Mensahe sang Unang Panguluhan, Agosto 2014
Ang Ani sang Dios
Isa ka babayi nga ginhingadlan Christa ang sadto nagatrabaho sa isa ka gamay nga kompanya sang mga binhi. Palangga niya ang iya trabaho. Isa ka ginhalinan sang dako nga katingalahan nga ang tagsa ka gamay nga binhi nga ginabaligya niya may ikasarang nga magmangin isa ka milagroso nga bagay—isa ka carrot, repolyo, ukon indi gani isa ka dako kaayo nga kahoy.
Nanamian si Christa magpungko sa atubang sang iya computer nga nagabaton sang mga order kag nagasabat sang mga pamangkot. Pero isa ka adlaw nakabaton sia sang reklamo nga nagpalibog sa iya ulo.
“Wala man ‘ni ‘gatubo ang mga binhi n’yo,” siling sang kustomer. “Ginbakal ko ini duha na ka bulan ang nagligad pero wala gid may natabo.”
“Gintanom mo bala ini sa maayo nga duta kag ginbunyagan kag ginpainitan?” Pamangkot ni Christa.
“Wala, pero ginhimo ko ang dapat ko obrahon,” sabat sang kustomer. “Ginbakal ko ang mga binhi. Indi bala, garantisado man ini nga magtubo.”
“Pero wala mo ini gintanom?”
“Wala eh. Kay basi mahigkuan ang akon mga kamot.”
Ginpamensar ini ni Christa kag nagdesisyon nga dapat isulat ang mga instruksyon sa pagtanom. Namat-od sia nga dapat ang una nga instruksyon amo nga: “Kinahanglan ninyo sundon ang mga instruksyon sa pagtanom agud magtubo ang mga binhi. Indi pwede nga ibutang n’yo lang ini sa estante kag maglaum nga magtulubo ini.”
Wala madugayi isa naman ka reklamo ang iya nabaton.
“Wala man ‘ni ‘gapamunga ang mga binhi n’yo,” hambal sang kustomer.
“Gintanom mo bala ini sa maayo nga duta?” Sabat ni Christa. “Ginsagod mo bala ini sang bunyag kag silak sang adlaw?”
“Huo eh,” siling sang kustomer. “Ginhimo ko ina tanan―pareho gid sa ginsiling sa putos sini. Pero wala gid sing may natabo.”
“Bisan ano wala gid? May nag-ulhot bala sa binhi?”
“Wala gid,” siling sang kustomer. “Ginsunod ko gid ang direksyon kon paano ini itanom. Nagalaum ako nga makakaon na sang mga kamatis karon sa panyapon. Karon nadismaya gid ako katama.”
“Dali lang gid,” sabat ni Christa. “Buot mo silingon sini mo lang nga adlaw gintanom ang mga binhi?”
“N’ano ka man,” sabat sang kustomer. “Sang nagligad ko pa ini nga semana gintanom. Wala man ako nagalaum nga mamunga ini sa una gid nga adlaw; naghulat ako. Sugiran ko ikaw, malawig man ang pagbulubunyag ko kag paghulat-hulat sumugod sadto hasta subong.”
Nahibaluan ni Christa nga kinahanglan niya magdugang sang isa pa ka instruksyon: “Ining mga binhi nagasunod sa layi sang biology. Kon magtanom ka sang binhi sini nga aga kag mag-ekspektar nga makakaon sang kamatis pagkaligad sang isa ka semana, mapaslawan ka gid. Kinahanglan mangin pasensyoso ka kag hulaton ang kinaugali nga magpatubo sang inyo tanom.”
Daw maayo na ang tanan tubtob nakabaton naman si Christa sang isa pa gid ka reklamo.
“Wala gid ako makontento sa inyo mga binhi,” umpisa sang kustomer. “Gintanom ko ini pareho sa ginpanugyan sa direksyon sa putos sini. Ginbunyagan ko ini, ginpat-od nga nainitan, kag naghulat tubtob magpalamunga mga ini.”
“Ti daw husto man ang tanan mo nga ginhimo,” hambal ni Christa.
“Maayo na gani tani,” sabat sang kustomer. “Ugaling patola man ang ginpamunga sini!”
“Sa rekord ko diri amo man ina ang binhi nga gin-order mo,” siling ni Christa.
“Indi ‘ya patola ang gusto ko; gusto ko kalabasa!”
“Daw indi ako kaintiende.”
“Gintanom ko ang mga binhi sa kalabasahan—sa gintamnan ko mismo sang mga kalabasa sang nagligad nga tuig. Gindayaw ko ang mga tanom ko kada adlaw, ginahambalan ko sila nga mangin manami sila nga mga kalabasa pila ka adlaw. Pero imbes dalagko, bilog, kag dalag nga mga kalabasa, malagba kag berde nga patola ang nakuha ko. Nga pwerte sa pagkadamo!”
