Iren Mahsen en Presidensi Keieu, Sulai 2014
Inou en Kawikila Mohngiong Kan
Ahi nohnohu, Mildred Bennion Eyring, tikida nan kahnihmw en kousapw kei nan Granger, Utah, USA. Emen rie ohl, Roy, iangala doadoahk en aht peneinei en apwalih sihpw. Ni eh mwahnakapw e kin mihmi wasahkis dohsang ihmwe erein wihk tohto. E kedekedeo sohla nsenohki Mwomwohdiso. E mihmihla Idaho, USA, pwopwoudda, oh naineki seri silimen. E mehla ni eh sounpar 34 ni ah pwoudo eh sounpar 28 oh neira serihko tikitik.
Mendahte ahn Roy ah kisin peneineio ahr mihmi Idaho oh ahi nohno kosoula mwail [riekid limepwuki] 2,500 (4,025 km) dohsang nan New Jersey, USA, e kin ntinglahng irail kisin likou en limpoak oh kangoang. Peneinei en rien ei nohnohu kin likuwerihki ahi nohno ni limpoak “Aunt Mid.”
Sounpar kei doula, oh ehu rahno I alehdi delepwohn ehu sang emen ahi cousin. I esehda me ahn Roy ah liohdio mehla. Ahi cousin-o nda, “Aunt Mid pahn men komwi en ese.” Aunt Mid mehla wereilahr, ahpw peneineio kak pehm lel met ah limpoak oh wia uwen arail kak en kehsehkinie.
I medewe duwen ahi nohnohu eh kapwaiada ah pwukoa nan ah peneinei duwehte pwukoa me soukohp akan en mehn Nephi kan kapwaiada nan arail peneinei kan ni arail kin karanih arail peneinei me irail men ehukikihong rongamwahu en Sises Krais. Nephi ntingihdi rekohd ehu me e koapwoaroapwoariki pahn lipwan ong nein rie pwutangko serihkan en pwuralahng pwoson en arail patriark, Lehi. Nein Mosiah pwutangkan kasalehda soangen limpoakohte ni arail kalohk rongamwahu ong kadaudok en Lehi.
Kauno ketikihong kitail wiepehkan en pehm limpoak nan peneinei kan me kak doudoula kohkohlahte. Me pwulopwul kan nan Mwomwohdiso rahn pwukat kin pehm arail mohngiong kan kawikila ong arail peneinei kan. Irail raparapahki edehn tohn arail peneinei me sohte ahniki ansou mwahu en alehdi tiahk sarawi kan en komour nan mour wet. Irail kin wahla eden aramas ko nan tehnpas sarawi. Ni arail kin pidolong nan pihl kan en pepdais, irail ahniki ansou mwahu en pehm limpoak en Koht oh en tohn arail peneinei kan me re wiliandi nan tiahk sarawi ko.
I kak tamatamante ngilen limpoak ni ngihl en ahi cousin-o me delepwohndo oh nda, “Aht nohnohu mehla, oh Aunt Mid pahn men komwi en ese.”
Kumwail me kin kapwaiada tiahk sarawi kan ong tohn peneinei kin kasalehda amwail limpoak, duwehte nein Mosiah pwutangkan oh soukohp Nephi. Duwehte irail, kumwail pahn pehm peren ong irail me alehda amwail meiroang. Kumwail kak pil kasik en pehm soangen nsenamwahuohte duwe Ammon, me ndahki ah doadoahk en misineri rehn tohn ah peneinei doh:
“Eri, kitail peren, iei, kitail pahn kepinga Koht kohkohlahte. Kilang, ihs me kak nohn pereniki Koht? Eri, ihs me kak koasoai nohn dir duwen sapwellime manaman, oh sapwellime kalahngan, oh sapwellime kanengamah ong kitail koaros? Kilang, I ndaiong kumwail, I sohte kak nda pali mekeieu tikitik me I pehm” (Alma 26:16).
I kihda ahi kadehde me pepehm en limpoak me kumwail ahniki ong tohn amwail peneinei—sohte lipilipil wasa me irail mihie—iei kapweidahn inou me Elaisa pahn kohdo. Uhdahn e kohdohr. Mohngiong en serihkan kawikilahr ong arail pahpa kan, oh mohngiong en pahpa kan kawikila ong neirail serihkan (kilang Malakai 4:5–6; Joseph Smith–History 1:38–39). Ni ahmw pehmada kupwuriki rapahki eden kadaudokamwail kan oh wahla ederail ong tehnpas sarawi, ke iangehr kapweidahn kokohpo.
E wia kapai ehu en momour nan ansou me inou enkawikila mohngiong pweidahr. Mildred Bennion Eyring pehm soangen mwekid wo nan ah mohngiong. E poakohng ahn rie pwutako peneinei, oh e nsenohkin irail. Irail pehm mohngiongirail kan kawikila ni limpoak ong Aunt Mid pwehki irail ese me e poakohng irail.
© 2014 sang Intellectual Reserve, Inc.Kolokol pwuhng koaros. Ntingda nan USA. Kamanaman ong lokaiahn wai: 6/14. Kamanaman ong kawehwe: 6/14. Kawehwehpen First Presidency Message, July 2014. Pohnpeian. 10867 885
Padapadahk sang Iren Mahsen Wet
Mwein ke pahn men wadek kokohp akan me pid duwen ngehn en Elaisa rehn irail me ke tuhwong (tehk Malakai 4:5–6; Joseph Smith—History 1:38–39). Koasoaia duwen mwomwen aramas ahr kak iang towehda doadoahk en poadoapoad en peneinei, iangahki mehn doadoahk kan duwehte indexing, kilel, oh blogging. Ma irail me ke kin tuhwong sohte nohn wehwehki FamilySearch.org, mwein ke kak song kasalehiong irail.