iTukutuku ni MataveiliutakiTaumada, Okosita 2014
Na Tatamusuki ni Kalou
E dua na marama na yacana o Christa a cakacaka taumada ena dua na kabani lailai ni sorenikau. A taleitaka okoya na nona cakacaka. E a mai dua na vu ni lomatarotaro levu ni sorenikau lalai yadua a volitaka okoya ena rawa ni mai vakavurea me veisautaki ira vakaiira ki na dua na ka e veivakurabuitaki dina—dua na kareti, dua na kaveti, se mani dua sara na vuni oki levu.
E dau taleitaka o Christa me dabe voli ena nona kompiuta ka tauri ota ka sauma na vakatataro eso. Ia ena dua na siga a ciqoma okoya e dua na kudru ka a veilecayaki vua.
“Era sega ni cakacaka na sorenikau,” a kaya na dauveivoli. “Au a voli ira ena rua na vula sa oti ka sega na ka e yaco.”
“O a tei ira beka ena qele vinaka ka solia vakarauta vei ira na wai kei ka rarama ni siga?” a taroga o Christa.
“Sega, ia au sa cakava na noqu itavi,” a sauma na dauveivoli. “Au a volia na sorenikau. Kena itini, era sa vakadeitaki mera tubu.”
“Ia o a sega ni teivaki ira?”
“E sega sara vakaidina. Oqori ena vakavuna me na duka na ligaqu.”
A vakasamataka o Christa na ka oqo ka mani nanuma me sa na volai na idusidusi ni teivaki sorenikau. A vakadeitaka okoya na cava me na imatai ni dusidusi: “Mo na vakamuria na ivakavuvuli ni teitei me kadre kina na sorenikau. Ena sega ni rawa ni o biuti ira ena tutu ni yaya ka namaki ira mera tubu.”
E a sega ni dede ni baci veilecayaki okoya ena dua tale na kudru.
“Era sega ni vakayacoka tiko na sorenikau,” a cauraka na dauveivoli.
“O a tei ira beka ena qele vinaka?” a sauma o Christa. “O a solia li vei ira na ivakarau donu ni wai kei na rarama ni siga”
“O, io,” a suguraka mai na dauveivoli. “Au cakava kece oya―vaka saraga e sa tukuni ena pakete. Ia era sega ni cakacaka.”
“E a bau yaco mada e dua na ka? Era kadre li?”
“Sega ni dua na ka a yaco,” a kaya na dauveivoli. “Au teivaki ira me vaka a dusimaki. Au a vakanuinui voli me rawati na tomata ena vakayakavi. Ia oqo au sa rarawa saraga.”
“Wawa,” a sauma lesu o Christa. “O kaya tiko ni ko a tea na sorenikau nikua?”
“Kakua ni veivakacalai,” a sauma na dauveivoli. “Au a teivaki ira ena macawa sa oti. Au a sega ni namaka me’u raica na tomata ena imatai ni siga; au a vosota toka. Me’u tukuna mada vei iko, sa bau levu saraga na veivakasuasuataki kei na wawa mai na gauna oya ki na gauna oqo.”
A kila o Christa ni sa dodonu me na vakuria tale e dua na idusidusi: “Na sorenikau oqo era vakamuria na ivakaro vulici ena teivaki ni veika bula. Kevaka o teivaka na sorenikau ena mataka ka namaka mo kana tomata ena macawa ka tarava, o na rarawa vakaidina. Mo na dau yalovosota ka waraka na cakacaka ni veika bula mera seraki ira e matamu.”
A toso vinaka na veika taucoko me yacova ni ciqoma o Christa e dua tale na kudru.
“Au sa rarawataka vakalevu na nomu sorenikau,” a tekivuna na dauveivoli. “Au teivaki ira me vaka ga a vakamacalataki ena pakete. Au vakasuasuataki ira, raica me cilavi ira na siga, ka wawa voli me yacova ni ra sa qai vuataka na nodra tatamusuki.”
“Vaka vei au ni o sa cakava donu na veika kece,” a kaya o Christa.
“Sa vinaka taucoko saraga oya,” a sauma na dauveivoli. “Ia na ka au a tauca na zucchini!”
“E vakaraitaka na noqu itukutuku ni veivoli ni oqori na sorenikau o a otataka,” a kaya o Christa.
“Ia au sega ni vinakata na zucchini; au vinakata na papukeni!”
“Au sega ni taura vinaka.”
