Mensahe iti Visiting Teaching, Agosto 2014
Ti Nadiosan a Mision ni Jesucristo: Mesias
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawatyo iti biag ken mision ti Mangisalakan ket mangpapigsa iti pammatiyo Kenkuana ken mangparabur kadagiti ay-aywananyo babaen ti visiting teaching? Para iti mainayon nga impormasion mapan iti reliefsociety.lds.org.
Pammati • Pamilia • Tulong
Isuro dagiti nasantuan a kasuratan a makapagnaedtayo iti sidong ti Dios “malaksid no adda pammateg, ken panangngaasi, ken parabur ti Nasantuan a Mesias” (2 Nephi 2:8). Mesias ket “balikas nga Aramaic ken Hebreo a kaipapananna ti napulotan.” … Iti Baro a Tulag maawagan ni Jesus iti Cristo, a Griego a kapada ti Mesias. Kayatna a sawen ti napulotan a Propeta, Saserdote, Ari, ken Mangisalakan.”1
Ni Elder Jeffrey R. Holland ti Korum dagiti Sangapulo-ket-dua nga Apostol impaneknekna: “Ammok a ni [Jesucristo] ti Maysa a Nasantuan ti Israel, ti Mesias nga umayto manen iti maysa nga aldaw iti maudi a gloria, tapno agturay iti daga kas Apo dagiti appo ken Ari dagiti ar-ari. Ammok nga awan ti sabali pay a nagan a naited iti babaen ti langit a mabalin a pakaisalakanan ti lalaki [wenno babai]”2
Ni “[Jesucristo] ti Mangisalakan ken Mannubbot ti lubong,” kinuna ni Presidente Dieter F. Uchtdorf, Maikadua a Mammagbaga iti Umuna a Panguluen. “Isu ti naikari a Mesias. Nagbiag Isuna a naan-anay ken sinubbotna dagiti basoltayo. Kanayon nga addanto Isuna iti abaytayo. Makiranget Isuna kadagiti dangadangtayo. Isu ti namnamatayo; Isu ti mangisalakantayo; Isu ti dalan.”3
Dagiti Mainayon a Nasantuan a Kasuratan
Manipud kadagiti Nasantuan a Kasuratan
Dagiti babbai a disipulo ni Cristo ket nagbalinda a saksi iti akemna a kas Mesias. Ni Maria Magdalena ket maysa a disipulo ni Jesucristo. Isu ti umuna a nakakita iti “bato a naligsayen idi tanem” iti agsapa ti Panagungar ni Cristo. Isu ket “agtaktakder nga agsangsangit idi iti ruar iti asdeg ti tanem” kalpasan a natakuatanna nga awanen ti bagina iti tanem.
Kalpasanna “timmaliaw iti likudan, ket namatmatanna ni Jesus nga agtaktakder idi, ngem dina impagarup nga isu ni Jesus.
“Kuna kenkuana ni Jesus, Babai, apayapay agsangitka? asino ti sapsapulem? Isu, idi ipagarupna nga isu ti managaywan iti minuyongan, kunana kenkuana, Apo, no sika ti nangikkat ditoy ibagam kaniak no adino ti nangikabilam kenkuana, ket ipanawkonto ditoy.
“Kuna kenkuana ni Jesus, Maria. Di babai simmango, ket kunana kenkuana, Rabboni, a kayatna a sawen, Mannursuro.” Nabigbig ni Maria a saan nga Isu ti agmulmula no di ni Jesus, ti Mesias. (Kitaen iti Juan 20:1–17.)
© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti Visiting Teaching Message, August 2014. Ilokano. 10868 864
Ibilang Daytoy
Apay a nasken a maawatantayo ti akem ti Mangisalakan kas Mesias?