Mensahe sa Visiting Teaching, Agosto 2014
Ang Langitnon nga Misyon ni Jesucristo: Mesias
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sa kabuhi kag misyon sang Manluluwas makapadugang sang inyo pagtuo sa Iya kag magabugay sa ila nga inyo ginabantayan paagi sa visiting teaching? Para sa dugang nga impormasyon, mag-log on sa reliefsociety.lds.org.
Pagtuo, Pamilya, Bulig
Ang balaan nga mga kasulatan nagatudlo sa aton nga sarang kita magpuyo sa presensya sang Dios “paagi sa mga merito, kag kaluoy, kag grasya sang Balaan nga Mesias” (2 Nefi 2:8). Ang Mesias “isa ka Aramaic kag Hebreo nga tinaga nga buot silingon ‘ang ginhaplas.’ …Sa Bag-o nga Katipan si Jesus gintawag nga Cristo, nga amo ang Griyego nga katumbas sang Mesias. Buot silingon ang pinili nga Propeta, Pari, Hari, kag Manunubos.”1
Si Elder Jeffrey R. Holland sang Korum sang Napulo’g Duha ka mga Apostoles nagpanaksihon: “Nakahibalo ako nga [si Jesucristo] amo ang Isa nga Balaan sang Israel, ang Mesias nga magakari liwat sa pila ka adlaw sa perpekto nga himaya, agud maghari sa duta bilang ang Ginuo sang mga ginuo kag Hari sang mga hari. Nakahibalo ako nga wala na sing iban pa nga ngalan nga ginhatag sa idalom sang langit nga paagi sa sini ang [lalaki ukon babayi] mahimo nga maluwas.”2
“[Si Jesucristo] amo ang Manluluwas kag Manunubos sang kalibutan,” siling ni Pangulong Dieter F. Uchtdorf, Ika-duhang Manuglaygay sa Unang Panguluhan. “Sia ang ginsaad nga Mesias. Nagkabuhi sia sang perpekto nga kabuhi kag nagpasag-uli para sa aton mga sala. Mangin yara sia pirme sa aton tupad. Pagaawayon Niya ang aton mga away. Sia amo ang aton paglaum; Sia amo ang aton kaluwasan; Sia amo ang dalan.”3
Dugang nga Balaan nga mga Kasulatan
Gikan sa Balaan nga mga Kasulatan
Ang babayi nga mga disipulo ni Cristo nangin mga saksi sang Iya nga papel bilang Mesias. Si Maria Magdalena isa sadto ka disipulo ni Jesucristo. Sia amo ang una nga nakakita “sang bato nga nakuha na sa lulubngan” sa aga sang Pagkabanhaw ni Cristo. Sia “nagtindog nga nagahibi sa gwa sang lulubngan” matapos madiskubrehan ang Iya lawas nga wala na sa lulubngan.
Dayon “nagliso sia kag nakita niya si Jesus nga nagatindog, apang wala sia makakilala nga si Jesus yadto.
“Si Jesus nagsiling sa iya, ‘Babayi, ngaa bala nagahibi ka? Sin-o ang imo ginapangita? Sia, nga nagahunahuna nga si Jesus amo ang manugbantay sang katamnan, nagsabat sa iya, ‘Ginuo, kon ikaw ang nagkuha sa iya, sugiri ako kon diin mo sia ginbutang, kag kuhaon ko sia.
“Si Jesus nagsiling sa iya, ‘Maria’. Nagliso sia kag nagsiling sa iya sa Hebreo, ‘Rabboni!’ (nga kon sayuron Manunudlo).” Nakilala ni Maria nga indi Sia ang hardinero kundi si Jesucristo, ang Mesias. (Tan-awa sa Juan 20:1–17.)
© 2014 iya lang sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14. Petsa sang pagtugot sa paglubad: 6/14. Paglubad sang Visiting Teaching Message, August 2014. Hiligaynon. 10868 861
Binagbinaga Ini
Ngaa bala importante nga mahangpan ang papel sang Manluluwas bilang ang Mesias?