“Au a teivaka na sorenikau ena noqu tiki ni qele ni papukeni—na qele vata saraga ka a vuataka na papukeni ena yabaki sa oti. Au vakacaucautaka na itei ena veisiga, ni tukuni vei ira na totoka ni papukeni era na yacova rawa. Ia ni sega ni rawati na moqili, bota, levu ni papukeni, au sa tauca na balavu, drokadroka ni zucchini. E levu sara vei ira!”
Sa qai kila tu ekea o Christa ni na sega ni rauta na idusidusi ka sa dodonu me na tutaki e dua na ivakavuvuli: “Na sorenikau o tea kei na gauna e teivaki kina ena vakatautaka na tatamusuki.”
Na Lawa ni Tatamusuki
Na iApositolo o Paula a vakatavuvuli me baleta na tatamusuki ni Kalou:
“Mo dou kakua ni vakaisini kemudou; a Kalou ena sega ni vakalialiai: na ka kecega sa kaburaka na tamata ena tamusuka talega ko ya.
“Ko koya sa kaburaka na ka ni nona itovo vakayago, ena tamusuka na rusa mai na itovo vakayago; ia ko koya sa kaburaka na ka ni Yalotabu, ena tamusuka na bula tawamudu mai na Yalo Tabu.
Ena veigauna wale tikoga oqo, e sa solia vei keda na Turaga na ikuri ni yalomatua kei na raitayaloyalo ki na ivakaro tawaveisau oqo:
“Raica sa virikotori tu mai lomalagi na ivakaro ni sa bera ni buli na vuravura oqo; ia sa vakayavutaki kina na veivakalougatataki kece ga—
Na ka eda kaburaka, eda na tamusuka.
Na tatamusuki ni Kalou e sa ka lagilagi sara vakaidina. Kivei ira era dokai Koya, e lako mai na Nona veivakalougatataki cecekia ena “ivakarau vinaka, tabaki sobu, ka kuretaki vata, ka vuabale. … Ia na ivakarau dou sa vakarautaka, ena vakarautaki tale vei kemudou” (Luke 6:38).
Me vaka ga e gadreva na sorenikau ni vuravura na sasaga kei na vosota, sa vakakina na veivakalougatataki e vuqa ni lomalagi. E sega ni rawa ni da biuta na noda lotu ena tutu ni yaya ka namaka me da tamusuka na veivakalougatataki vakayalo. Ia kevaka eda teivaka ka bucina na ivakarau ni kosipeli ena bula ni veisiga ni noda matavuvale, sa na rawa ni na yaco mera tubu cake na luveda ka vuataka na vuanikau vakayalo e vakaibalebale vakalevu kivei ira kei na itabatamata muri mai.
Na sausaumi ni Kalou ki na noda masu e sega ni dau lako kusarawa mai—so na gauna ena rairai sega saraga—ia e kila na Kalou na ka e vinaka vei ira na Luvena. Vakaidina, dua na siga eda na rai vakamatata cake; ia ena siga oya eda na vakila na vinaka kei na lomasoli ni lomalagi.
Ena gauna oqo, na noda nakinaki kei na reki levu oya meda lako ena mawe ni yava ni noda iVakavuvuli ka iVakabula ka bulataka na veibula e vinaka ka vakavoui me rawa ni noda kina na veivakalougatataki tawavoli ni tatamusuki yalataki ka cecere ni Kalou.
Na ka eda kaburaka, eda na tamusuka.
Oya na ivakaro ni lomalagi.
Oya na ivakaro ni tatamusuki ni Kalou.
© 2014 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/14. Vakadonui me vakadewa: 6/14. Vakadewa ni First Presidency Message, August 2014. Fijian. 10868 858
Veivakavulici mai na iTukutuku Oqo
Veivosakitaka vata kei ira o sikova na iwalewale e vakayagataki kina na ivakaro ni tatamusuki ni Kalou ki na veimaliwai, saumaki kei na ivakadinadina, se nakinaki ni sasaga cakacaka kei na vuli. Sa rawa ni o wilika ka navuca na ivolanikalou eso e semati ki na ivakaro oqo, me vaka na Vosa Vakaibalebale 11:18; 2 Korinica 9:6; kei na Alama 32. Vakayaloqaqataki ira mera railesuva na veinakinaki sa oti ka tuva vou na inakinaki eso me rawati kina na veivatuka dodonu. Vukei ira mera taracake e dua na yavu ni cakacaka vata me rawa ni yacovi na nodra inaki sa tuvakataki vakabalavu.