Klumech er a First Presidency, Ongetiu el Buil 2014
Kede Kldmokl?
A basio el mle tal kiei er ngii e mesiou, a Ikelesia a ulerrurt er a sers er a malk er ngii, e a rechad er a ureor a mle oumesingd el di ulngeseu er a chim el tir a chedal a ikelesia. Oumesingd er a taem eng kmal mle ungil e bekerurt el ureor, el uchul a betok el telael ngais me a derdart el bond el odoim el malk el mo er sel olekmekimel er a rebisop. A chelsel a bebil er a taem, eng mla er ngii a ikel kuk dilubech, el tirkal ulengeseu el chad er a sers a diak di le blo el blubuu a chimorir te dirrek el mla er a ringel er a reng me a uldasou.
Okesiul tiang, e ak lotkii a taem er a ki mongidb er a rengeasek el ngara Aaronic Priesthood el mo mengedmokl er tial basio. A klemeriar reng er kemam me a mesisiich el reng er a uldekdak er tial ureor me a rechedel a omekereklel a ureor, a chiludel, e sileseb a kmal betok el chudel me a komi. A ngau el milchumel, e a ki milnga hot dog el ua lomereng el saul el mer kemam er a kmal ungil ureor el milkedmokl.
Eng di, ng mlarngii a chimo el klou el tellemall. A cherrodech me a ngau a mle uchul e a ikal kmeed el eim el telael el dechuu el malk lomechell a mle ngmill a bsechel e mo diak lomechell a ngais. Uriul risei e sel ki molaml e a ki mechei a sesei el chudel me luchul e bol sebechel mo betok a ngais.
Ng diak a chedal a Ikelesia el mla olngeseu er a rengesool e obes malechub eng ouchel er a rengul er a teletael riruul. A omekdubech, omengereomel, siungel a klechad, me a omesoiu el mora rebebil a diak el beches el tekoi el mei er kid.
Ng kired el mo medengei el kmo sel kmal bedochel el teletael sel bek el telungalek er a Ikelesia le bo le ngar ngii a olekmekimel er a kall, bail, e a, lsebechel, e lodak er ngii a ikel bebil er a meklou a belkul usbechall er a klengar. A olekmekimel er a Rubak a uldimukl er ngii a taem, duch, kldachelbai, chubechub, chedaol el klalo, me a rolel a udoud er tirkel mesisiich a klaumera er tir el chedal a Ikelesia. A ikang a lolab a bisop lolngeseu er tirkel lousbech a ngeso.
Aki mengelechel er a Ruriul-klebesei el Santo el mo kerekikl, mo klebech a delengcheklir, e mo mengeroid er tir er a betok el blals. Betok el chad a sebechir el mo selbechakl er a ses el eolt er a klengar omko ngarngii a klebech el kldmokl el kall me a bail e diak el blals. Chelechal sils e te betok el chad a mla miteklii tial omellach: ng bai uldirkork a belsir e diak a kelir.
Ak lmuut el meketeklii a tekingel a First Presidency er a sesei el rak er a mla memong:
“A Ruriul-klebesei el Santo a mla mosisechakl er a chelsel a betok el rak el mo kldmokl el kirel a kerior el mo koreomel a sesei el udoud. Tia lomeruul a kmal mo ngosuterir el sobecheklii a klengar er tir. A bek el telungalek a ngerchelel el di ngii el mesiou er ngii er a ikel rokui el lousbech el mo er a bkul rebab el sebechir.
“Aki orrimel er kemiu er a ngii di el ker el mo kldmokl el kirel a kerior el mo omes a teletael er a orretel a ududiu. Aki mengelechel er kemiu el mo klebech a usbechelliu er a udoud; e mo klebech a omengitel a udoud meng diak bom blals. Bom harau a belsiu er sel kot el rechediu, e mongeroid er kemiu er tial teletael. Mongereomel er a chimo el sens e mongudel er ngii el mo klou.”1
Kede kldmokl el kirel a bkaischemrungel el tekoi er a klengar kid? Kede ungil er a ikel duch er kid? Kede kerekikl a teletael er a delengchekled? Ngar ngii a ngara chimad el ulecheuekl el lomech er uriul? Kede oltirakl a llechul a Dios? Kede oltirakl osischeklir a reprofet? Kede kldmokl lodars a ngeso el mora remechebuul, me a rekosekodel? Kede osisiu kid me a Rubak?
Kede kiei er a meringel el taem. Ng blechoel diak dodengelii a ngar medad; me a leuaisei, eng kired el mo kldmokl el kirel a mo duubech. A lemei sel taem el kirem lomdasou, e a taem el dirk mongedmokl a mla mocheuekl.
© 2014 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/14. Kengei er a oidel: 6/14. Oidel a First Presidency Message, September 2014. Palauan. 10869 881
Osischeklel Tia el Klumech
Momdasu a ikel lousbech tirkel moldingel er tir, momdasu a teletael el sebechem el ngosuterir el mo di tir el ultuir er a urerir, udoud, olekmekiml er a kall, malechub ete mo sebecheir el kldmokl a ldubech a bkaischemrungel. Mondasu a duch el sebechem louchais el mo er tir, el uai a ngara sers malechub a ungil orretel a udoud, el uchul e te mo oltirakl a osischeklel a President Monson.