Nahibaluan ni Christa nga ang mga panulin kulang pa kag kinahanglan gid sambiton ang isa ka prinsipyo: “Ang binhi nga imo ginatanom kag ang tion sang pagtanom nagadikta kon ano ang imo anihon.”
Ang Layi sang Pag-ani
Si Apostoles Pablo nagtudlo parte sa ani sang Dios:
“Dili kamo magtalang; ang Dios indi tiliaw-tiawan: Kay bisan ano ang ginasab-og sang tawo, ina man ang iya anihon.
“Kay ang nagasab-og sa iya kaugalingon nga unod magaani sing kaduluntan gikan sa unod; apang ang nagasab-og sa Espiritu magaani sing kabuhi nga dayon gikan sa Espiritu.
“Kag dili kita magpakaluya sa paghimo sing maayo, kay sa nagakaigo nga dag-on magaani kita, kon indi kita pagpunawon” (Mga Taga-Galacia 6:7–9).
Sang sini lang nga tinion, ang Ginuo naghatag sa aton sing dugang nga kaalam kag palanan-awon parte sa sining indi mabali nga layi:
May isa ka layi, nga ginplastar sa langit antes pa gintuga ining kalibutan, nga sa diin naangot ang tanan nga mga bugay—
Kag kon may mabaton kita nga bugay gikan sa Dios, ini tungod sa pagtuman sinang layi kon sa diin ini naangot (tan-awa sa D&C 130:20–21).
Kon ano ang aton gintanom, amo man ang aton anihon.
Ang ani sang Dios may indi malaragway nga himaya. Sa ila nga nagatahod sa Iya, ang Iya bugana nga bugay nagaabot nga “ginsukob nga maayo, dinasok, naligo-ligo, nga nagaawas. …Kay sa talaksan nga ginataksan ninyo takson kamo liwat” (Lucas 6:38).
Kon ang dutan-on nga mga binhi nagakinahanglan sang pagpangabudlay kag pagpaumod, amo man ang madamo nga mga bugay sang langit. Indi pwede nga ibutang naton ang aton relihiyon sa higad kag magpaabot sang espirituhanon nga mga bugay. Pero kon magtanom kita kag magpatubo sang mga sulukdan sang ebanghelyo sa matag-adlaw nga kabuhi sang aton pamilya, may dako nga posibilidad nga ang aton kabataan magadako nga nagapamunga sang espirituhanon nga bunga nga may dako nga bili para sa ila kag sa magasunod nga henerasyon.
Ang sabat sang Dios sa aton mga pangamuyo wala pirme nagaabot sa gilayon—kon kaisa daw wala gid gani ini nagaabot—pero nakahibalo ang Dios kon ano ang pinakamaayo para sa Iya mga anak. Sa wala’y duhaduha, isa ka adlaw mas maathag naton nga makita; kag sa sinang adlaw makilala naton ang kaayo kag kaalwan sang langit.
Sa subong, ang aton lalab-uton kag dako nga kasadya amo ang magsunod sa halimbawa sang aton Manunudlo kag Manluluwas kag magpangabuhi sing maayo kag matinlo nga mga kabuhi agud nga ang ginpangako kag malahalon nga pag-ani sang bilidhon nga mga bugay sang Dios mangin aton.
Kon ano ang aton gintanom, amo man ang aton anihon.
Amo ina ang layi sang langit.
Amo ina ang layi sang ani sang Dios.
© 2014 iya lang sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14. Petsa sang pagtugot sa paglubad: 6/14. Paglubad sang First Presidency Message, August 2014. Hiligaynon. 10868 861
Pagtudlo gikan sa Sining Mensahe
Hambali upod sang inyo mga ginabisita kon paano ang ani sang Dios madapat sa mga kaangtanan, pagkahaylo kag panaksihon, sa mga lalab-uton sa trabaho kag pag-eskwela. Sarang ninyo basahon kag binag-binagon ang balaan nga mga kasulatan nga may kaangtanan sa sining layi, pareho sang Mga Hulubaton 11:18; 2 Mga Taga-Corinto 9:6; kag Alma 32. Paisoga sila nga repasuhon ang nagliligad nga mga lalab-uton kag magpahamtang sang bag-o nga mga lalab-uton agud makab-ot ang matarong nga mga resulta. Buligi sila nga maghimo sang plano sa paggiho suno sa nagakabagay agud malab-ot ang ila malawig nga tinutuyo.