Mensahe ti Umuna a Panguluen, Agosto 2014
Apit ti Dios
Maysa a balasang nga agnagan iti Christa ti naminsan a nagtrabaho iti bassit a kompania ti bukbukel. Impategna ti trabahona. Daytoy ti pagtaudan ti dakkel a kinadatdatlag a ti tunggal bassit a bukel nga inlakona ket addaan iti kabaelan a mangbalbaliw iti bagina iti maysa a banag a namilagruan—maysa a karot, repolio, wenno uray pay nabileg a kayo ti roble [oak tree].
Pagay-ayat ni Christa ti agtugaw iti sango ti kompiuterna tapno mangala kadagiti order ken agsungbat kadagiti saludsod. Ngem maysa nga aldaw nakaawat iti reklamo a namagsiddaaw kenkuana.
“Saan nga agtubo dagiti bukel,” kinuna ti kustomer. “Ginatangko dagitoy dua a bulan ti napalabasen ket awan met ti agtubo.”
“Immulam kadi dagitoy iti nasayaat a daga ken sinibugam ken impainitmo kadi dagitoy iti umdas?” Dinamag ni Christa.
“Saan, ngem inaramidko ti partek,” insungbat ti kustomer. “Ginatangko dagiti bukbukel. Iti baet ti amin, dagitoy ket naipanamnama a dumakkel.”
“Ngem dimo immula dagitoy?”
“Diak impalubos. Kaipapananna a marugitan dagiti imak.”
Pinanunot ni Christa maipapan iti daytoy ket inkeddengna a nasken a maisurat dagiti pangiwanwan iti panagmula. Inkeddengna a kastoy ti umuna a pangiwanwan: “Nasken a surotem dagiti annuroten iti panagmula tapno agrusing dagiti bukbukel. Saanmo a mabalin nga idulin dagitoy iti kabinet ket namnamaem dagitoy a dumakkel.”
Di nagbayag sakbay ti sabali pay a reklamo a namagsiddaw kenkuana.
“Saan nga agbunga dagiti bukbukel,” kinuna ti kostumer.
“Immulam kadi dagitoy iti nasayaat a daga?” Insungbat ni Christa. “Inikkam kadi dagitoy iti umisu a kaadu ti danum ken lawag ti init?”
“Ay, wen,” impilit ti kostumer. “Inaramidko amin dayta---eksakto a kas iti naibaga iti pakete. “Ngem saan nga immobra dagitoy.”
“Adda kadi banag a napasamak? Nagrusingda kadi?”
“Awan ti napasamak,” kinuna ti kostumer. “Immulak dagitoy kas naibilin. Ninamnamak nga adda koma kamatis a pangrabii. Ita napaayak unay.”
“Agurayka,” insungbat ni Christa. “Kunkunam kadi a nagmulaka iti bukbukel ita?”
“Saanka nga agang-angaw,” insungbat ti kostumer. “Immulak dagitoy makalawasen ti napalabas. Diak namnamaen a makakita kadagiti kamatis iti umuna nga aldaw; naganusak. Ibagak kenka, namin-adu a nagsibsibugak ken nagur-urayak manipud idi ken ita.”
Ammo ni Christa a nasken nga inayonna ti maysa pay a pangiwanwan: “Dagitoy a bukbukel ket mayannurot kadagiti paglintegan ti biolohia. No agmulaka iti bukbukel iti bigat ket namnamaem a makasidaka iti kamatis iti dayta a lawas, maupaykanto. Nasken nga aganuska ken agurayka a maiparang iti sanguanam ti aramid ti nakaparsuaan.”
Nagbalin a nasayaat ti amin agingga nga immawat ni Christa iti sabali pay a reklamo.
“Napaayak unay kadagiti bukbukelmo,” inrugi ti kustomer. “Immulak dagitoy segun iti inrekomenda ti pakete. Sinibugak dagitoy, siniguradok a naipainit dagitoy, ken nagurayak agingga nga iti kamaudianan pinataudda ti apitda.
“Kasla inaramidmo nga umisu ti amin a banag,” kinuna ni Christa.
“Mayat unay amin dayta,” insungbat ti kustomer. “Ngem ti naalak ket zucchini!”
“Ipakita dagiti rekordko a dagita dagiti bukel nga inordermo,” kinuna ni Christa.
“Ngem diak kayat ti zucchini; kayatko dagiti karabasa!”
“Diak sumursurot.”
