami. Kom̧ maron̄ barāinwōt kōtmene n̄an en̄jake ejja bun̄bōro in wōt āinwōt Ammon, eo eaar ba kōn jerbal in mijenede eo an ibwilijin ro uwaan baam̧le eo raar ettoļo̧k:
“Kōn menin, jān aiboojoj, aaet, jenaaj aiboojoj ilo Irooj; aaet, jenaaj m̧ōņōņō, bwe ad lan̄lōn̄ eobrak; aaet, jenaaj nebar ad Anij indeeo. Lo, wōn emaron̄ ļap an aiboojoj ilo Irooj? Aaet, wōn emaron̄ ba eļap kōn An kajoor eļap, im kōn an tiriam̧o, im kōn an lōjokmen n̄an ro nejin armej? Lo, ij ba n̄an kom̧, ijjab maron̄ ba jidik in jon̄an eo ij en̄jake” (Alma 26:16).
Ij kwaļōk naan in kam̧ool bwe en̄jake ko an iakwe ewōr ippāmi n̄an ro uwaan baam̧le eo ami—jekdo̧o̧n ia eo rej pād ie—rej juon kakūrm̧ool an kallim̧ur eo bwe Elijah enaaj kar itok. Eaar itok. Būruwōn ro nejier rej oktakļo̧k n̄an ro jemeer, im būruwōn ro jemeer rej oktakļo̧k n̄an ro nejier (lale Malakai 4:5–6; Joseph Smith—History 1:38–39). N̄e kom̧ij en̄jake ikdelel eo n̄an pukōt āt ko an rūtto ro ami im bōk āt kein n̄an tampeļ eo, kom̧ij en̄jake kūrm̧ool eo an kanaan jab in.
Ej juon kōjeram̧m̧an n̄an mour ilo tōre in me kallim̧ur eo an oktak in bōro ko emōj aer kūrmool. Mildred Bennion Eyring eaar en̄jake ikdelel jab in ilo būruwōn. Liin eaar iakwe baam̧le eo an būratōr eo an, im eaar pukōtļo̧k er. Eaar en̄jake an būruwier oktak ilo iakwe n̄an Aunt Mid kōnke raar jeļā eaar iakwe er.
© 2014 jen Intellectual Reserve, Inc. Aolep jim̧we rej pād ippān. Kar jeje ilo USA. Kōmālim ilo kajin English: 6/14. Kōmālim an ukook: 6/14. Ukook eo an First Presidency Message, July 2014. Marshallese. 10867 874
Katakin jān Ennaan In
Komaron̄ kōņaan riiti naan in kanaan ko kōn jetōb in Elijah ippān ro kwoj loļo̧k (lale Malakai 4:5–6; Joseph Smith—History 1:38–39). Kōnono kōn wāween ko n̄an erom bōk kuņaam̧ ippān menmenbwij an baam̧le, ekoba kein jerbal ko āinwōt indexing, pija, im blog. Eļan̄n̄e ro kom̧ij loļo̧k rejjab meļeļe kōn men kein FamilySearch.org, ļōmņak in bōk jet iien n̄an kwaļo̧k n̄an er.