Poraus seni ewe Aewin Presetensi, September 2014
Sia Monata?
Non ewe neni ngang ua nonnom o angang non me nom, ewe Mwichefen a fori eu nenien foneni chuko, ekkewe chon angang ir chon ekkewe wart mei ikkeweia ren ar pwisin asora ar fansoun. Fan chommong ei neni mi kan angangoch, pwe a awora ngeni ewe nenien isoisin pisop fite ngoroun sokkun me fitepukun paun chuko mi fen monata ne kuku. Nge, fan ekkoch, an emon epwe emon chon aninis ese chok wewen pwe epwe wor pwoi won ekkewe pau nge a pwan tufich pwe epwe wor osukosuk non netip me non mokur.
Awewe, ua chemeni non eu fansoun am aua ionifengeni ekkewe anuon a wor rer ewe Pristut seni Aaron pwe repwe nimeti ewe nenien foneni chuko. Am ei mwich mi kan pwapwa me mwetures aua chufengen non ewe neni me aua muttir ne angei, ioni, me keni chommong ekkewe fetin me piingau. Seni saramen ekkewe ekkei, am aua mongo hot dog me aua apasa am kapasen ingeiti ngeni emon me emon neim ren met au fori.
Nge, a chok wor eu osukosuk mi watte a fis. Pun aua akurang me pokiten ekkewe ekkei, ekkewe nimu ngorou chuko ra niuokus, iwe rese awora sokkun. Seni fansoun ano aua mwutata pwe epwe wor ekkis fetin fan itan ekkewe chuko repwe tufichin awora sokkun.
Ese wor emon chon ewe Mwichefen mi awora aninis fan itan ekkewe mi woungau epwe menuki are amam ewe angangen aninis. Angang, tumunun moni, anongonong pwisin woch, me aninis fengen rese minafo ngeni kich.
Sipwe chechemeni pwe ekkewe nenien isois mi nap epwe chok eu me eu famini non ewe Mwichefen epwe wor rer ar isoisin mongo, uf, me, ika mi tufich, ekkewe ekkoch pisekin manau. Nenien ewe Samon nenien isois mi for seni ewe fansoun, nipwakoch, kirekiroch, pisek mi epinipin, me moni seni ekkewe chon Mwichefen mi nukuchar. Ekkei mi kawor ngeni ewe pisop ne anisi ekkewe mi woungau.
Aua pesei meinsin ekkewe Aramas mi Pin non Fansoun Soponon ar repwe tipachem non ar kewe kokkot, repwe tumunu ifa usun ra manaueni manauer, me resap awora eu niwinimang mi watte. Chommong aramas repwe tufichin engino non ekkewe fansoun osukosuken moni ika a chok wor nenier nenien isoisen mongo me uf me ika ese wor ar niwinimang. Ikenai sia kuna pwe chommong ra fori ponuan ei kapasen aurur: a wor ar niwinimang nge ese wor aner mongo.
Ua apasa sefan pwe met ewe Aewin Presetensi ra apasa non ekkewe ekkoch ier a no:
“Ekkewe Aramas mi Pin non Fansoun Soponon ra angei kapasen aurur fan chommong ier pwe ar repwe monata fan itan osukosuk ren ar repwe isoni ekkis seni nour moni. Ren an emon epwe fori ei epwe fokkun apochokuna ach epet me pwapwa. A wor wisan famini meinisin ar repwe pwisin apwonueta met mi namwot ngenir ren ukukun ra tufich ngeni.
“Aua peseikemi ese nifinifin ia oua nom ia won unusen fonufan pwe oupwe ammonata fan itan osukosuk ren ami oupwe tumunu me isoni moni fan itan osukosuk. Aua peseikemi pwe oupwe tumunuoch non ami kamo; nemeni ami kewe mochenin kamo pwe ousap nom fan nemenien niwinimang. Oune muttir ne moni ami kewe niwinimang, pwe ousap nom fan nemenien. Isoni ekkis moni pwe epwe wor non fansounen osukosuk.”1
Sia fen ammonata ngeni ekkewe fansoun osukosuk non manauach? Sia apochokuna ach kewe nipwakoch? Sia fen ammonata fan itan ekkewe fansoun epwe tori kich? Kich mi fen ammonata ach kewe mettoch fan itan ekkewe fansoun osukosuk? Kich mi anneasochisi ekkewe annukun Kot? Sia etiwa afanafanen ekkewe soufos? Sia ammonata ne awora ach pisek ngeni ekkewe mi osupwang, ngeni ekkewe mi woungau? Sia ammonata ne churi ewe Samon?
Sia manau non ekkei ran mi osukosuk. Fan chommong sise sinei met epwe fis; ina minne, mi namwot ngenikich pwe sipwe ammonata fan itan osukosuk. Nupwen ewe fansounen finata a war, ewe fansoun ammon a fen nuno.
© 2014 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/14. Kapungunon chiakun: 6/14. Chiakun First Presidency Message, September 2014. Chuukese. 10869 901
Afanafan seni Ei Poraus
Ekieki usun met mi namwot ngeni ekkewe ka churi, me ekieki ifa usun ka tongeni anisir pwe repwe anongonong won pwisin ar tufich non pekin angang, moni, mongo, are non pekin ammonata fan itan fansoun osukosuk. Ekieki usun eu me nein om kewe nipwakoch ka tongeni pwari ngenir, usun atake are tumunu moni, epwe apochokuner ne anneasochisi aururun Preseten Monson.