“Immulak dagiti bukbukel iti sangakadisso a pagmulaan iti karabasa—ti mismo nga isu met laeng a daga nga agpataud kadagiti karabasa itay napalabas a tawen. Inaldaw a dinayawko dagiti mulmula, nga imbagbagak kadakuada nga agbalindanto a napipintas a karabasa. Ngem imbes a dadakkel, nagbukel, a maris-kahel a karabasa, nakaalaak iti atiddog, berde a zucchini. Tontonelada dagitoy!”
Ammo ngarud ni Christa a mabalin a saan nga umdas dagiti pangiwanwan ken kasapulan a dakamaten ti pagbatayan: “Ti bukel nga imulam ken ti oras ti panagmula ti mangikeddeng iti apit.”
Ti Linteg ti Apit
Insuro ni Apostol Pablo maipapan ti apit ti Dios:
“Dikay koma maallilaw; ti Dios saan a marabrabak: ta ti ania man nga imulanto ti maysa a tao, apitennanto met.
“Ta ti agmula a maipaay iti lasagna, iti lasag apitennanto ti panagrupsa; ngem dayta agmula a maipaay iti Espiritu, iti Espiritu apitennanto ti biag nga agnanayon.
“Ditay ngarud mabannog iti panagaramid iti naimbag; ta inton tiempona agapittayo, no ditay maupay” (Taga Galacia 6:7–9).
Kadagiti kallabes unay a panawen, inikkannatayo ti Apo iti nayon a sirib ken pannakaammo ken pannakaawat iti daytoy saan nga agbalbaliw a linteg:
“Adda paglintegan a di maibabawi ti pannakaipaulogna iti langit sakbay ti pannakabukel daytoy a lubong a nakaibatayan amin a bendision—
“Ket no makagun-odtayo iti ania man a bendision manipud iti Dios, daytoy ket babaen ti panagtulnog iti dayta a paglintegan a nakaibatay” (DkK 130:20–21).
Ania man ti imulatayo, apitentayo.
Awan duadua a nagloriaan ti apit ti Apo. Kadagitay agdaydayaw Kenkuana, umay dagiti nawadwad a paraburna iti “sukat a naimbag, napenpen, nasedsed, ken agliplippias. … Ta ti rukod a pagrukodyo isunto met laeng ti pakarukodanyo” (Lucas 6:38).
Kas iti panagkasapulan dagiti naindagaan a bukbukel iti panagkagumaan ken panaganus, kasta met ti kaadu dagiti parabur ti langit. Ditayo maikabil ti relihiontayo iti kabinet ket namnamaentayo ti agapit kadagiti naespirituan a parabur. Ngem no agmulatayo ken aywanantayo dagiti pagrukodan ti ebanghelio iti inaldaw a panagbiag ti pamiliatayo, nalabit a dummakkelto dagiti annaktayo tapno agpataudda iti naespirituan a bunga a dakkel ti pategna kadakuada ken kadagiti masakbayan a kaputotan.
Saan a kanayon a madagdagus dagiti sungbat ti Dios kadagiti kararagtayo—no dadduma kasla saandan a dumteng—ngem ammo ti Dios no ania ti kasayaatan para kadagiti annakna. Naipanamnama nga iti maysa nga aldaw makitatayo a nalawlawag; ken iti dayta nga aldaw mabigbigtayonto ti kinaimbag ken kinamanagparabur ti langit.
Ita a panawen, ti panggep a tun-oyentayo ken dakkel a rag-otayo ket magna kadagiti addang ti Maestro ken Mangisalakan ken agbiag iti nasayaat ken napintas a biag tapno matagikuatayo ti naikari ken napateg nga apit kadagiti di magatadan a parabur ti Dios.
Ania man ti imulatayo, apitentayo.
Dayta ti linteg ti langit.
Dayta ti linteg ti apit ti Dios.
© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti First Presidency Message, August 2014. Ilokano. 10868 864
Panangisuro manipud iti Daytoy a Mensahe
Paglilinnawagan kadagiti sarungkaranyo no kasano a mayaplikar ti linteg ti apit ti Dios kadagiti pannakilangen, kombersion ken pammaneknek, wenno panggep a tun-oyen iti karera ken edukasion. Mabalin a basaen ken ibilangmo dagiti nasantuan a kasuratan a mainaig iti daytoy a linteg, kas iti Proverbio 11:18; 2 Taga Corinto 9:6; ken Alma 32. Allukoyem ida a mangsubli a mangadal kadagiti panggep a tun-oyen ken mangituding kadagiti panggep a tun-oyen a manggun-od kadagiti nalinteg a pagbanagan. Tulongan ida a mangaramid iti plano nga agtignay a situtunos tapno maragpat ti atiddog ti agpangna a panggep.