iVaqa ni Veisiko, Okosita 2014
Na iLesilesi Vakalou i Jisu Karisito: Mesaia
Vulica ena masumasu na itukutuku oqo ka tovolea mo kila na ka mo na wasea. Ena vakalevutaka vakacava na nomu vakabauti Koya na nomu kila vinaka na bula kei na ilesilesi ni iVakabula ka yaco me vakalougatataki ira talega o vakaraica voli ena veisiko? Me ikuri ni tukutuku, lako ki na reliefsociety.lds.org.
Vakabauta, Matavuvale, Veivukei
Era vakatavulica na ivolanikalou ni rawa ni da tiko ena mata ni Kalou “ena vuku ni nona yalovinaka, kei na nona loloma, kei na nona lomasoli na Mesaia Yalosavasava” (2 Nifai 2:8). Mesaia e sa “vosa vaka Aramaia kei na Iperiu ka kena ibalebale ‘na lumuti.’ … Ena Veiyalayalati Vou e sa kacivi o Jisu na Karisito, ka sa tautauvata kei na vosa va-Kirisi ni Mesaia. E kena ibalebale na Parofita lumuti, Bete, Tui, ka Dauveivueti.”1
A vakadinadinataka o Elder Jeffrey R. Holland ena Kuoramu ni iApositolo Le Tinikarua: “Au kila o [Jisu Karisito] e sa Vakatabui Duabau ni Isireli, na Mesaia ka na lako tale mai ena dua na siga ena icavacava ni lagilagi, me veiliutaki e vuravura vaka Turaga ni turaga ka Tui ni tui. Au kila ni sa sega tale ni dua na yaca e soli ena ruku i lomalagi me rawa ni vakabulai kina e dua na tagane [se yalewa].”2
“[Jisu Karisito] e sa iVakabula ka Dauveivueti ni vuravura,” a kaya o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada. “Sa i Koya na Mesaia yalataki. A bulataka o Koya na bula e taucoko sara ka sorovaka na noda ivalavala ca. Ena dau tiko tikivi keda voli ga o Koya. Ena valataka o Koya na noda ivalu. Sa i Koya na noda inuinui; Sa i Koya na noda veivakabulai; Sa i Koya na sala.”3
iKuri ni iVolanikalou
Mai na iVolanikalou
O ira na tisaipeli yalewa i Karisito sa ra mai ivakadinadina ni Nona itutu vaka Mesaia. O Meri Makitala a dua na tisaipeli i Jisu Karisito. A imatai okoya me raica “na vatu ni kautani mai na ibulubulu” ena mataka ni Tucaketale i Karisito. O koya “a tu mai na ibulubulu etautuba ka tagi” ni oti nona raica ni sa sega na Yagona mai na ibulubulu.
Sa qai “vuki vakanadaku okoya, ka raici Jisu ni sa tu, ia sa sega ni kila ni sai Jisu.
“Sa kaya vua ko Jisu, Yalewa, ko sa tagi ena vuku ni cava? ko cei ko sa vakasaqara? Sa nanuma ko koya ni sai vakatawa ni were, a sa kaya vua, Kevaka ko sa kauti koya tani, tukuna saka vei au na tikina ko sa vakotori koya kina, kau na qai laki kauti koya tani.
“Sa kaya vua ko Jisu, I Meri. Sa vuki ko koya, ka kaya vua, Raponai; a kena ibalebale, Vakavuvuli. A vakila o Meri ni o Koya a sega ni vakatawa ni were ia o Jisu Karisito, na Mesaia. Raica na Joni 20:1–17.
© 2014 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/14. Vakadonui me vakadewa: 6/14. Vakadewa ni Visiting Teaching Message, August 2014. Fijian. 10868 858
Vakasamataka Oqo
Cava na vuna e bibi me kilai deivaki kina na itutu ni iVakabula me Mesaia?